ଭୁବନେଶ୍ୱର: ରାଜଧାନୀର ପ୍ରମୁଖ କୋଚିଂ ସେଣ୍ଟର ‘ବଣିକ’ ଉପରେ କ୍ରାଇମବ୍ରାଞ୍ଚ ରେଡ୍ । ସିଆରପି ଛକରେ ଥିବା ମୁଖ୍ୟ ସେଣ୍ଟରରେ ପଶିଛନ୍ତି କ୍ରାଇମବ୍ରାଞ୍ଚ ଟିମ୍ । ପୁଲିସ ଏସଆଇ ନିଯୁକ୍ତି ଘୋଟାଲାରେ ‘ବଣିକ’ ର ସଂପୃକ୍ତି ଅଭିଯୋଗରେ ଏହି ଚଢ଼ଉ ହୋଇଛି । ଆନ୍ଧ୍ରପ୍ରଦେଶର ବିଜୟନଗରମ୍ ଯିବା ବାଟରେ ଗିରଫ ହୋଇଥିବା ୧୧୪ ପରୀକ୍ଷାର୍ଥୀଙ୍କ ମଧ୍ୟରୁ କିଛି ‘ବଣିକ’ ର ଥିବାରୁ ଚାକିରି ଫିକ୍ସିଂ ରାକେଟ୍ ରେ ଅନୁଷ୍ଠାନର ସଂପୃକ୍ତି ସନ୍ଦେହ କରାଯାଉଛି । ‘ବଣିକ’ ର ବିଗତ ୫ ବର୍ଷର ରେକର୍ଡ ଯାଞ୍ଚ କରୁଛି କ୍ରାଇମବ୍ରାଞ୍ଚ ।
ପୁଲିସ ଏସଆଇ ନିଯୁକ୍ତି କେଳେଙ୍କାରୀରେ ବ ର୍ତ୍ତମାନ ସୁଦ୍ଧା ୧୧୯ ଜଣ ଗିରଫ ହୋଇଛନ୍ତି । କ୍ରାଇମବ୍ରାଞ୍ଚ ମାମଲାର ତଦନ୍ତ କରୁଛି । କେଳେଙ୍କାରୀର ମୁଖ୍ୟ କୁହାଯାଉଥିବା ପଞ୍ଚସଫ୍ଟ ଟେକ୍ନୋଲୋଜି ପ୍ରାଇଭେଟ୍ ଲିମିଟେଡର ମାଲିକ ଶଙ୍କର ପୃଷ୍ଟି ଫେରାର ଥିବା ବେଳେ ଏହି ରାକେଟ୍ ରେ ବଣିକ କୋଚିଂ ସେଣ୍ଟରର ଭୂମିକା ଉପରେ ମଧ୍ୟ ଅଙ୍ଗୁଳି ଉଠିଛି । ଏହାର ମାଲିକ ବିଜେଡି ନେତା ସୁବ୍ରତ ଛାଟୋଇ ଅନ୍ୟତମ କିଙ୍ଗପିନ୍ ବୋଲି କଂଗ୍ରେସ ଓ ବିଜେପି ପକ୍ଷରୁ ଅଭିଯୋଗ ହୋଇଛି । ଧରାପଡ଼ିଥିବା ୧୧୪ ପରୀକ୍ଷାର୍ଥୀଙ୍କ ମଧ୍ୟରେ ବଣିକ ଅନୁଷ୍ଠାନର ୧୪ ଜଣ ଥିବା ତଦନ୍ତକାରୀ ସଂସ୍ଥା କ୍ରାଇମବ୍ରାଞ୍ଚ ପାଖରେ ସୂଚନା ଅଛି ।
ଏହି ସୂଚନା ଆଧାରରେ କ୍ରାଇମବ୍ରାଞ୍ଚ ଡିଏସପି ନରେନ୍ଦ୍ର ବେହେରାଙ୍କ ନେତୃତ୍ୱରେ ଆଜି ବଣିକ ଉପରେ ଚଢ଼ଉ ହୋଇ କାଗଜପତ୍ର ଯାଞ୍ଚ ହେଉଛି । ଧରାପଡ଼ିଥିବା ଏହି ସଂସ୍ଥାର ପରୀକ୍ଷାର୍ଥୀମାନଙ୍କୁ କିଏ ଯୋଗାଯୋଗ କରିଥିଲା ଏବଂ ସେମାନଙ୍କୁ ଆନ୍ଧ୍ରପ୍ରଦେଶ ନେବା ପଛରେ କାହାର ହାତ ଥିଲା ତାହାର ଖୋଳତାଡ଼ ଚାଲିଛି । ପ୍ରାଥମିକ ଅନୁସନ୍ଧାନ ପରେ ପଞ୍ଚସଫ୍ଟ ମୁଖ୍ୟ ଶଙ୍କର ପୃଷ୍ଟିଙ୍କର ବଣିକ ମାଲିକ ଶ୍ରୀ ଛାଟୋଇଙ୍କ ସହ ସମ୍ପର୍କ ନେଇ ଗଣମାଧ୍ୟମକୁ ସୂଚନା ଦେଇଛନ୍ତି କ୍ରାଇମବ୍ରାଞ୍ଚ ଡିଏସପି । ତଦନ୍ତ ପରେ ସବିଶେଷ ତଥ୍ୟ ଦିଆଯିବ ବୋଲି ସେ କହିଛନ୍ତି ।
ଅନ୍ୟପକ୍ଷରେ ବଣିକ ମାଲିକ ସୁବ୍ରତ ଛାଟୋଇ ଅଭିଯୋଗ ସବୁକୁ ଖଣ୍ଡନ କରିଛନ୍ତି । ଏସଆଇ ନିଯୁକ୍ତି କାରବାରରେ ତାଙ୍କ ସଂସ୍ଥାର କୌଣସି ସଂପୃକ୍ତି ନାହିଁ ବୋଲି ସେ ଦୃଢ଼ତାର ସହ କହିଛନ୍ତି । ତାଙ୍କ ବିରୋଧରେ ଆସିଥିବା ଅଭିଯୋଗ ରାଜନୈତିକ ଉଦ୍ଦେଶ୍ୟ ପ୍ରଣୋଦିତ ବୋଲି ସେ କହିଛନ୍ତି । ଯଦି ଧରାପଡ଼ିଥିବା ପରୀକ୍ଷାର୍ଥୀଙ୍କ ମଧ୍ୟରୁ ୧୨ ଜଣ ‘ବଣିକ’ ର ତେବେ ଅନ୍ୟମାନେ କେଉଁ ଅନୁଷ୍ଠାନର? ସେ ସମ୍ପର୍କରେ ସମସ୍ତେ ଚୁପ୍ କାହିଁକି ବୋଲି ସେ ପ୍ରଶ୍ନ କରିଛନ୍ତି । ପିଲାଙ୍କ ଉଜ୍ଜଳ ଭବିଷ୍ୟତ ଗଢ଼ିବା ଲକ୍ଷ୍ୟ ନେଇ ଦୀର୍ଘ ୧୨ ବର୍ଷ ଧରି ତାଙ୍କ ଅନୁଷ୍ଠାନ କାମ କରୁଛି । ରାଜନୈତିକ ଉଦ୍ଦେଶ୍ୟ ରଖି ଏହି ସୁନାମଧନ୍ୟ ଅନୁଷ୍ଠାନକୁ ବଦନାମ କରା ନ ଯାଉ ବୋଲି ସେ କହିଛନ୍ତି ।
