ଭୁବନେଶ୍ୱର: ୪ ଦିନିଆ ଦିଲ୍ଲୀ ଗସ୍ତରେ ଅଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ଗସ୍ତର ପ୍ରଥମ ଦିନରେ କନ୍ଧମାଳ ସାଂସଦ ସୁକାନ୍ତ ପାଣିଗ୍ରାହୀଙ୍କ ଘରେ ଡିନର୍ ଭୋଜିରେ ଓଡ଼ିଶାର ବିଜେପି ସାଂସଦମାନଙ୍କ ସହ ଯୋଗଦେଇଥିଲେ । ଦ୍ୱିତୀୟ ଦିନରେ ଅଶୋକ ହୋଟେଲ୍ ରେ ସାଂସଦମାନଙ୍କୁ ଡିନର୍ ଭୋଜିରେ ଆପ୍ୟାୟିତ କରିଛନ୍ତି ମୁଖ୍ୟମନ୍ତ୍ରୀ । ରାଜ୍ୟରେ ବନ୍ୟା ବିଭୀଷିକା ବେଳେ ମୁଖ୍ୟମନ୍ତ୍ରୀ ଅଚାନକ ଦିଲ୍ଲୀ ଯାଇ ସାଂସଦମାନଙ୍କ ସହ ଏମିତି ମେଳି କରିବା ବିଜେପି ଆଭ୍ୟନ୍ତରୀଣ ରାଜନୀତିକୁ ସରଗରମ କରିଛି ।
ନିଟ୍ ପ୍ରଶ୍ନପତ୍ର ଲିକ୍ ବିବାଦରେ କେନ୍ଦ୍ର ମନ୍ତ୍ରୀମଣ୍ଡଳରୁ ବିଦାୟ ନେଇଥିବା ଧର୍ମେନ୍ଦ୍ର ପ୍ରଧାନଙ୍କୁ ଭୁବନେଶ୍ୱରରେ ୬ ଜଣ ମନ୍ତ୍ରୀ ଏବଂ ୨୫ ବିଧାୟକଙ୍କ ଭବ୍ୟ ସମ୍ବର୍ଦ୍ଧନାକୁ ଏକ ମାମୁଲି ଘଟଣା ଭାବରେ ବିଚାର କରାଯାଉନାହିଁ । ଏହାକୁ ନେଇ ବିଭିନ୍ନ ପ୍ରକାର ଆଲୋଚନା ଚାଲିଥିବା ବେଳେ ଧର୍ମେନ୍ଦ୍ରଙ୍କ ପଛେ ପଛେ ମୋହନଙ୍କ ଦିଲ୍ଲୀ ଗସ୍ତ ଏହି ଆଲୋଚନା ନିଆଁରେ ଘିଅ ଢ଼ାଳି ଦେଇଛି । ରାଜ୍ୟରେ ବନ୍ୟାର ତାଣ୍ଡବ ବେଳେ ମୁଖ୍ୟମନ୍ତ୍ରୀ ଦିଲ୍ଲୀ ଯିବା ଆଦୌ ସାଧାରଣ ଘଟଣା ନୁହେଁ । ଏହା ବି କୁହାଯାଉଛି ଯେ ମୁଖ୍ୟମନ୍ତ୍ରୀ ନିଜ ଇଚ୍ଛାରେ ଦିଲ୍ଲୀ ଯାଇନାହାନ୍ତି ।
ରୋଚକ କଥା ହେଉଛି, ଗତକାଲି କେନ୍ଦ୍ର ଜଳଶକ୍ତି ମନ୍ତ୍ରୀ ସିଆର୍ ପାଟିଲଙ୍କ ଅଧ୍ୟକ୍ଷତାରେ ମହାନଦୀ ଜଳ ବିବାଦର ସମାଧାନ ନିମନ୍ତେ ଯେଉଁ ବୈଠକ ବସିଥିଲା ତାହା ପୂର୍ବ ସ୍ଥିରୀକୃତ ନ ଥିଲା । ମୋହନ ମାଝୀଙ୍କ ଦିଲ୍ଲୀ ଗସ୍ତର ଗୁରୁତ୍ୱ ରଖିବା ପାଇଁ ଶେଷ ମୁହୂର୍ତ୍ତରେ ଏହା ସ୍ଥିର ହୋଇଥିଲା । ସେଥିପାଇଁ ବୈଠକ ସଂକ୍ରାନ୍ତରେ ଓଡ଼ିଶାର ବିଜେପି ସାଂସଦମାନଙ୍କ ପାଖରେ ପୂର୍ବ ସୂଚନା ନ ଥିଲା । ରାଜ୍ୟରେ ବନ୍ୟା ବିପତ୍ତି ବେଳେ ମୁଖ୍ୟମନ୍ତ୍ରୀଙ୍କ ଅଚାନକ ଗସ୍ତକୁ ନେଇ ଓଲଟି ଅନେକ ସାଂସଦ ଆଶ୍ଚର୍ଯ୍ୟପ୍ରକଟ କରିଥିଲେ ।
ଓଡ଼ିଶା ଓ ଛତିଶଗଡ଼ ମଧ୍ୟରେ ମହାନଦୀ ଜଳ ବିବାଦର ଆଲୋଚନା ବୈଠକ ନିଶ୍ଚିତ ଗୁରୁତ୍ୱପୂର୍ଣ୍ଣ । ମାତ୍ର ଅଧା ଓଡ଼ିଶା ବନ୍ୟାରେ ଉବୁଟୁବୁ ହେଉଥିବାରୁ ବୈଠକକୁ ଆଉ ୧୦ ଦିନ ଗଡ଼ା ଯାଇପାରିଥାନ୍ତା । ସେଥିରେ ଆକାଶ ଛିଣ୍ଡି ପଡ଼ି ନ ଥାନ୍ତା । ବରଂ ଦୁଇ ଦିନ ହେଲା ମୁଖ୍ୟମନ୍ତ୍ରୀ ଦିଲ୍ଲୀରେ ରାଜ୍ୟର ଦଳୀୟ ସାଂସଦମାନଙ୍କ ସହ ସୁସମ୍ପର୍କ ରକ୍ଷାରେ ବ୍ୟସ୍ତ ରହିବା ରାଜ୍ୟ ବିଜେପି ରାଜନୀତିର ଗହନ କଥାକୁ ଇଙ୍ଗିତ କରୁଛି । ଗତକାଲି ଅଶୋକ ହୋଟେଲ ଡିନର୍ ପାର୍ଟିରେ ମୁଖ୍ୟମନ୍ତ୍ରୀ ସାଂସଦମାନଙ୍କ ସହ ରାଜ୍ୟର ବିଭିନ୍ନ ବିକାଶମୂଳକ ପ୍ରସଙ୍ଗରେ ଆଲୋଚନା କରିଥିବା ଜଣାପଡ଼ିଛି ।
ସୂଚନାଥାଉକି, ବନ୍ୟା ବେଳେ ମୁଖ୍ୟମନ୍ତ୍ରୀଙ୍କ ନୂଆଦିଲ୍ଲୀ ଗସ୍ତ ଏବଂ ବିଜେପି ନେତାମାନଙ୍କ ଭୋଜିକୁ ସମାଲୋଚନା କରିଛନ୍ତି ବିରୋଧୀ ଦଳ ନେତା ନବୀନ ପଟ୍ଟନାୟକ । ସାରା ରାଜ୍ୟରେ ବନ୍ୟାର ସ୍ଥିତି ଦେଖାଦେଇଥିବା ବେଳେ ଓଡ଼ିଶାର ମୁଖ୍ୟମନ୍ତ୍ରୀଙ୍କ ସମେତ ବିଜେପିର ଶୀର୍ଷନେତା ତଥା ସାଂସଦମାନେ ଏବେ ଦିଲ୍ଲୀରେ । ଏପରି ଅସମୟରେ ନିଜ ଲୋକଙ୍କ ସୁରକ୍ଷାଠାରୁ ଅଧିକ ଗମ୍ଭୀର ବିଷୟ କ’ଣ ହୋଇପାରେ ବୋଲି ସେ ପ୍ରଶ୍ନ କରିବା ସହ ସରକାର ସମ୍ବେଦନହୀନ ନ ହୋଇ ଲୋକଙ୍କ ସହିତ ଛିଡ଼ା ହୋଇ ସୁରକ୍ଷା ଦିଅନ୍ତୁ ବୋଲି ସେ ପରାମର୍ଶ ଦେଇଛନ୍ତି ।
