ଭୟଙ୍କର, ହୃଦୟ ବିଦାରକ ଦୁର୍ଘଟଣା

ବ୍ରହ୍ମପୁର/ଭୁବନେଶ୍ୱର: ବ୍ରହ୍ମପୁରଠାରୁ ୨୬ କିମି ଦୂର ଦିଗପହଣ୍ଡି ଅନ୍ତର୍ଗତ ଖେମୁଣ୍ଡି କଲେଜ ନିକଟରେ ଗତକାଲି ରାତି ଅଧରେ ଏକ ଭୟଙ୍କର ଦୁର୍ଘଟଣା ଘଟିଛି । ଦୁଇଟି ବସ୍ ମଧ୍ୟରେ ମୁହାଁମୁହିଁ ଧକ୍କା ଲାଗି ୧୨ ଜଣଙ୍କର ଜୀବନ ଚାଲିଯାଇଛି । ୮ ଜଣ ଗୁରତର ଆହତ ହୋଇଛନ୍ତି । ବ୍ରହ୍ମପୁରରେ ଏକ ବିବାହ ଉତ୍ସବରେ ଯୋଗଦେଇ କନ୍ୟାଯାତ୍ରୀ ଦଳ ବସ୍ ରେ ଫେରୁଥିବା ବେଳେ ଏହି ମର୍ମନ୍ତୁଦ ଦୁର୍ଘଟଣା ଘଟିଛି । ମୃତକଙ୍କ ମଧ୍ୟରେ ୬ ଜଣ ପୁରୁଷ, ୪ ଜଣ ମହିଳା ଏବଂ ୨ ଜଣ ଶିଶୁ ଅଛନ୍ତି । ସମସ୍ତେ ଗୋଟିଏ ପରିବାରର ବୋଲି ଜଣାପଡ଼ିଛି ।

ବାହାନଗା ରେଳ ଦୁର୍ଘଟଣାର ଭୟାନକ ସ୍ମୃତି ଲୋକଙ୍କ ମନରୁ ନ ଲିଭୁଣୁ ଏହି ମର୍ମନ୍ତୁଦ ଦୁର୍ଘଟଣା ରାଜ୍ୟବାସୀଙ୍କୁ ସ୍ତବ୍ଧ କରିଦେଇଛି । ପ୍ରଧାନମନ୍ତ୍ରୀ, ମୁଖ୍ୟମନ୍ତ୍ରୀ ଏହି ଦୁର୍ଘଟଣା ପାଇଁ ଗଭୀର ଦୁଃଖ ପ୍ରକାଶ କରିବା ସହ ମୃତକଙ୍କ ପରିବାରକୁ ଯଥାକ୍ରମେ ୨ ଲକ୍ଷ ଏବଂ ୩ ଲକ୍ଷ ଟଙ୍କା ସହାୟତା ଘୋଷଣା କରିଛନ୍ତି । ପ୍ରଧାନମନ୍ତ୍ରୀ ଆହତମାନଙ୍କ ଚିକିତ୍ସା ଖର୍ଚ୍ଚ ବାବଦରେ ୫୦ ହଜାର ଟଙ୍କା ସହାୟତା ଘୋଷଣା କରିଥିବା ବେଳେ ମୁଖ୍ୟମନ୍ତ୍ରୀ ମାଗଣା ଚିକିତ୍ସା ଯୋଗାଇ ଦେବାକୁ ନିର୍ଦ୍ଦେଶ ଦେଇଛନ୍ତି । ଏହି ଦୁର୍ଘଟଣାକୁ ନେଇ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଗଭୀର ଶୋକପ୍ରକାଶ କରିବା ସହ ଶୋକସନ୍ତପ୍ତ ପରିବାରବର୍ଗଙ୍କୁ ସମବେଦନା ଜଣାଇଛନ୍ତି ।

