ଭୁୁବନେଶ୍ୱର: ‘ସମ୍ବାଦ’ ପ୍ରଥମ ପୃଷ୍ଠାର ପ୍ରିୟ କାର୍ଟୁନ୍ ସ୍ତମ୍ଭ ‘କଟାକ୍ଷ’ ର କିଶୋର ଆଉ ନାହାନ୍ତି । ଓଡ଼ିଶାର ପୁରପଲ୍ଲୀରେ କଟାକ୍ଷ କିଶୋର ଭାବେ ଜଣାଶୁଣା ଏହି ପ୍ରଖ୍ୟାତ କାର୍ଟୁନିଷ୍ଟ କିଶୋର ରଥ ସମସ୍ତଙ୍କୁ ଛାଡ଼ି ଚିରଦିନ ପାଇଁ ବିଦାୟ ନେଇଛନ୍ତି । ଶୋଇବା ଅବସ୍ଥାରେ ଆଜି ବଡ଼ି ସକାଳୁ ସେ ହୃଦଘାତର ଶିକାର ହୋଇଥିଲେ । ତାଙ୍କୁ ତୁରନ୍ତ କ୍ୟାପିଟାଲ୍ ହସ୍ପିଟାଲ୍ ଅଣାଯାଇଥିଲା । ମାତ୍ର ଡାକ୍ତର ମୃତ ଘୋଷଣା କରିଥିଲେ । ତାଙ୍କୁ ୫୮ ବର୍ଷ ହୋଇଥିଲା ।
ସମସ୍ତଙ୍କର ପ୍ରିୟ କିଶୋର ରଥଙ୍କର ଅଚାନକ ଏହି ଦାରୁଣ ଖବର ବିଭିନ୍ନ ମହଲକୁ ସ୍ତବ୍ଧ କରିଦେଇଛି । ତାଙ୍କର ମୃତ୍ୟୁ ଖବର ପ୍ରଚାରିତ ହେଲା ପରେ କ୍ୟାପିଟାଲ୍ ହସ୍ପିଟାଲ୍ ଏବଂ ବରମୁଣ୍ଡାସ୍ଥିତ ତାଙ୍କ ଘରକୁ ଲୋକଙ୍କ ସୁଅ ଛୁଟିଛି ।
ନୟାଗଡ଼ ଜିଲ୍ଲା ଖଣ୍ଡପଡ଼ାରେ ଜନ୍ମ ଗ୍ରହଣ କରିଥିବା କିଶୋରଙ୍କର ପିଲାଦିନରୁ କାର୍ଟୁନ୍ ପ୍ରତି ବିଶେଷ ଝୁଙ୍କ୍ ଥିଲା । ପାଠପଢ଼ା ସରିବା ପରେ ପରବର୍ତ୍ତୀ ସମୟରେ ସେ ସମ୍ବାଦରେ କ୍ୟାରିୟର୍ ଆରମ୍ଭ କରିଥିଲେ । ତାଙ୍କର କୃତିତ୍ୱ ପାଇଁ ସାରା ରାଜ୍ୟବାସୀଙ୍କ ହୃଦୟରେ ସ୍ୱତନ୍ତ୍ର ସ୍ଥାନ ହାସଲ କରିଥିଲେ ।
