ଆନ୍ଦୋଳନ ନାଁରେ ବିଜେପି କର୍ମୀଙ୍କ ଆତଙ୍କରାଜ

ଭୁବନେଶ୍ୱର: ଭୁବନେଶ୍ୱରରେ ଆଜି ବିଜେପି ଯୁବମୋର୍ଚ୍ଚା କର୍ମୀଙ୍କ ହିଂସ୍ର ଆଚରଣ ଦେଖିବାକୁ ମିଳିଛି । ବିପର୍ଯ୍ୟସ୍ତ ଆଇନଶୃଙ୍ଖଳାର ପ୍ରତିବାଦ କରିବାକୁ ଯାଇ ସେମାନେ ନିଜେ ଆଇନକୁ ହାତକୁ ନେଇଥିଲେ । ବିଧାନସଭା ଘେରାଉ ଆନ୍ଦୋଳନରେ ସାମିଲ ହୋଇଥିବା ଯୁବମୋର୍ଚ୍ଚା କର୍ମୀମାନେ ପୁଲିସକୁ ଢ଼େଲାପଥର, ଅଣ୍ଡା, ପାଣିବୋତଲ ମାରି ଲହୁ ଲୁହାଣ କରିଛନ୍ତି । ଯୁବମୋର୍ଚ୍ଚା କର୍ମୀଙ୍କ ଆକ୍ରମଣରେ ଏସିପି ଅମିତାଭ ମହାପାତ୍ରଙ୍କ ସମେତ ୨୧ ପୁଲିସ ଗୁରୁତର ଆହତ ହୋଇଛନ୍ତି । ସମସ୍ତଙ୍କୁ କ୍ୟାପିଟାଲ୍ ହସ୍ପିଟାଲ୍ ରେ ଭର୍ତ୍ତି କରାଯାଇଥିଲା । ତେବେ ଅବସ୍ଥା ଗୁରୁତର ହେବାରୁ ଏସିପି ଶ୍ରୀ ମହାପାତ୍ର ଏବଂ ସବଇନସପେକ୍ଟର ଦେବରଂଜନ ମହାପାତ୍ରଙ୍କୁ କଟକ ଏସସିବି ସ୍ଥାନାନ୍ତର କରାଯାଇଛି । ପୁଲିସ ଲାଠିମାଡ଼ରେ ମଧ୍ୟ ଅନେକ ଯୁବମୋର୍ଚ୍ଚା କର୍ମୀ ଆହତ ହୋଇଥିବା ଜଣାପଡ଼ିଛି ।

ମନ୍ତ୍ରୀ ନବ ଦାସ ହତ୍ୟାକାଣ୍ଡର ପ୍ରକୃତ କାରଣର ଉନ୍ମୋଚନ, ରାଜ୍ୟରେ ବିପର୍ଯ୍ୟସ୍ତ ଆଇନ ଶୃଙ୍ଖଳା ପରିସ୍ଥିତିକୁ ନେଇ ବିଜେପି ଯୁବମୋର୍ଚ୍ଚା ପକ୍ଷରୁ ଆଜି ବିଧାନସଭା ଘେରାଉ ଆନ୍ଦୋଳନ ଥିଲା । ଶତାଧିକ କର୍ମୀ ଏକ ଶୋଭାଯାତ୍ରାରେ ବିଧାନସଭା ଘେରାଉ କରିବାକୁ ଆସୁଥିବା ବେଳେ ଲୋୟର ପିଏମଜିଠାରେ ପୁଲିସ ସେମାନଙ୍କୁ ଅଟକାଇବାକୁ ଉଦ୍ୟମ କରିଥିଲା । ମାତ୍ର ଯୁବମୋର୍ଚ୍ଚା କର୍ମୀମାନେ ପୁଲିସ କର୍ଡନ ଭାଙ୍ଗି ଆଗକୁ ବଢ଼ିବାରୁ ପୁଲିସ ସହ ମୁହାଁମୁହିଁ ହୋଇଥିଲା । ଏହି ସମୟରେ କିଛି କର୍ମୀ ପୁଲିସ ଉପରକୁ ପ୍ରଥମେ ଅଣ୍ଡାମାଡ଼ କରିଥିଲେ । ଆନ୍ଦୋଳନକାରୀଙ୍କୁ ଘଉଡ଼ାଇବାକୁ ଯାଇ ପୁଲିସ ଲାଠିମାଡ଼ କରିଥିଲା । ଆଉ ଏହାପରେ ପରିସ୍ଥିତି ଅସମ୍ଭାଳ ହୋଇଯାଇଥିଲା ।

ପୁଲିସ ଲାଠିମାଡ଼ର ମୁକାବିଲା ପାଇଁ ସମ୍ଭବତଃ ପ୍ରସ୍ତୁତ ହୋଇ ଆସିଥିଲେ ଯୁବମୋର୍ଚ୍ଚା କର୍ମୀ । ପୁଲିସ ଉପରକୁ ଚାରିଆଡୁ ଆକ୍ରମଣ ଆରମ୍ଭ କରିଦେଇଥିଲେ । କିଏ ଟେକା ମାରିଲେ ତ ଆଉ କିଏ ଅଣ୍ଡା ତ ଆଉ କିଏ ଛିଣ୍ଡା ଚପଲ ଏବଂ ପାଣି ବୋତଲ ଫୋପାଡ଼ିଲେ । ଟେକାମାଡ଼ରେ ଭୁବନେଶ୍ୱର ଜୋନ୍-୨ ଏସିପି ଅମିତାଭ ମହାପାତ୍ରଙ୍କ ମୁଣ୍ଡ ଫାଟିଯାଇଥିଲା । ଆଉ କିଛି ପୁଲିସ ଅଧିକାରୀଙ୍କ ହାତ ଓ ଗୋଡ଼ରେ ଗୁରୁତର ଆଘାତ ଲାଗିଥିଲା ।

ତେବେ ସେତିକିରେ ସରି ନଥିଲା ଯୁବମୋର୍ଚ୍ଛା କର୍ମୀଙ୍କ ଆତଙ୍କରାଜ । ପ୍ରାୟ ୫ ଟି ପୁଲିସ ଗାଡ଼ିକୁ ଢ଼େଲା ମାରି ଜଖମ କରିଥିବା ଡିସିପି ପ୍ରତୀକ ସିଂ ସୂଚନା ଦେଇଛନ୍ତି । ଏକ ପୁଲିସ ଭ୍ୟାନ୍ ର ଛାତ ଉପରେ ଚଢ଼ି ହଙ୍ଗାମା କରିଥିଲେ । କିଛି କର୍ମୀ ଏକ ପୁଲିସ ଗାଡ଼ିରେ ପେଟ୍ରୋଲ ଢ଼ାଳି ନିଆଁ ଲଗାଇବାକୁ ଉଦ୍ୟମ କରିଥିବା ଅଭିଯୋଗ ହୋଇଛି । ଏହିଭଳି ଭାବେ ପ୍ରାୟ ୧ ଘଣ୍ଟା ଧରି ଲୋୟର ପିଏମଜି ରଣକ୍ଷେତ୍ର ପାଲଟି ଯାଇଥିଲା ।

ପ୍ରାୟ ୨୦୦ ବିକ୍ଷୋଭକାରୀଙ୍କୁ ପୁଲିସ ସେଠାରୁ ଉଠାଇ ନେଲା ପରେ ପରିସ୍ଥିତି ଶାନ୍ତ ପଡ଼ିଥିଲା । ଅନ୍ୟପକ୍ଷରେ ଗୁରୁତର ଆହତ ପୁଲିସଙ୍କୁ ଚିକିତ୍ସା ପାଇଁ କ୍ୟାପିଟାଲ୍ ହସ୍ପିଟାଲ୍ ରେ ଭର୍ତ୍ତି କରାଯାଇଛି । ଡିଜିପି ସୁନୀଲ ବଂଶଲ, କମିସନର ସୌମେନ୍ଦ୍ର ପ୍ରିୟଦର୍ଶୀ କ୍ୟାପିଟାଲ୍ ହସ୍ପିଟାଲ୍ ଆସି ଆହତମାନଙ୍କୁ ଭେଟିବା ସେହ ନିର୍ଦ୍ଦେଶକଙ୍କ ସହ ଆଲୋଚନା କରିଥିଲେ । ପୁଲିସ ଉପରେ ବିକ୍ଷୋଭକାରୀଙ୍କ ଆକ୍ରମଣ ପୂର୍ବ ପ୍ରସ୍ତୁତ ବୋଲି ଜଣାପଡୁଛି । ତେବେ ଆଇନକୁ ହାତକୁ ନେଇଥିବା ଲୋକଙ୍କ ବିରୋଧରେ କାର୍ଯ୍ୟାନୁଷ୍ଠାନ ହେବ ବୋଲି ଡିଜିପି ଶ୍ରୀ ବଂଶଲ ପ୍ରତିକ୍ରିୟା ଦେଇଛନ୍ତି । ବିକ୍ଷୋଭକାରୀମାନେ ଗଣ୍ଡଗୋଳ କରିବାକୁ ପ୍ରସ୍ତୁତ ହୋଇ ଆସିଥିବା ଜଣାପଡୁଛି ବୋଲି କମିସନର ଶ୍ରୀ ପ୍ରିୟଦର୍ଶୀ କହିଛନ୍ତି ।