ଭୁବନେଶ୍ୱର: ଆନ୍ଦୋଳନ ନାଁରେ ଭୁବନେଶ୍ୱରର ଲୋୟର ପିଏମଜିରେ ଆତଙ୍କରାଜ କରିଥିବା ବିଜେପି ଯୁବମୋର୍ଚ୍ଚା କର୍ମୀମାନେ ଆଇନ ଜାଲରେ ପଡ଼ିଛନ୍ତି । ପୁଲିସକୁ ଢ଼େଲା ମାରି ଲହୁ ଲୁହାଣ କରିଥିବା ୨୨ ଯୁବମୋର୍ଚ୍ଚା ନେତା ଓ କର୍ମୀଙ୍କୁ ପୁଲିସ ଗିରଫ କରି କୋର୍ଟ ଚାଲାଣ କରିଛି । ସେଥିରେ ଅଛନ୍ତି ଯୁବମୋର୍ଚ୍ଚା ସଭାପତି ଇରାଶିଷ ଆଚାର୍ଯ୍ୟ । ସେମାନଙ୍କ ବିରୋଧରେ ଆଇପିସିର ଧାରା ୩୦୭, ୩୫୩,୩୨୩, ୩୨୫, ୩୩୨, ୩୩୩, ୨୨୪, ୪୩୬, ୫୦୬, ୧୪୯,୧୪୭, ୧୪୮,୨୯୪ ଭଳି ସଙ୍ଗୀନ ଦଫା ଲାଗିଥିବା ଲାଗିଥିବା ଭୁବନେଶ୍ୱର ଡିସିପି ପ୍ରତୀକ ସିଂ ସୂଚନା ଦେଇଛନ୍ତି । ଏଥିସହ ଅନ୍ୟ ୩୦ ଜଣଙ୍କୁ ଅଟକ ରଖାଯାଇ ପଚରାଉଚୁରା ଚାଲିଛି ।
ଗିରଫ ଯୁବମୋର୍ଚ୍ଚା ନେତାମାନଙ୍କ ଅପରାଧ ପୃଷ୍ଠଭୂମିର ସନ୍ଧାନ ମିଳିଛି । ଇରାଶିଷଙ୍କ ସମେତ ଅନ୍ୟ କିଛି କର୍ମୀଙ୍କ ବିରୋଧରେ ପୂର୍ବରୁ ବିଭିନ୍ନ ସଙ୍ଗୀନ ଅପରାଧିକ ମାମଲା ଅଛି । ଏପରିକି ଏକ ହତ୍ୟା ମାମଲାରେ ଇରାଶିଷ ଗିରଫ ହୋଇ ଦୀର୍ଘ ଦିନ ଜେଲ୍ ରେ ଥିଲେ । ଆଜି ହିଂସାକାଣ୍ଡ ଭିଆଇବା ପାଇଁ ସେମାନଙ୍କୁ ଉସକାଇଥିବା ନେତାମାନେ ମଧ୍ୟ ପୁଲିସ ସ୍କାନରକୁ ଆସିଛନ୍ତି । ପୁଲିସ ପକ୍ଷରୁ ସିସିଟିଭି ଯାଞ୍ଚ କରାଯାଉଛି । ପ୍ରମାଣ ମିଳିଲେ ସେମାନଙ୍କୁ ଗିରଫ କରାଯିବ ବୋଲି ଜଣାପଡ଼ିଛି ।
ସୂଚନାଯୋଗ୍ୟ ଯେ ମନ୍ତ୍ରୀ ନବ ଦାସ ହତ୍ୟାକାଣ୍ଡର ପ୍ରକୃତ କାରଣର ଉନ୍ମୋଚନ, ରାଜ୍ୟରେ ବିପର୍ଯ୍ୟସ୍ତ ଆଇନ ଶୃଙ୍ଖଳା ପରିସ୍ଥିତିକୁ ନେଇ ବିଜେପି ଯୁବମୋର୍ଚ୍ଚା ପକ୍ଷରୁ ଆଜି ବିଧାନସଭା ଘେରାଉ ଆନ୍ଦୋଳନ ଥିଲା । ଶତାଧିକ କର୍ମୀ ଏକ ଶୋଭାଯାତ୍ରାରେ ବିଧାନସଭା ଘେରାଉ କରିବାକୁ ଆସୁଥିବା ବେଳେ ଲୋୟର ପିଏମଜିଠାରେ ପୁଲିସ ସେମାନଙ୍କୁ ଅଟକାଇବାକୁ ଉଦ୍ୟମ କରିଥିଲେ । ମାତ୍ର ଯୁବମୋର୍ଚ୍ଚା କର୍ମୀମାନେ ଏଥିରେ ହିଂସ୍ର ହୋଇ ପୁଲିସ ଉପରେ ଆକ୍ରମଣ କରିଥିଲେ । ବିକ୍ଷୋଭକାରୀଙ୍କ ଢ଼େଲାପଥର ମାଡ଼ରେ ଏସିପି ଅମିତାଭ ମହାପାତ୍ରଙ୍କ ସମେତ ୨୧ ପୁଲିସ ଗୁରୁତର ଆହତ ହୋଇଛନ୍ତି ।