ଭୁବନେଶ୍ୱର: ବାତ୍ୟା ଅର୍ଣ୍ଣବ ମୁକାବିଲାରେ ପାଇଥିବା ବିଫଳତାରୁ ଶିଖିଛନ୍ତି ରାଜ୍ୟ ସରକାର । ମନ୍ତ୍ରୀ ଓ ବିଧାୟକମାନଙ୍କ ଉପରୁ ଭରସା ତୁଟାଇଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ଏଥର ବାତ୍ୟା ‘ଅକଭାନ୍’ ମୁକାବିଲା ଦାୟିତ୍ୱ ବରିଷ୍ଠ ଆଇଏଏସ୍ ଅଫିସରମାନଙ୍କ ଉପରେ ନ୍ୟସ୍ତ କରିଛନ୍ତି । ବାତ୍ୟା ଦ୍ୱାରା ବେଶୀ ପ୍ରଭାବିତ ହେବାକୁ ଥିବା ୭ ଜିଲ୍ଲାକୁ ୭ ଜଣ ବରିଷ୍ଠ ଆଇଏଏସ୍ ଙ୍କୁ ପଠାଯାଇଛି । ସେଠାରେ ରହି ବାତ୍ୟା ମୁକାବିଲା ପ୍ରସ୍ତୁତି, ପରିଚାଳନା, ରିଲିଫ୍ ଓ ଉଦ୍ଧାର କାର୍ଯ୍ୟର ତଦାରଖ କରିବେ ।
କେବଳ ସେତିକି ନୁହେଁ । ମୁଖ୍ୟ ଶାସନ ସଚିବ, ଉନ୍ନୟନ କମିସନରଙ୍କ ସମେତ ବିଭିନ୍ନ ବିଭାଗର ଅତିରିକ୍ତ ମୁଖ୍ୟ ସଚିବ, ପ୍ରମୁଖ ସଚିବ ଏଭଳି ପ୍ରାୟ ୧୧ ଜଣ ବରିଷ୍ଠ ଅଧିକାରୀ ପୂରା ୨୪ ଘଣ୍ଟିଆ ଦାୟିତ୍ୱ ସମ୍ଭାଳିଛନ୍ତି ।
ଗତ ବାତ୍ୟା ‘ଅର୍ଣ୍ଣବ’ ର ମୁକାବିଲା ଓ ପରିଚାଳନା ପାଇଁ ଦୁଇ ଉପମୁଖ୍ୟମନ୍ତ୍ରୀଙ୍କ ସମେତ ୮ ଜଣ ମନ୍ତ୍ରୀଙ୍କୁ ପ୍ରଭାବିତ ଜିଲ୍ଲାଗୁଡ଼ିକୁ ପଠାଯାଇଥିଲା । ସେମାନଙ୍କ ସାଙ୍ଗରେ ବିଧାୟକମାନେ ମଧ୍ୟ ରହିଥିଲେ । ୫ ବରିଷ୍ଠ ଆଇଏଏସ୍ ଙ୍କୁ ଜିଲ୍ଲା ଦାୟିତ୍ୱ ଦେଇ ପଠାଯାଇଥିଲେ ମଧ୍ୟ ମନ୍ତ୍ରୀମାନଙ୍କର ମାମଲତି ଯୋଗୁଁ ଯାବତୀୟ ବିଭ୍ରାଟ ଘଟିଥିଲା । ଉଦ୍ଧାର ଓ ରିଲିଫ୍ କାର୍ଯ୍ୟରେ ରାଜନୀତି ପଶିବାରୁ ଜନ ଅସନ୍ତୋଷ ବୃଦ୍ଧି ପାଇଥିଲା । ଦୁର୍ଦ୍ଦଶାଗ୍ରସ୍ତ ଲୋକେ ବିଭିନ୍ନ ସ୍ଥାନରେ ମନ୍ତ୍ରୀ ଓ ବିଧାୟକମାନଙ୍କୁ ବିରୋଧ କରିଥିଲେ । ଏପରିକି ଖଲିକୋଟ ବିଧାୟକଙ୍କ ବେକରେ ଲୋକେ ଗାମୁଛା ପକାଇ ଦେଇଥିଲେ । ସରକାର ଓ ପ୍ରଶାସନ ମଧ୍ୟରେ ସମନ୍ୱୟ ଓ ବୁଝାମଣା ଅଭାବରୁ ଗଞ୍ଜାମରେ ପ୍ରଳୟଙ୍କରୀ ବନ୍ୟା ବିତ୍ପାତ ଘଟିଲା । ବିଭିନ୍ନ ସ୍ଥାନରେ ଭୂସ୍ଖଳନ ଯୋଗୁ ଜିରୋ କାଜୁଆଲିଟି କେବଳ ଭାଷଣରେ ରହିଗଲା । ସମ୍ଭବତଃ ରାଜ୍ୟ ସରକାର ଏଥିରୁ କିଛି ଶିକ୍ଷାଲାଭ କରିଛନ୍ତି ।