ଶରଣକୂଳରୁ ଧରାପଡ଼ିଲେ ୩ ଅଭିଯୁକ୍ତ
ଭୁୁବନେଶ୍ୱର: ଘଟଣାଟି ଅବିଶ୍ୱନୀୟ, ହୃଦୟ ବିଦାରକ ଆଉ ଜଘନ୍ୟ । ପ୍ରବାସୀ ଭାରତୀୟ ସମ୍ମିଳନୀ ପାଇଁ ସମଗ୍ର ଭୁବନେଶ୍ୱର ପୁଲିସ ଛାଉଣି ହୋଇଥିବା ବେଳେ ସହରର ଛାତି ରସୁଲଗଡ଼ ଫ୍ଲାଇ ଓଭର୍ ଉପରେ ଜଣେ ଯୁବକଙ୍କୁ ଅତି ବିଭତ୍ସ ଭାବେ ହତ୍ୟା କରାଯାଇଛି । ସ୍କୁଟି ଚଲାଇ ଆସୁଥିବା ସେହି ଯୁବକଙ୍କୁ ଦୁବୃର୍ତ୍ତମାନେ ଖଣ୍ଡାରେ ହାଣି ମୁଣ୍ଡ- ଗଣ୍ଡି ଅଲଗା କରିଦେଇଥିଲେ । ରାସ୍ତା ଉପରେ ଠାଏ ଯୁବକଙ୍କ ମୁଣ୍ଡ ଏବଂ ଆଉ ଠାଏ ଯୁବକଙ୍କ ଗଣ୍ଡି ସହ ରକ୍ତର ସୁଅ ଛୁଟିଥିଲା । ସକାଳ ୮ଟା ବେଳେ ବିଚ୍ ଜନଗହଳିପୂର୍ଣ୍ଣ ରାସ୍ତାରେ ଏହି ବିଭତ୍ସ୍ୟ ଦୃଶ୍ୟ ଦେଖଣାହାରୀଙ୍କ ହୋସ୍ ଉଡ଼ାଇ ଦେଇଥିବା ବେଳେ ଦୁବୃର୍ତ୍ତମାନେ କିନ୍ତୁ ନିର୍ବିଘ୍ନରେ ଖସି ପଳାଇଥିଲେ । ଖବର ପାଇ ପୁଲିସ ସେଠାରେ ପହଞ୍ଚିଲା ବେଳକୁ ସବୁ ସରିଯାଇଥିଲା । କଡ଼ା ସୁରକ୍ଷା ବଳୟରେ ଥିବା ରାଜଧାନୀରେ ଆଜିର ଏହି ବିଭତ୍ସ୍ୟ ହତ୍ୟାକାଣ୍ଡ ସମସ୍ତଙ୍କୁ ବ୍ୟଥିତ କରିଛି ।
ବୀଭତ୍ସ ହତ୍ୟାର ଶିକାର ସେହି ଯୁବକ ହେଉଛନ୍ତି କେଦାରପଲ୍ଲୀ ବସ୍ତିର ସହଦେବ ନାୟକ ଓରଫ୍ ଢ଼େଗ । ଭୁବନେଶ୍ୱର ସଫେଇ କର୍ମଚାରୀ ସଂଘର ସାଧାରଣ ସମ୍ପାଦକ ରହିବା ସହ ପୁଲିସ ମିତ୍ର ଭାବେ କାର୍ଯ୍ୟ କରୁଥିଲେ ।
ଆଜି ସକାଳ ପ୍ରାୟ ୮ଟା ବେଳେ ସହଦେବ ତାଙ୍କ ସ୍କୁଟିରେ ବାଣୀବିହାର ପଟୁ ରସୁଲଗଡ଼ ଆଡ଼କୁ ଯାଉଥିଲେ । ରସୁଲଗଡ଼ ଫ୍ଲାଇ ଓଭର୍ ଉପରେ ଏକ ମଟରସାଇକେଲରେ ପିଛା କରୁଥିବା ଦୁଇଜଣ ଯୁବକ ତାଙ୍କୁ ଅତର୍କିତ ଭାବେ ଖଣ୍ଡାରେ ହାଣିଥିଲେ । ସେମାନଙ୍କ ଖଣ୍ଡାଚୋଟ ସିଧା ସହଦେବଙ୍କ ବେକରେ ପଡ଼ିବାରୁ ମୁଣ୍ଡ ଅଲଗା ହୋଇଯାଇଥିଲା । ଚଳନ୍ତା ସ୍କୁଟିରୁ ଖସିପଡ଼ିଥିଲା ମୁଣ୍ଡବିହୀନ ସହଦେବଙ୍କ ନିସ୍ତେଜ ଶରୀର । ଏହି ଜଘନ୍ୟ କାଣ୍ଡର ଖବର ପାଇ ପୁଲିସ ସେଠାରେ ପହଞ୍ଚିବା ପୂର୍ବରୁ ଦୁବୃର୍ତ୍ତମାନେ ସେଠାରୁ ଚମ୍ପଟ ମାରିସାରିଥିଲେ ।
