ଭୁୁବନେଶ୍ୱର: ଡିଜିଟାଲ୍ ୱେବ୍ ଚାନେଲ ଅର୍ଗସ୍ ନ୍ୟୁଜ୍ ଆଜିଠାରୁ ଟିଭି ପରଦାରେ ସାଟେଲାଇଟ୍ ଚାନେଲ୍ ରୂପରେ ଆତ୍ମପ୍ରକାଶ କରୁଛି । କେନ୍ଦ୍ର ଅର୍ଥମନ୍ତ୍ରୀ ଶ୍ରୀମତୀ ନିର୍ମଳା ସୀତାରମଣଙ୍କ କରକମଳରେ ଏହା ଲୋକାର୍ପିତ ହେବ । ଅର୍ଗସ୍ ସାଟେଲାଇଟ୍ ଚାନେଲ୍ ର ଆବିର୍ଭାବ ଓଡ଼ିଶା ଗଣମାଧ୍ୟମ ଜଗତରେ ଚର୍ଚ୍ଚାର ବିଷୟ ହୋଇଥିଲା ବେଳେ ବିଜେପି ନେତ୍ରୀ ଲେଖାଶ୍ରୀ ସାମନ୍ତସିଂହାରଙ୍କ ଦ୍ୱାରା ଏହାର ପ୍ରଚାର କୌତୁହଳ ସୃଷ୍ଟି କରିଛି ।
ସୋସିଆଲ୍ ମିଡ଼ିଆରେ ସଦାସର୍ବଦା ନିଜକୁ ଚର୍ଚ୍ଚାରେ ରଖିବାକୁ ପସନ୍ଦ କରୁଥିବା ଲେଖାଶ୍ରୀ ଗତକାଲି ତାଙ୍କ ସୋସିଆଲ୍ ମିଡ଼ିଆ ଆକାଉଣ୍ଟରେ ଅର୍ଗସ୍ ନ୍ୟୁଜ୍ ସାଟେଲାଇଟ୍ ଚାନେଲ୍ ର ଭର୍ଚୁଆଲ୍ ଲଞ୍ଚ କାର୍ଯ୍ୟକ୍ରମର ନିୟନ୍ତ୍ରଣ ପତ୍ର ପୋଷ୍ଟ କରିଥିଲେ । କେବଳ ସତ୍ୟର ଉନ୍ମୋଚନ କରିବାର ସଂକଳ୍ପ ନେଇ ଓଡ଼ିଶାବାସୀଙ୍କ ସମ୍ମୁଖକୁ ଏହି ସତେଲାଇଟ୍(ଲେଖାଶ୍ରୀଙ୍କ ଭାଷାରେ) ଟିଭି ଚାନେଲ୍ ଆସୁଥିବା ସେ ଦାବି କରିଥିଲେ । ତେବେ ଚାନେଲ୍ କୁ ହାର୍ଦ୍ଦିକ ଶୁଭେଚ୍ଛା ଓ ଅଭିନନ୍ଦନ ଜଣାଇବାରେ ସେ ନିଜକୁ ସୀମିତ ରଖିନାହାନ୍ତି । ଭର୍ଚୁଆଲ୍ ଲୋକାର୍ପଣ କାର୍ଯ୍ୟକ୍ରମର ଲିଙ୍କ୍ ବି ସେୟାର୍ କରିଛନ୍ତି ।
ଜନସାଧାରଣଙ୍କ ନିମନ୍ତେ ଏହି ଲିଙ୍କ୍ କୁ ସଂସ୍ଥାର କର୍ମକର୍ତ୍ତାମାନେ ସେୟାର କରିବା ପୂର୍ବରୁ ଲେଖାଶ୍ରୀ ଏହାକୁ ପବ୍ଲିକ୍ ରେ ସେୟାର୍ କରିବା ଭୃକୁଞ୍ଚନ ସୃଷ୍ଟି କରିଛି । ଅର୍ଗସ୍ ରେ ଏହି ବିଜେପି ନେତ୍ରୀଙ୍କ କିଭଳି ସଂପୃକ୍ତି ବୋଲି ଅନେକ ପ୍ରଶ୍ନ କରିଛନ୍ତି । ଲୁଚିଛି ନା ଗୋଡ ଦିଇଟି ଦିଶୁଛି ବୋଲି କିଛି ଲୋକ ମନ୍ତବ୍ୟ ଦେଇଥିବା ବେଳେ ଟିଭିରେ ନାଗୁଆ ମୁହଁ ଦେଖାଇବା ଖୁସିରେ ଏହି ନେତ୍ରୀ ବିଭୋର ବୋଲି କଟାକ୍ଷ କରାଯାଇଛି ।