ଗଞ୍ଜାମ ଜିଲ୍ଲା ପାଟପୁର ଥାନା ଅନ୍ତର୍ଗତ ଖଣ୍ଡଦେଉଳି ଗ୍ରାମର ସ୍ୱର୍ଗତ ଅଶୋକ ପ୍ରଧାନଙ୍କ ମଝିଆ ଝିଅ ସୋନେଲିଙ୍କ ସହ ବ୍ରହ୍ମପୁର ବ୍ରହ୍ମାନଗରର ଉମେଶଙ୍କର ଗତକାଲି ବିବାହ ହୋଇଥିଲା । ଖଣ୍ଡଦେଉଳିରେ ବିବାହ କାର୍ଯ୍ୟ ସମ୍ପନ୍ନ ହେଲା ପରେ ଅପରାହ୍ନ ପ୍ରାୟ ୫ଟାରେ କନ୍ୟା ଶାଶୁଘର ଯାଇଥିଲେ । ବିଦା ଭାର ନେଇ ଝିଅ ଘରର ୩୦ ଜଣ ଏକ ମିନି ବସ୍(ଓଆର୍ ୧୦ଏ ୬୮୭୫) ରେ ବ୍ରହ୍ମପୁର ଯାଇଥିଲେ । ସେଠାରେ ଭୋଜିଭାତ ଖାଇ ଗାଁକୁ ଫେରୁଥିଲେ । ଆଉ ୭ କିଲୋମିଟର ପରେ ଗାଁରେ ପହଞ୍ଚିଥାନ୍ତେ । ମାତ୍ର ବିଧିର ବିଧାନ ଥିଲା ଅଲଗା ।

ରାତି ପ୍ରାୟ ଗୋଟାଏ ବେଳେ ଦୁର୍ଘଟଣା ଚାହିଁ ବସିଥିଲା । କନ୍ୟାଯାତ୍ରୀ ଦଳକୁ ନେଉଥିବା ମିନି ବସ୍ ଟି ଦିଗପହଣ୍ଡି ଥାନା ଅନ୍ତର୍ଗତ ଖେମୁଣ୍ଡି କଲେଜ ଛକ ପାର ହୋଇ ମଳାଭଞ୍ଜା ନିକଟରେ ପହଞ୍ଚିଥିଲା ବେଳେ ବିପରୀତ ଦିଗରୁ ଦ୍ରୁତ ଗତିରେ ଆସୁଥିବା ଗୁଡ଼ାରୀ- ଭୁବନେଶ୍ୱର ଓଏସଆରଟିସି ବସ୍ ( ଓଡି୦୨ବିୱାଇ-୧୯୩୮) ସହ ମୁହାଁମୁହିଁ ହୋଇଥିଲା । ଦୁର୍ଘଟଣା ଏତେ ଭୟଙ୍କ ଥିଲା ଯେ ମିନି ବସ୍ ଟି କୁଚୁକୁଚା ହୋଇଯାଇଥିଲା । ବସ୍ ରେ ଚାପି ହୋଇ କିଛି ଯାତ୍ରୀଙ୍କର ଶରୀର ଖଣ୍ଡ ବିଖଣ୍ଡ ଓ ବିଭତ୍ସ ହୋଇଯାଇଥିଲା । ଆହତମାନଙ୍କ ଚିକ୍ରାର ଶୁଣି ସ୍ଥାନୀୟ ଅଞ୍ଚଳବାସୀ ପହଞ୍ଚି ଉଦ୍ଧାର କାର୍ଯ୍ୟରେ ଲାଗିବା ସହ ପୁଲିସକୁ ଖବର ଦେଇଥିଲେ । ଦୀର୍ଘ ୪ ଘଣ୍ଟା ଧରି ଉଦ୍ଧାର କାର୍ଯ୍ୟ ଚାଲିଥିଲା । ଦୁର୍ଘଟଣାସ୍ଥଳରୁ ହିଁ ୧୨ ଜଣଙ୍କ ଶବ ଉଦ୍ଧାର କରାଯାଇଥିଲା ।