କେଦାରପଲ୍ଲୀ ବସ୍ତିରେ ବ୍ରାଉନ୍ ସୁଗାର କାରବାର ସମ୍ପର୍କରେ ସହଦେବ ପୁଲିସକୁ ଖବର ଦେଉଥିଲେ । ଏଥିପାଇଁ ତାଙ୍କର ବହୁତ ଶତ୍ରୁ ସୃଷ୍ଟି ହୋଇଥିଲେ । ତାଙ୍କୁ ହତ୍ୟା କରିବାକୁ ପୂର୍ବରୁ ବାରମ୍ବାର ଧମକ ଦିଆଯାଉଥିବା ନେଇ ସହଦେବ ଗଣମାଧ୍ୟମକୁ ପୂର୍ବରୁ ସୂଚନା ଦେଇଥିଲେ । ତେବେ କଡ଼ା ସୁରକ୍ଷା ବଳୟ ଭିତରେ ଭୁବନେଶ୍ୱରରେ ପ୍ରବାସୀ ଭାରତୀୟ ସମ୍ମିଳନୀ ବେଳେ ଦୁର୍ବୃତ୍ତମାନେ ପୁଲିସକୁ ଚାଲେଂଜ ଦେଇ ବିଚ୍ ମୁଖ୍ୟରାସ୍ତାରେ ହତ୍ୟା କରିବା ସମସ୍ତଙ୍କୁ ସ୍ତମ୍ଭୀଭୂତ କରିଦେଇଛି ।
ସୂଚନାଯୋଗ୍ୟ, ପ୍ରବାସୀ ଭାରତୀୟ ସମ୍ମିଳନୀ ପାଇଁ ଗତକାଲିଠାରୁ ସମଗ୍ର ରାଜଧାନୀ ସହର ପୁଲିସ ଛାଉଣି ହୋଇଛି । ସମ୍ମିଳନୀ ଉଦଘାଟନ ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ରାତିରେ ପହଞ୍ଚୁଥିବାରୁ ସୁରକ୍ଷା ବ୍ୟବସ୍ଥା ଅଧିକ କଡ଼ାକଡ଼ି କରାଯାଇଛି । ୫୦୦ରୁ ଅଧିକ ପୁଲିସ ଅଧିକାରୀ ସୁରକ୍ଷା ଦାୟିତ୍ୱରେ ଅଛନ୍ତି । ୮୩ ପ୍ଲାଟୁନ୍ ପୁଲିସ ଫୋର୍ସ ଏବଂ ୧୧ କମ୍ପାନୀ କେନ୍ଦ୍ରୀୟ ଫୋର୍ସ ମୁତୟନ ଅଛନ୍ତି । ସହରର ଗଳିକନ୍ଦିରେ ପୁଲିସ ଭ୍ୟାନ୍ ପଇଁତରା ମାରୁଛି ।
ଏଭଳି ସମୟରେ ମୁଖ୍ୟରାସ୍ତାରେ ଜଣେ ଯୁବକଙ୍କୁ ଦୁବୃର୍ତ୍ତମାନେ ହତ୍ୟା କରି ମୁଣ୍ଡ ଗଣ୍ଡି ଅଲଗା କରିଦେବା ସମସ୍ତଙ୍କୁ ବିଚଳିତ କରୁଛି । ଏହା ଯେ ବିପର୍ଯ୍ୟସ୍ତ ଆଇନଶୃଙ୍ଖଳା ପରିସ୍ଥିତିକୁ ସୂଚାଉଛି ତାହା ସମସ୍ତେ ସ୍ୱୀକାର କରିବେ । ପୁଲିସ ପ୍ରତି ଅପରାଧୀଙ୍କର ସାମାନ୍ୟତମ ଭୟ ନ ଥିବା