ଭୁବନେଶ୍ୱର: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନିର୍ଦ୍ଦେଶକ୍ରମେ ଆଜି ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ର ଏବଂ ୫-ଟି ସଚିବ ଭି.କେ.ପାଣ୍ଡିଆନ୍ କଳାହାଣ୍ଡି ଗସ୍ତ କରିଥିଲେ । ସାଙ୍ଗରେ ଥିଲେ ଜାତୀୟ ସ୍ୱାସ୍ଥ୍ୟ ମିଶନ୍ ଏମଡି ଶ୍ରୀମତୀ ଶାଳିନୀ ପଣ୍ଡିତ, ମୁଖ୍ୟମନ୍ତ୍ରୀଙ୍କ ସ୍ୱତନ୍ତ୍ର ସଚିବ ଭିନୀଲ୍ କ୍ରିଷ୍ଣା । ଜିଲ୍ଲାରେ ସମ୍ଭାବ୍ୟ ତୃତୀୟ ଲହର ପ୍ରସ୍ତୁତିର ତଦାରଖ କରିବା ସହିତ ସ୍ୱାସ୍ଥ୍ୟସେବା, ଜଳସେଚନ ଏବଂ ଶିକ୍ଷା ଭଳି ବିଭିନ୍ନ ବିକାଶମୂଳକ କାର୍ଯ୍ୟକ୍ରମର ସମୀକ୍ଷା କରିଥିଲେ ।
ଭବାନୀପାଟଣାର ଉତ୍କେଳା ଏୟାରଷ୍ଟ୍ରିପ୍ ରେ ହେଲିକପ୍ଟର୍ ଅବତରଣ କରିବା ପରେ ମୁଖ୍ୟ ଶାସନ ସଚିବ ଶ୍ରୀ ମହାପାତ୍ର ଏବଂ ୫-ଟି ସଚିବ ଶ୍ରୀ ପାଣ୍ଡିଆନ୍ ପ୍ରଥମେ ଏୟାରଷ୍ଟ୍ରିପ୍ ର ସ୍ଥିତି ଏବଂ ଚାଲୁ ରହିଥିବା ବିକାଶମୂଳକ କାର୍ଯ୍ୟର ସମୀକ୍ଷା କରିଥିଲେ । ଭବାନୀପାଟଣାରୁ ଭୁବନେଶ୍ୱର ଏବଂ ରାୟପୁରକୁ ବିମାନ ସେବା(କମର୍ସିଆଲ୍) ଖୁବ୍ ଶୀଘ୍ର ଆରମ୍ଭ ହେବ ବୋଲି ଜଣାପଡ଼ିଛି ।
ତାହାପରେ ସେମାନେ ଭବାନୀପାଟଣା ମେଡ଼ିକାଲ୍ କଲେଜ ଏବଂ ୬୫୦ ଶଯ୍ୟା ଟିଚିଂ ହସ୍ପିଟାଲ୍ ନିର୍ମାଣ ଜାଗା ବୁଲି ଦେଖିବା ସହ କାର୍ଯ୍ୟର ଅଗ୍ରଗତି ସମ୍ପର୍କରେ ସମୀକ୍ଷା କରିଥିଲେ । ୨୦୨୧ ଡିସେମ୍ବର ସୁଦ୍ଧା ଏହାର ନିର୍ମାଣ କାର୍ଯ୍ୟ ଶେଷ କରିବାକୁ ସମୟ ଧାର୍ଯ୍ୟ କରାଯାଇଥିବାରୁ ଧାର୍ଯ୍ୟ ସମୟରୁ ଯେଭଳି ବିଳମ୍ବ ନହୁଏ ସେଥିପ୍ରତି ସଜାଗ କରିଥିଲେ ଶ୍ରୀ ପାଣ୍ଡିଆନ୍ । କୌଣସି ନିମ୍ନମାନର କାର୍ଯ୍ୟ ବରଦାସ୍ତ କରାଯିବ ନାହିଁ ବୋଲି ସତର୍କ କରିଦେଇଥଲେ ।
ପରେ ଅନୁଷ୍ଠିତ ସମୀକ୍ଷା ବୈଠକରେ ସମ୍ଭାବ୍ୟ ତୃତୀୟ ଲହର ପ୍ରସ୍ତୁତି ସମ୍ପର୍କରେ ଅବଗତ କରିଥିଲେ ଜିଲ୍ଲାପାଳ । ଏହାପରେ ଜିଲ୍ଲାରେ କାର୍ଯ୍ୟକାରୀ ହେଉଥିବା ବିଭିନ୍ନ ବିକାଶମୂଳକ ପ୍ରକଳ୍ପର ସମୀକ୍ଷା କରିଥିଲେ ମୁଖ୍ୟ ଶାସନ ସଚିବ ଏବଂ ୫-ଟି ସଚିବ ।
