ଭୁବନେଶ୍ୱର: ରାଜ୍ୟରେ ଜାରି ରହିଛି ପ୍ରବଳ ଗ୍ରୀଷ୍ମ ଲହରୀ । ଆଜି ସମ୍ବଲପୁରରେ ତାପମାତ୍ରା ୪୬ ଡିଗ୍ରୀ ଡେଇଁଛି । ଭୁବନେଶ୍ୱର ତାପମାତ୍ରା ୪୪.୩ ଡିଗ୍ରୀରେ ପହଞ୍ଚିଛି । ଉତ୍ତରରରୁ ଦକ୍ଷିଣ ଏବଂ ପୂର୍ବରୁ ପଶ୍ଚିମ ସବୁଆଡ଼େ ତାପମାତ୍ରା ରେକର୍ଡ ଭାଙ୍ଗିଲାଣି । ପ୍ରବଳ ଖରା ଓ ଗୁଳୁଗୁଳିରେ ଲୋକେ ସନ୍ତୁଳି ହେଉଛନ୍ତି । ଆଉ ଏତିକିବେଳେ ଲୋକଙ୍କ ପାଇଁ ଅଧିକ ଦାଉ ସାଜିଛି ବିଜୁଳି । ସବୁଆଡ଼େ ପାୱାର୍ କଟ୍ । ଶକ୍ତିମନ୍ତ୍ରୀଙ୍କ ଭାଷାରେ ପାୱାର୍ ଟ୍ରିପ୍ । ବିନା ପବନରେ ଘଣ୍ଟା ଘଣ୍ଟା ଧରି ବିଜୁଳି ଚାଲିଯାଉଛି । ଗାଁ ଗହଳି କଥା ଛାଡ଼ନ୍ତୁ । ଖୋଦ୍ ରାଜଧାନୀବାସୀ ବିଜୁଳି ଯନ୍ତ୍ରଣାରେ କଲବଲ ହେଉଛନ୍ତି । ରାଜ୍ୟରେ ବିଦ୍ୟୁତ ବିତରଣ ଦାୟିତ୍ୱରେ ଥିବା ଟାଟା ପାୱାର୍ ଲୋକଙ୍କ ପାଇଁ ଯମଦୂତ ସଦୃଶ ହୋଇଛି । ଏହାକୁ ନେଇ ସାରା ରାଜ୍ୟରେ ପ୍ରତିବାଦର ସ୍ୱର ତୀବ୍ର ହୋଇଛି ।
ଟାଟା ପାୱାର୍ ର ବିଭ୍ରାଟ୍ ଓ ମନମାନିକୁ ନେଇ କିଛି ଦିନ ତଳେ ମୁଖ୍ୟ ଶାସନ ସଚିବ ପ୍ରବଳ ଅସନ୍ତୋଷ ପ୍ରକାଶ କରିବା ସହ ଟ୍ୱିଟ୍ କରି ଚେତାବନୀ ଦେଇଥିଲେ । ଆଜି ଏକ ଉଚ୍ଚସ୍ତରୀୟ ବୈଠକ ଡାକି ବିଜୁଳି ସମସ୍ୟାର ତୁରନ୍ତ ସମାଧାନ କରିବାକୁ ଚେତାବନୀ ଦେଇଛନ୍ତି । ସେ କହିଛନ୍ତି, ଆଇଏମଡିର ପୂର୍ବାନୁମାନ ଅନୁଯାୟୀ ରାଜ୍ୟରେ ଅତ୍ୟଧିକ ଗ୍ରୀଷ୍ମ ପ୍ରବାହ ଜାରି ରହିବ । କାଳବୈଶାଖୀ ବି ହୋଇପାରେ । ଏହି ପରିସ୍ଥିତିରେ ବାରମ୍ବାର ବିଦ୍ୟୁତ ବିଭ୍ରାଟକୁ ରୋକିବା ଏବଂ ବିଦ୍ୟୁତ ଚାଲିଗଲେ ଶୀଘ୍ର ପୁନରୁଦ୍ଧାର ପାଇଁ ଡିସକମ୍ ସଂସ୍ଥା ପର୍ଯ୍ୟାପ୍ତ ପଦକ୍ଷେପ ନେବାର ଆବଶ୍ୟକତା ରହିଛି ।
ଡିସକମଗୁଡ଼ିକୁ ସୋସିଆଲ ମିଡିଆରେ ଅଧିକ ସକ୍ରିୟ ରହିବାକୁ ମୁଖ୍ୟ ଶାସନ ସଚିବ ପରାମର୍ଶ ଦେଇଥିଲା ବେଳେ ବିଭିନ୍ନ ପ୍ଲାଟଫର୍ମରେ ଉଠାଯାଇଥିବା ପ୍ରସଙ୍ଗଗୁଡ଼ିକ ପ୍ରତି ନଜର ଦେଇ ତୁରନ୍ତ ସମାଧାନ କରାଯିବା ଉଚିତ୍ ବୋଲି କହିଥିଲେ ।