ଏହି ଘଟଣା ସୂଚେଇ ଦେଇଛି । ନିକଟରେ ଯାଜପୁର ଜିଲ୍ଲା ପାଣିକୋଇଲିଠାରେ ଏକ ସୁନାଦୋକାନ ଲୁଟ୍ କରିବାକୁ ଆସି ଅପରାଧୀମାନେ ଦୁଇଜଣ ନିରୀହ ଯୁବକଙ୍କୁ ହତ୍ୟା କରିବା ଘଟଣା ସମସ୍ତଙ୍କ ମନରେ ସତେଜ ଥିଲା ବେଳେ ଆଜି ରାଜଧାନୀର ବିଭତ୍ସ ହତ୍ୟା ଘଟଣା ଆତଙ୍କ ଖେଳାଇ ଦେଇଛି ।
ଶରଣକୂଳରୁ ଧରାପଡ଼ିଲେ ୩ ଅଭିଯୁକ୍ତ
ସହଦେବ ନାୟକଙ୍କୁ ବୀଭତ୍ସ ହତ୍ୟା କରି ଫେରାର ହୋଇଯାଇଥିବା ଦୁର୍ବୃତ୍ତ ଶେଷରେ କମିଶନରେଟ୍ ପୁଲିସର ସ୍ପେଶାଲ୍ ସ୍କ୍ୱାଡ୍ ହାତରେ ଧରାପଡ଼ିଛନ୍ତି । ନୟାଗଡ଼ ଜିଲ୍ଲା ଶରଣକୂଳ ବଜାରରୁ ଜଣେ ମହିଳାଙ୍କ ସମେତ ୩ ଜଣଙ୍କୁ ଗିରଫ କରାଯାଇଛି । ମହିଳା ଅଭିଯୁକ୍ତଙ୍କ ନାଁ ହେଉଛି ଲିପି ନାୟକ । ସେ ହତ୍ୟାକାଣ୍ଡର ମାଷ୍ଟର ମାଇଣ୍ଡ ହୋଇଥିବା ବେଳେ ଅନ୍ୟ ଦୁଇ ଯୁବକ ଲକ୍ଷ୍ମୀଧର ନାୟକ ଏବଂ ରକି ହେଉଛନ୍ତି ସୁପାରୀ କିଲର୍ । ଅଭିଯୁକ୍ତମାନେ ସମସ୍ତେ କେଦାରପଲ୍ଲୀ ବସ୍ତିର ।
ସୂଚନା ଅନୁଯାୟୀ, ଲିପି ନାୟକ ବ୍ରାଉନ୍ ସୁଗାର ବ୍ୟବସାୟରେ ସଂପୃକ୍ତ ଥିଲେ । ପୁଲିସ ମିତ୍ର ଭାବେ କାର୍ଯ୍ୟ କରୁଥିବାରୁ ସହଦେବ ତାହାକୁ ବିରୋଧ କରୁଥିଲେ ଏବଂ ପୁଲିସକୁ ଖବର ଦେଉଥିଲେ । ଏହି ଖବର ଆଧାରରେ ଲିପିକୁ ପୁଲିସ ଗିରଫ କରିଥିଲା । ଜାନୁଆରୀ ୫ ରେ ସେ ଜେଲରୁ ମୁକୁଳି ଥିଲେ । ତା’ ବ୍ୟବସାୟରେ ବାଧା ଦେଉଥିବାରୁ ସେ ସହଦେବକୁ ରାସ୍ତାରୁ ହଟାଇବା ପାଇଁ ଯୋଜନା କରିଥିଲା ଏବଂ ସେଥିପାଇଁ ଲକ୍ଷ୍ମୀଧର ଏବଂ ରକିଙ୍କୁ ନିୟୋଜିତ କରିଥିଲା । ଯୋଜନା ମୁତାବକ ଆଜି ସକାଳେ ସେମାନେ ଏକ ମଟରସାଇକେଲରେ ସହଦେବଙ୍କ ପିଛା କରି ରସୁଲଗଡ଼ ଫ୍ଲାଇଓଭର୍ ଉପରେ ହତ୍ୟା କରିଥିଲେ । ହତ୍ୟାକାଣ୍ଡ ପରେ ସେଇ ମଟରସାଇକେଲରେ ସମସ୍ତେ ଶରଣକୂଳ ପଳାଇଥିଲେ ।
