ଭୁବନେଶ୍ୱର: ସୋସିଆଲ ମିଡିଆ ଦୁଇ ପଟ ଧାର ଥିବା ଖଣ୍ଡା ପରି । ନିଜର ସ୍ୱପ୍ନ ପୂରଣ କରିବାରେ ଏହା ସହାୟକ ହୋଇପାରିବ । କିନ୍ତୁ ଏଥିରେ ଅଧିକ ସମୟ ନଷ୍ଟ କରିବା ଉଚିତ୍ ନୁହେଁ ।
ଆଜି ଗଜପତି ଜିଲ୍ଲାରେ ଆୟୋଜିତ ନୂଆ-ଓ କାର୍ଯ୍ୟକ୍ରମରେ ଛାତ୍ରଛାତ୍ରୀଙ୍କୁ ସଫଳତାର ଟିପ୍ସ ଦେବାକୁ ଯାଇ ଏକଥା କହିଛନ୍ତି ୫-ଟି ଓ ନବୀନ ଓଡ଼ିଶା ଅଧ୍ୟକ୍ଷ ଭ. କାର୍ତ୍ତିକ ପାଣ୍ଡିଆନ୍ । ସେ କହିଛନ୍ତି, ଜୀବନରେ ସଫଳତା ପାଇବାକୁ ହେଲେ ପାଠପଢ଼ା ଯେତିକି ଗୁରୁତ୍ୱପୂର୍ଣ୍ଣ ନିଜର ବ୍ୟକ୍ତିତ୍ୱର ବିକାଶ ମଧ୍ୟ ସେତିକି ଜରୁରୀ । ବ୍ଲକ୍, ଜିଲ୍ଲା କିମ୍ବା ରାଜ୍ୟସ୍ତରୀୟ ପ୍ରତିଯୋଗିତାରେ ଜିତିବା ଅପେକ୍ଷା ଭାଗ ନେଇ ନିଜର ପ୍ରତିଭା ପ୍ରଦର୍ଶନ ଗୁରୁତ୍ୱପୂର୍ଣ୍ଣ । କାରଣ ପ୍ରତିଯୋଗିତାରେ ଜିତିଲେ ଖୁସି ଲାଗେ । ମାତ୍ର ଭାଗ ନେଲେ ଅନେକ କିଛି ଶିକ୍ଷା ମିଳିଥାଏ । ଏହି ଶିକ୍ଷା ଛାତ୍ରଛାତ୍ରୀଙ୍କ ଆତ୍ମବିଶ୍ୱାସ ବୃଦ୍ଧିରେ ସହାୟକ ହେବ ।
ବଡ଼ ବଡ଼ ସହରର ବଡ଼ ବଡ଼ କଲେଜରେ ପାଠ ପଢ଼ୁଥିବା ପିଲାଙ୍କ ପରି ଗଜପତିର ଛାତ୍ରଛାତ୍ରୀଙ୍କୁ ଆଧୁନିକ ଓ ଉନ୍ନତ ଶିକ୍ଷାଦାନର ସୁଯୋଗ ଦେବାକୁ ସବୁ କଲେଜର ରୂପାନ୍ତରଣ କାର୍ଯ୍ୟ ଚାଲିଛି । ଗଜପତିର ସମସ୍ତ ୧୭ଟି କଲେଜ ୫-ଟି ରୂପାନ୍ତରଣରେ ସାମିଲ ହୋଇଛି । ଆସନ୍ତା ମାର୍ଚ୍ଚ ସୁଦ୍ଧା ଏହି ରୂପାନ୍ତରଣ କାର୍ଯ୍ୟ ସରିବ । ଏହାଦ୍ୱାରା ଛାତ୍ରଛାତ୍ରୀମାନେ ସ୍ମାର୍ଟ କ୍ଲାସରୁମ୍, ଇ-ଲାଇବ୍ରେରୀ, ସ୍ମାର୍ଟ ଲାବ୍ ସୁବିଧା ପାଇବେ । ସେମାନେ ବି ବଡ଼ ବଡ଼ କଲେଜର ପିଲାଙ୍କ ପରି ସ୍ୱପ୍ନ ଦେଖିପାରିବେ ।