ପ୍ରକଳ୍ପ କେସିଙ୍ଗା-ବଲାଙ୍ଗୀର ୨୨୦ କେଭି ରେଳଲାଇନ୍ ପ୍ରକଳ୍ପ ପାଇଁ ଆବଶ୍ୟକୀୟ କ୍ଲିୟରାନ୍ସ ପ୍ରକ୍ରିୟା ଯଥାଶୀଘ୍ର ସାରିବାକୁ ଓପିଟିସିଏଲ୍ ଏବଂ ଜଙ୍ଗଲ ବିଭାଗ ଅଧିକାରୀମାନଙ୍କୁ ମୁଖ୍ୟ ଶାସନ ସଚିବ ନିର୍ଦ୍ଦେଶ ଦେଇଥିଲେ । ସେହିଭଳି ମୁଖ୍ୟମନ୍ତ୍ରୀଙ୍କ ଦ୍ୱାରା ନିକଟରେ ଉଦଘାଟିତ ଇନ୍ଦ୍ରାବତୀ ମେଗା ଜଳସେଚନ ପ୍ରକଳ୍ପ ଦ୍ୱାରା ଜନସାଧାରଣ କିଭଳି ଉପକୃତ ହେଉଛନ୍ତି ଶ୍ରୀ ପାଣ୍ଡିଆନ୍ ତାହା ପଚାରି ବୁଝିଥିଲେ । ସମସ୍ତ ହିତାଧିକାରୀମାନେ ଯେଭଳି ଏହାର ସୁବିଧା ପାଆନ୍ତି ସେଥିପ୍ରତି ଦୃଷ୍ଟିଦେବାକୁ ଜିଲ୍ଲାପାଳଙ୍କୁ ପରାମର୍ଶ ଦେଇଥିଲେ । ବୈଠକରେ ଏମ. ରାମପୁରଠାରେ ସାନ୍ଦୁଲ ଜଳସେଚନ ପ୍ରକଳ୍ପ ସମେତ ଜିଲ୍ଲାରେ ଅନ୍ୟାନ୍ୟ ମେଗା ଉଠା ଜଳସେଚନ ପ୍ରକଳ୍ପଗୁଡ଼ିକର ସମୀକ୍ଷା କରାଯାଇଥିଲା ।
ଭବାନୀପାଟଣାରେ ନୂଆ ବସଷ୍ଟାଣ୍ଡ କାର୍ଯ୍ୟ ସମୀକ୍ଷା କରାଯାଇ ୬ ମାସରେ ଶେଷ କରିବାକୁ ନିର୍ଦ୍ଦେଶ ଦିଆଯାଇଥିଲା । ନର୍ଲା ଲୋକୋ ସେଡ୍ ପ୍ରକଳ୍ପ ପାଇଁ ଜମି ଅଧିଗ୍ରହଣ ଏବଂ ଜଙ୍ଗଲ କ୍ଲିୟରାନ୍ସ କାର୍ଯ୍ୟ ଯଥାଶୀଘ୍ର ଶେଷ କରିବାକୁ ଜିଲ୍ଲାପାଳଙ୍କୁ କୁହାଯାଇଥିଲା ।
ମୁଖ୍ୟ ଶାସନ ସଚିବ ଶ୍ରୀ ମହାପାତ୍ର, ୫-ଟି ସଚିବ ଶ୍ରୀ ପାଣ୍ଡିଆନ୍ ଏବଂ ଟିମ୍ ଭବାନୀପାଟଣାସ୍ଥିତ ଟାଉନ୍ ହାଇସ୍କୁଲ ଏବଂ ବି.ଏମ୍ ହାଇସ୍କୁଲ ବୁଲି ଦେଖିବା ସହ ଶିକ୍ଷକ, ଛାତ୍ରଛାତ୍ରୀ ଏବଂ ପୁରାତନ ଛାତ୍ରଛାତ୍ରୀଙ୍କ ସହ ଆଲୋଚନା କରିଥିଲେ । ସ୍କୁଲର ସ୍ମାର୍ଟ କ୍ଲାସରୁମ୍, ବିଜ୍ଞାନ ଲାବରେଟୋରୀ, ଇ-ଲାଇବ୍ରେରୀ ଏବଂ ଟଏଲେଟ୍ ବୁଲି ଦେଖିବା ପରେ ଏହାର ସ୍ଥିତି ଏବଂ ରକ୍ଷଣାବେକ୍ଷଣ ନେଇ ସନ୍ତୋଷ ପ୍ରକାଶ କରିଥିଲେ ।
ଏହି ଟିମ୍ ରେ ଅନ୍ୟମାନଙ୍କ ମଧ୍ୟରେ ଥିଲେ କଳାହାଣ୍ଡି ଜିଲ୍ଲାପାଳ ଡ. ଗଭଲି ପରାଗ ହର୍ଷଦ, ଏସପି ଡ. ସାର୍ଭଣ ବିବେକ ଏମ, ପିଡି ଡିଆରଡିଏ ସୋମେଶ ଉପାଧ୍ୟାୟ ଏବଂ ଜିଲ୍ଲାର ଅନ୍ୟାନ୍ୟ ବରିଷ୍ଠ ଅଧିକାରୀ ବୃନ୍ଦ ।
ସୂଚନାଯୋଗ୍ୟ, ସମ୍ଭାବ୍ୟ ତୃତୀୟ ଲହର ପାଇଁ ପ୍ରଶାସନର ପ୍ରସ୍ତୁତି ଏବଂ ଜିଲ୍ଲାୱାରୀ ବିଭିନ୍ନ ଉନ୍ନୟନମୂଳକ କାର୍ଯ୍ୟର ତଦାରଖ କରିବା ପାଇଁ ମୁଖ୍ୟମନ୍ତ୍ରୀଙ୍କ ନିଦେ୍ର୍ଦଶରେ ମୁଖ୍ୟ ଶାସନ ସଚିବ ଏବଂ ୫-ଟି ସଚିବ ଗତ ୨୮ ତାରିଖରେ କୋରାପୁଟ ଓ ନବରଙ୍ଗପୁର ଗସ୍ତ କରିଥିଲେ ।
