ଭୁବନେଶ୍ୱର: କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ କୋଟିଆରେ ଉତ୍କଳ ଦିବସ ପାଳନ କରିବା ଏବଂ ଆନ୍ଧ୍ର ଅଧିକାରୀଙ୍କୁ ଘଉଡ଼ାଇ ଗୋ ବ୍ୟାକ୍ ନାରା ଦେବା ଘଟଣାକୁ ନେଇ ରାଜନୀତି ସରଗରମ ଥିବା ବେଳେ ଆଜି ଧର୍ମେନ୍ଦ୍ରଙ୍କ ସହ କୋଟିଆ ଗସ୍ତ କରିଥିବା ବିଜେପିର ୪ ବିଧାୟକ ଏକ ସାମ୍ବାଦିକ ସମ୍ମିଳନୀରେ ଧର୍ମେନ୍ଦ୍ରଙ୍କ ପକ୍ଷ ରଖି ବିଜେଡିକୁ ଜବାବ ଦେଇଛନ୍ତି । ଓଡ଼ିଶାବାସୀଙ୍କ ସ୍ୱାର୍ଥରେ କେନ୍ଦ୍ରମନ୍ତ୍ରୀ କହିଥିବା କଥାକୁ ସମର୍ଥନ କରିବା ପରିବର୍ତ୍ତେ ବିଜେଡି ନେତା ଆନ୍ଧ୍ରର ଭାଷା କହୁଛନ୍ତି ବୋଲି ସେମାନେ ଅଭିଯୋଗ କରିଛନ୍ତି ।
ଭୁବନେଶ୍ୱରର ରାଜ୍ୟ କାର୍ଯ୍ୟାଳୟରେ ସାମ୍ବାଦିକ ସମ୍ମିଳନୀ ଅନୁଷ୍ଠିତ ହୋଇଥିଲା । ବ୍ରହ୍ମଗିରି ବିଧାୟକ ଲଳିତେନ୍ଦୁ ବିଦ୍ୟାଧର ମହାପାତ୍ର, ଲୋଇସିଂହା ବିଧାୟକ ମୁକେଶ ମହାଲିଙ୍ଗ, ବଡ଼ସାହି ବିଧାୟକ ସନାତନ ବିଜୁଳି ଏବଂ ଧାମନଗର ବିଧାୟକ ସୂରଜ ସୂର୍ଯ୍ୟବଂଶୀ ସାମ୍ବାଦିକମାନଙ୍କୁ ସମ୍ବୋଧିତ କରିଥିଲେ ।
କହିଥିଲେ, ଦୁଇଦିନ ହେବ କୋଟିଆକୁ ନେଇ ଯେଉଁ ରାଜନୀତି ବୟାନବାଜି ଚାଲିଛି ତାହା ରାଜ୍ୟବାସୀଙ୍କୁ କଷ୍ଟ ଦେଉଛି । କେନ୍ଦ୍ରମନ୍ତ୍ରୀ ଶ୍ରୀ ପ୍ରଧାନଙ୍କ କୋଟିଆ ଗସ୍ତ ଓ ଆନ୍ଧ୍ରର ଅନୁପ୍ରବେଶ ବିରୋଧରେ ଏକଜୁଟ୍ ପାଇଁ ଆହ୍ୱାନକୁ ବିଜେଡି ସ୍ୱାଗତ କରିବା ବଦଳରେ ବିରୋଧ କରିବା ରାଜନୈତିକ ଅସହିଷ୍ଣୁତାର ପରିଚୟ ।
ଧର୍ମେନ୍ଦ୍ରଙ୍କ ପକ୍ଷ ରଖି କହିଥିଲେ ଯେ ୨୦୧୮ ଏପ୍ରିଲ ୯ରେ ସେ କୋଟିଆ ଗସ୍ତ କରି ଲୋକମାନଙ୍କ ସମସ୍ୟା ଶୁଣିଥିଲେ । ତତ୍କାଳୀନ ଅର୍ଥମନ୍ତ୍ରୀ ଅରୁଣ ଜେଟଲୀଙ୍କୁ ଭେଟି କୋଟିଆ ସମସ୍ୟା ଉପରେ ଆଲୋଚନା କରିଥିଲେ । ୨୦୨୦ ଓ ୨୦୨୧ ରେ ମୁଖ୍ୟମନ୍ତ୍ରୀଙ୍କୁ ଚିଠି ଲେଖି ଏହି ପ୍ରସଙ୍ଗରେ ହସ୍ତକ୍ଷେପ ଲୋଡ଼ିଥିଲେ । ପରବର୍ତ୍ତୀ ସମୟରେ ଆନ୍ଧ୍ରର ମୁଖ୍ୟମନ୍ତ୍ରୀଙ୍କୁ କୋଟିଆ ଗ୍ରାମପୁଞ୍ଜ ବିବାଦର ସମାଧାନ ପାଇଁ ଚିଠି ମାଧ୍ୟମରେ ୪ଟି ପ୍ରସ୍ତାବ ଦେଇଥିଲେ । ସର୍ବୋପରି ରାଜ୍ୟର ସୀମା ବିବାଦ ସମ୍ପର୍କରେ ସର୍ବଦଳୀୟ ବୈଠକ ଡାକିବା ପାଇଁ ମୁଖ୍ୟମନ୍ତ୍ରୀଙ୍କୁ ବାରମ୍ବାର ଚିଠି ଲେଖିଥିଲେ ମଧ୍ୟ ମୁଖ୍ୟମନ୍ତ୍ରୀ କର୍ଣ୍ଣପାତ କରି ନ ଥିଲେ ।
