ଭୁବନେଶ୍ୱର: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନେତୃତ୍ୱରେ ଉଚ୍ଚସ୍ତରୀୟ ପ୍ରତିନିଧି ଦଳ ଆଜି ଜାପାନରେ ପହଞ୍ଚିଛନ୍ତି । ଟୋକିଓ ବିମାନବନ୍ଦରରେ ଭାରତୀୟ ରାଷ୍ଟ୍ରଦୂତ ସିବି ଜର୍ଜ ଏବଂ ଦୂତାବାସର ବରିଷ୍ଠ ଅଧିକାରୀମାନେ ମୁଖ୍ୟମନ୍ତ୍ରୀଙ୍କୁ ସ୍ୱାଗତ କରିଥିଲେ । ଓଡିଶାକୁ ପୁଞ୍ଜି ନିବେଶକକାରୀଙ୍କୁ ଆକୃଷ୍ଟ କରିବା ହେଉଛି ମୁଖ୍ୟମନ୍ତ୍ରୀଙ୍କ ଏହି ଗସ୍ତର ମୁଖ୍ୟ ଲକ୍ଷ୍ୟ । ତାଙ୍କର ଏହି ଗସ୍ତ ଓଡିଶା ଏବଂ ଜାପାନ ମଧ୍ୟରେ ସମ୍ପର୍କ ସୁଦୃଢ଼ କରିବ ବୋଲି ମୁଖ୍ୟମନ୍ତ୍ରୀ ଆଶା କରିଛନ୍ତି । ଜାପାନ ସରକାରଙ୍କ ପକ୍ଷରୁ ଦିଆଯାଇଥିବା ସମ୍ବର୍ଦ୍ଧନାରେ ମୁଖ୍ୟମନ୍ତ୍ରୀ ଅଭିଭୂତ ହୋଇଛନ୍ତି ।
ଆଜି (ମଙ୍ଗଳବାର) ମୁଖ୍ୟମନ୍ତ୍ରୀଙ୍କର ନିପ୍ପନ ଷ୍ଟିଲ୍ ର ସଭାପତି ତଥା ରିପ୍ରେଜେଣ୍ଟଟିଭ୍ ଡାଇରେକ୍ଟରଙ୍କ ସହିତ ସାକ୍ଷାତ ଆଲୋଚନା କାର୍ଯ୍ୟକ୍ରମ ରହିଛି ।
ଆସନ୍ତାକାଲି(ବୁଧବାର) ଓଡିଶା ବିଜିନେସ୍ ମିଟ୍ କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ପ୍ରମୁଖ ଜାପାନୀ ଉଦ୍ୟୋଗୀଙ୍କ ସହ ୱାନ୍ ଟୁ ୱାନ୍ ଆଲୋଚନା କରିବେ । ଏହି କାର୍ଯ୍ୟକ୍ରମରେ ୨୦୦ ରୁ ଅଧିକ ଶିଳ୍ପପତି ଏବଂ ଉଦ୍ୟୋଗୀ ଯୋଗଦେବେ । ସଂଧ୍ୟାରେ ଜାପାନରେ ବସବାସ କରୁଥିବା ଓଡିଆମାନଙ୍କୁ ମୁଖ୍ୟମନ୍ତ୍ରୀ ଭେଟିବେ ଏବଂ ସେମାନଙ୍କ ସହ ରାତ୍ରିଭୋଜନ କରିବେ ।
ଏହାପରେ ପ୍ରତିନିଧି ଦଳ କ୍ୟୋଟୋ ଓ ଓସାକାରେ ବିଭିନ୍ନ କାର୍ଯ୍ୟକ୍ରମରେ ଯୋଗଦେବେ । ଗୁରୁବାର ଦିନ ନିପ୍ପନ୍ ଷ୍ଟିଲ୍ କର୍ପୋରେସନ୍ ର ଷ୍ଟିଲ୍ କାର୍ଯ୍ୟ ଏବଂ ଆର ଆଣ୍ଡ ଡି ସେଣ୍ଟର ପରିଦର୍ଶନ କରିବେ । ପରବର୍ତ୍ତୀ ସମୟରେ ଜାପାନ ଏବଂ ଓଡିଶା ମଧ୍ୟରେ ପର୍ଯ୍ୟଟନର ବିକାଶ ପାଇଁ ରାଉଣ୍ଡ ଟେବୁଲ ବୈଠକ ଏବଂ ସ୍ପୋର୍ଟସ୍ ଇକୋସିଷ୍ଟମ୍ ବିକାଶ ସମ୍ପର୍କିତ ଆଲୋଚନା ହେବ ।
ମୁଖ୍ୟମନ୍ତ୍ରୀଙ୍କ ସହ ଜାପାନ ଯାଇଥିବା ସରକାରୀ ପ୍ରତିନିଧି ଦଳରେ ଅଛନ୍ତି- ଶିଳ୍ପମନ୍ତ୍ରୀ ପ୍ରତାପ ଦେବ, ମୁଖ୍ୟ ଶାସନ ସଚିବ ପ୍ରଦୀପ କୁମାର ଜେନା, ମୁଖ୍ୟମନ୍ତ୍ରୀଙ୍କ ସଚିବ(୫-ଟି) ଭି.କେ.ପାଣ୍ଡିଆନ୍, ସ୍ୱତନ୍ତ୍ର ସଚିବ ଭିନୀଲ୍ କ୍ରିଷ୍ଣା, ଶିଳ୍ପ ବିଭାଗର ପ୍ରମୁଖ ସଚିବ ହେମନ୍ତ ଶର୍ମା, ଇଲେକଟ୍ରୋନିକ୍ସ, ଆଇଟି ବିଭାଗର ପ୍ରମୁଖ ସଚିବ ମନୋଜ ମିଶ୍ର, ଇପିକଲ୍ ଏମଡି ଭୁପେନ୍ଦର ପୁନିଆ । ସେହିଭଳି ବାଣିଜ୍ୟିକ ପ୍ରତିନିଧି ଦଳରେ ଷ୍ଟିଲ୍, ଆଲୁମିନିୟମ୍, ଟେକ୍ସଟାଇଲ୍ସ, ଫୁଡ୍ ଆଣ୍ଡ ସି-ଫୁଡ୍ ପ୍ରସେସିଂ, ଗ୍ରାନ୍ ହାଇଡ୍ରୋଜେନ୍ ଏବଂ ଗ୍ରୀନ୍ ଆମୋନିଆ ସେକ୍ଟରର ପ୍ରତିନିଧିମାନେ ସାମିଲ ହୋଇଛନ୍ତି ।