ଛାତ୍ରଛାତ୍ରୀଙ୍କ ମଧ୍ୟରେ ଆତ୍ମବିଶ୍ୱା ବୃଦ୍ଧି କରିବାକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନୂଆ-ଓ କାର୍ଯ୍ୟକ୍ରମ ଆରମ୍ଭ କରିଛନ୍ତି । ଛାତ୍ରଛାତ୍ରୀଙ୍କ ମଧ୍ୟରେ ଥିବା ପ୍ରତିଭାର ବିକାଶ ପାଇଁ ଏକ ମାଧ୍ୟମ । ଏହା ପ୍ରତିବର୍ଷ ଆୟୋଜନ କରାଯିବ । ଶିକ୍ଷାର୍ଥୀମାନେ ନିଜର ଆଭ୍ୟନ୍ତରୀଣ ପ୍ରତିଭାର ବିକାଶ ପାଇଁ ସବୁବେଳେ ଉଦ୍ୟମ କରିବା ଉଚିତ୍ । କାରଣ ଏହାଦ୍ୱାରା ସେମାନଙ୍କ ମଧ୍ୟରେ ଆତ୍ମବିଶ୍ୱାସ ବୃଦ୍ଧି ପାଇବ ବୋଲି କହିଥିଲେ ଶ୍ରୀ ପାଣ୍ଡିଆନ୍ ।
ମୁଖ୍ୟମନ୍ତ୍ରୀଙ୍କ କଥା କମ୍, କାମ ବେଶୀ: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କଥା କମ୍, କାମରେ ଅଧିକ ବିଶ୍ୱାସ କରନ୍ତି । ଯେଉଁଥିପାଇଁ ଗତ ୭ ମାସରେ କେବଳ ଗଜପତି ଜିଲ୍ଲାର ବିଭିନ୍ନ ପ୍ରକଳ୍ପ ପାଇଁ ମିଳିଛି ୨୭୯ କୋଟି ଟଙ୍କା । ଆଜି ଗଜପତି ଗସ୍ତରେ ଯାଇଥିବା ୫-ଟି ଏବଂ ନବୀନ ଓଡ଼ିଶା ଅଧ୍ୟକ୍ଷ କାର୍ତ୍ତିକ ପାଣ୍ଡିଆନ୍ ମୋହନା ନିର୍ବାଚନମଣ୍ଡଳୀର ରାମଗିରିଠାରେ ଆୟୋଜିତ ଏକ ସାଧାରଣ ସଭାକୁ ସମ୍ବୋଧିତ କରି ଏହା କହିଛନ୍ତି ।
ମୋହନା ବିଧାନସଭା କ୍ଷେତ୍ରର ବିକାଶ ପାଇଁ ମୁଖ୍ୟମନ୍ତ୍ରୀ ମଞ୍ଜୁର କରିଥିବା ବିଭିନ୍ନ ପ୍ରକଳ୍ପର ହିସାବ ଦେଇଥିଲେ । ଗତ ମେ ମାସରେ ତାଙ୍କର ଗସ୍ତ ବେଳେ ୪୨୫ ଟି ଦରଖାସ୍ତ ମିଳିଥିଲା । ସେଥିମଧ୍ୟରୁ ୩୮୦ ଟି ଦରଖାସ୍ତର ସମାଧାନ ହୋଇଛି ବୋଲି ପାଣ୍ଡିଆନ୍ ସୂଚନା ଦେଇଥିଲେ । ମହେନ୍ଦ୍ରତନୟା ଉପରେ କରଡ଼ାସିଙ୍ଗିଠାରେ ସେତୁ ପାଇଁ ୧୯ କୋଟି ଟଙ୍କା ମଞ୍ଜୁର ହୋଇଛି । ୭ଟି ଜଳପ୍ରପାତର ଉନ୍ନତିକରଣ ପାଇଁ ଅର୍ଥ ମଞ୍ଜୁର ହୋଇଛି । ୫ଟି ସ୍କୁଲରେ ହଷ୍ଟେଲ ନିର୍ମାଣ ପାଇଁ ୧୮ କୋଟି ମଞ୍ଜର ହୋଇଛି ।
ଏହି ଗସ୍ତ ଅବସରରେ ଶ୍ରୀ ପାଣ୍ଡିଆନ ଜିଲ୍ଲାରେ କାର୍ଯ୍ୟକାରୀ ହେଉଥିବା ବିଭିନ୍ନ ପ୍ରକଳ୍ପର ସମୀକ୍ଷା କରିଥିଲେ ।