ଅନ୍ୟପକ୍ଷରେ, ୨୦୨୧ ଅଗଷ୍ଟ ୩୧ରେ ସୁପ୍ରିମକୋର୍ଟ କୋଟିଆ ବିବାଦର ସମାଧାନ ପାଇଁ ଆପୋଷ ବୁଝାମଣାର ବାଟ ବାହାର କରିବାକୁ ନିର୍ଦ୍ଦେଶ ଦେଇଥିଲେ । ୨୦୨୧ ନଭେମ୍ବର ୮ ରେ ଆନ୍ଧ୍ର ମୁଖ୍ୟମନ୍ତ୍ରୀ ଜଗନ ମୋହନ ରେଡ୍ଡୀ ଓ ଆମ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କର ସାକ୍ଷାତ ହୋଇଥିଲା । ଏହି ସାକ୍ଷାତ ଅତ୍ୟନ୍ତ ସୌହାର୍ଦ୍ଦପୂର୍ଣ୍ଣ ଓ ଫଳପ୍ରଦ ଥିଲା ବୋଲି ଉଭୟ ମୁଖ୍ୟମନ୍ତ୍ରୀ ମିଳିତ ବିବୃତି ଦେଇଥିଲେ । ଏକ ଯୁଗ୍ମ ଉଚ୍ଚସ୍ତରୀୟ କମିଟି କୋଟିଆ ପଞ୍ଚାୟତରେ ଥିବା ୨୧ଟି ଗ୍ରାମପୁଞ୍ଜର ବିବାଦକୁ ସମାଧାନ କରିବେ ବୋଲି ମତପ୍ରକାଶ କରିଥିଲେ । ମାତ୍ର ଦେଢ଼ବର୍ଷ ବିତିଯାଇଥିଲେ ମଧ୍ୟ ବିବାଦର ସମାଧାନ ହେବା ପରିବର୍ତ୍ତେ ଆନ୍ଧ୍ର ଓଡ଼ିଶା ସୀମାନ୍ତକୁ ଅନୁପ୍ରବେଶ କରିବା ସଙ୍ଗୀନ ପ୍ରସଙ୍ଗ ।
ଏହି ସମସ୍ତ ବିଷୟ ରାଜ୍ୟ ସରକାରଙ୍କ ଆଭିମୁଖ୍ୟକୁ ସନ୍ଦେହ ଘେରକୁ ଟାଣୁଥିବା ବିଧାୟକମାନେ ଅଭିଯୋଗ କରିଥିଲେ । ସେମାନେ କହିଥିଲେ ଯେ କୋଟିଆ ଗ୍ରାମପୁଞ୍ଜରେ ରାଜ୍ୟ ସରକାରଙ୍କର କିଛି ଯୋଜନା ପହଞ୍ଚିଥିଲେ ମଧ୍ୟ ସେଥିରେ ଜନକଲ୍ୟାଣ ହୋଇନାହିଁ । କୋଟିଆ ପାଇଁ ମୁଖ୍ୟ ରାସ୍ତା ଥିଲେ ମଧ୍ୟ ଭିତରେ ରାସ୍ତାଘାଟ ଅବସ୍ଥା ଶୋଚନୀୟ । ରାସ୍ତାଘାଟ ନିର୍ମାଣ କାର୍ଯ୍ୟରେ ୧୫୦ କୋଟି ଟଙ୍କା ବିନିଯୋଗ ହୋଇଥିବା ରାଜ୍ୟ ସରକାରଙ୍କ ଦାବି ଅତ୍ୟନ୍ତ ହାସ୍ୟାସ୍ପଦ ।
ତେବେ ବିଜେପି ବିଧାୟକଙ୍କ ଏହି ଅଭିଯୋଗ ଉପରେ ରାଜସ୍ୱମନ୍ତ୍ରୀ ପ୍ରମିଳା ମଲ୍ଲିକ ପ୍ରତିକ୍ରିୟା ରଖିଛନ୍ତି । ସେ କହିଛନ୍ତି କୋଟିଆ ବିବାଦର ସମଧାନ କରିବାର ଦାୟିତ୍ୱ ହେଉଛି କେନ୍ଦ୍ର ସରକାରଙ୍କର । ଓଡ଼ିଶା ଓ ଆନ୍ଧ୍ର ସରକାରଙ୍କୁ ଡାକି କେନ୍ଦ୍ର ଆଲୋଚନା କରୁ ଏବଂ ସମସ୍ୟାର ସମାଧାନ ହେଉ ବୋଲି କହିଛନ୍ତି ।
ସୂଚନାଯୋଗ୍ୟ, ଧର୍ମେନ୍ଦ୍ର ପ୍ରଧାନଙ୍କ କୋଟିଆ ଗସ୍ତ ସମ୍ପୂର୍ଣ୍ଣ ରାଜନୈତିକ ଉଦ୍ଦେଶ୍ୟ ପ୍ରଣୋଦିତ ବୋଲି ବିଜେଡି ସମାଲୋଚନା କରିଥିଲା । କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର ଅନୁରୂପ ପ୍ରତିକ୍ରିୟା ଦେଇ କେନ୍ଦ୍ରମନ୍ତ୍ରୀ ହିସାବରେ ଧର୍ମେନ୍ଦ୍ର କୋଟିଆ ମାମଲାରେ ହସ୍ତକ୍ଷେପ କରନ୍ତୁ ବୋଲି କହିଥିଲେ ।