୮ ଜଣ ଗୁରୁତରଙ୍କୁ ବ୍ରହ୍ମପୁର ଏମକେସିଜି ମେଡିକାଲ୍ କୁ ପଠାଯାଇଥିଲା । ଜଣଙ୍କର ଅବସ୍ଥା ସଙ୍କଟାପନ୍ନ ହୋଇପଡ଼ିବାରୁ ତାଙ୍କୁ କଟକ ଏସସିବି ମେଡିକାଲ୍ କଲେଜ ଓ ହସ୍ପିଟାଲ୍ ରେ ସ୍ଥାନାନ୍ତର କରାଯାଇଛି । ଅନ୍ୟ ୬ ଜଣ ଆହତଙ୍କୁ ପ୍ରାଥମିକ ଚିକିତ୍ସା ପରେ ଘରକୁ ଛାଡ଼ି ଦିଆଯାଇଛି ।

ମୃତକଙ୍କ ମଧ୍ୟରେ କନ୍ୟା ସୋନାଲିଙ୍କ ସାନ ଭଉଣୀ ରୂପାଲି(୨୩) ଅଛନ୍ତି । ଦୁର୍ଘଟଣାର କିଛି ଘଣ୍ଟା ପୂର୍ବରୁ ଭଉଣୀର ବିବାହ ବେଦୀରେ ସେ ହାତଗଣ୍ଠି ଫିଟାଇ ଥିଲେ । ପ୍ରାଣ ହରାଇଥିବା ଅନ୍ୟମାନେ ହେଲେ ଖଣ୍ଡଦେଉଳି ଗାଁର ଶିବାନୀ ପ୍ରଧାନ(୨୫), ସୀତାରାମ ପ୍ରଧାନ(୬୦), ସୁଜ୍ଞାନୀ କୁମାରୀ ପ୍ରଧାନ(୩୧), ରମେଶ ପ୍ରଧାନ(୬୨), ତ୍ରିପତି ପ୍ରଧାନ(୪୮), ଗଡ଼ଗୋବିନ୍ଦପୁରର ସଙ୍ଗୀତା ଡାକୁଆ(୩୨), ସିଙ୍ଗିପୁର ପାଟପୁରର ଲିଟୁ ନାୟକ(୪୦), ମୁଜାଗଡ଼ର ସଞ୍ଜୟ ମେଦିନୀ ରାୟ(୫୦), ଶୁଭେନ୍ଦୁ ପ୍ରଧାନ(୩୨), ଦେବାଂଶୁ ପ୍ରଧାନ(୩) ଏବଂ ହାର୍ଦ୍ଦିକ(୧) ।

ଦୁର୍ଘଟଣାଗ୍ରସ୍ତ ମିନି ବସ୍ ଟି ୨୫ ବର୍ଷର ଏକ ଦଦରା ଗାଡ଼ି । ମାତ୍ର ଏହାର ଫିଟନେସ୍ ସାର୍ଟିଫିକେଟ୍ ଥିବା ସମସ୍ତଙ୍କୁ ଆଶ୍ଚର୍ଯ୍ୟ କରିଛି । ତେବେ ରାତିରେ ଗାଡ଼ି ଚାଲିବାର ଅନୁମତି ନ ଥିଲା କି ଇନସୁରାନ୍ସ ସାର୍ଟିଫିକେଟ୍ ନ ଥିଲା ବୋଲି ବ୍ରହ୍ମପୁର ଆରଟିଓ କହିଛନ୍ତି । ସଂପୃକ୍ତ ବସ୍ ମାଲିକଙ୍କ ବିରୋଧରେ କାର୍ଯ୍ୟାନୁଷ୍ଠାନ ହେବ ବୋଲି ସେ କହିଛନ୍ତି ।

ଅନ୍ୟପକ୍ଷରେ ଦୁର୍ଘଟଣା ଘଟାଇଥିବା ଓଏସଆରଟିସି ଡ୍ରାଇଭର ମାନସ ପ୍ରଧାନଙ୍କୁ ଭୁବନେଶ୍ୱର ବରମୁଣ୍ଡା ବସଷ୍ଟାଣ୍ଡରୁ ଗିରଫ କରାଯାଇଛି । ଦୁର୍ଘଟଣା ଘଟାଇବା ପରେ ସେ ଅନ୍ୟ ଏକ ବସ୍ ରେ ଭୁବନେଶ୍ୱର ପଳାଇ ଆସିଥିଲା । ଭରତପୁର ପୁଲିସ ତାକୁ ଗିରଫ କରି ଦିଗପହଣ୍ଡି ନେଇଛି ।