ଆସନ୍ତା ୧୦-୧୫ ବର୍ଷରେ ବିଦୁ୍ୟତ ଚାହିଦା ଅଭିବୃଦ୍ଧି ଓ ଶିଳ୍ପାୟନ ପାଇଁ ଦୀର୍ଘମିଆଦୀ ଟ୍ରରନସମିସନ୍ ଆଣ୍ଡ ଡିଷ୍ଟ୍ରିବୁ୍ୟସନ୍ ପ୍ଲାନ୍ ପ୍ରସ୍ତୁତ କରିବାକୁ ଓପିଟିସିଏଲ ଓ ଡିସକମମାନଙ୍କୁ କୁହାଯାଇଛି । ବାର୍ଷିକ କ୍ୟାପେକ୍ସ ଯୋଜନା ପରିବର୍ତ୍ତେ ଡିସକମମାନଙ୍କୁ ୩ରୁ ୫ ବର୍ଷ ପାଇଁ କ୍ୟାପେକ୍ସ ପ୍ଲାନ୍ ଦାଖଲ କରିବାକୁ ପରାମର୍ଶ ଦିଆଯାଇଛି । ଭୁବନେଶ୍ୱର, କଟକ, ପୁରୀ, ବାଲେଶ୍ୱର,ସମ୍ବଲପୁର ଓ ରାଉରକେଲା ଆଦି ବିଭିନ୍ନ ମହାନଗର ନିଗମ, ପୌରାଞ୍ଚଳ ସମେତ ଗ୍ରାମାଞ୍ଚଳରେ ମଧ୍ୟ ଆକଳିତ ଲୋଡ୍ ଅଭିବୃଦ୍ଧିକୁ ପୂରଣ କରିବା ପାଇଁ ଆକ୍ସନ୍ ପ୍ଲାନ୍ ପ୍ରସ୍ତୁତ କରିବାକୁ ଡିସକମମାନଙ୍କୁ ପରାମର୍ଶ ଦିଆଯାଇଛି ।
ଡିସକମଗୁଡିକ ସେମାନଙ୍କ କ୍ୟାପେକ୍ସ ଯୋଜନା ଅଧୀନରେ ବିଭିନ୍ନ ସିଷ୍ଟମ୍ ଉନ୍ନତି କାର୍ଯ୍ୟ କରିବାକୁ ପ୍ରସ୍ତାବ ଦେଇଥିବାରୁ ବିଦ୍ୟୁତ ନିୟାମକ ଆୟୋଗଙ୍କୁ ଏହାକୁ ତତ୍ପରତାର ସହ ଧ୍ୟାନ ଦେବାକୁ ବୈଠକରେ ଅନୁରୋଧ କରାଯାଇଥିଲା ।
ସୂଚନାଥାଉକି, ବିଜୁଳି ଉତ୍ପାଦନରେ ବଳକା ରାଜ୍ୟ ପାଇଁ ଗର୍ବ କରୁଥିବା ଓଡ଼ିଶାରେ ବିଜୁଳି ସଙ୍କଟ ଏବେ ସୀମା ପାର କରିଯାଇଛି । ବିତରଣ କମ୍ପାନୀର କାର୍ଯ୍ୟକୁ ନେଇ ଅସନ୍ତୋଷ ବ୍ୟାପିଯାଇଛି । ସାରା ରାଜ୍ୟରେ ଅଘୋଷିତ ବିଜୁଳି କାଟ ଲାଗି ରହିଛି । କାଳବୈଶାଖୀ ବର୍ଷାପବନ ପାଇଁ ଗାଁ ଗାଁରେ ଦିନ ଦିନ ଧରି ବିଜୁଳି ଆସୁ ନାହିଁ । ସହରଗୁଡ଼ିକରେ ମଧ୍ୟ ଅବସ୍ଥା ସଙ୍ଗୀନ ହୋଇଛି । ଲୋକଙ୍କ ଅସନ୍ତୋଷରୁ ରକ୍ଷା ପାଇବା ପାଇଁ ଶକ୍ତିମନ୍ତ୍ରୀ ପ୍ରତାପ ଦେବ ପାୱାର କଟ୍ ନ କହି ପାୱାର୍ ଟ୍ରିପ୍ ବୋଲି ଲୋକଙ୍କୁ ବୁଝାଇବାରେ ଲାଗିଛନ୍ତି । କାଳବୈଶାଖୀ ଓ ଦୁର୍ବଳ ଭିତ୍ତିଭୂମିକୁ ଦୋଷ ଦେଇ ସେ ଲୋକଙ୍କ ଅସନ୍ତୋଷକୁ ଆହୁରି ବଢ଼ାଇ ଦେଇଛନ୍ତି । ମନ୍ତ୍ରୀଙ୍କ ମନ୍ତବ୍ୟ ରାଜ୍ୟ ସରକାରଙ୍କୁ ଅଡୁଆରେ ପକାଇଥିବା ବେଳେ ବିତରଣ କମ୍ପାନୀ ଟାଟା ପାୱାର୍ କୁ ଲୋକେ ଗାଳି କରି ଚଉଦ ପୁରୁଷ ଉଦ୍ଧାର କରୁଛନ୍ତି ।
