ଭୁବନେଶ୍ୱର: ୬୧୩୧ ନବନିଯୁକ୍ତ ଶିକ୍ଷକଙ୍କ ଓରିଏଣ୍ଟେସନ୍ କାର୍ଯ୍ୟକ୍ରମରେ ଯୋଗଦେବାକୁ ଆସିଥିବା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି କଳିଙ୍ଗ ଷ୍ଟାଡିୟମ୍ ବୁଲିଥିଲେ । ସେଠାରେ ଚାଲିଥିବା ଭିତ୍ତିଭୂମି ପ୍ରକଳ୍ପ କାର୍ଯ୍ୟର ଅଗ୍ରଗତି ସମ୍ପର୍କରେ ସମୀକ୍ଷା କରିଥିଲେ । ସାଙ୍ଗରେ ଥିଲେ ମନ୍ତ୍ରୀ ତୁଷାରକାନ୍ତି ବେହେରା, ଉନ୍ନୟନ କମିଶନର ପ୍ରଦୀପ ଜେନା, ମୁଖ୍ୟମନ୍ତ୍ରୀଙ୍କ ସଚିବ(୫-ଟି) ଭି.କେ.ପାଣ୍ଡିଆନ୍, କ୍ରୀଡ଼ା ସଚିବ ଆର. ଭିନୀଲ୍ କ୍ରିଷ୍ଣା ଏବଂ ଅନ୍ୟାନ୍ୟ ଅଧିକାରୀ ।
କଳିଙ୍ଗ ଷ୍ଟାଡିୟମ୍ ରେ ଆକ୍ୱିଏଟିକ୍ ସେଣ୍ଟର ଏବଂ ଇନଡୋର୍ ଆଥଲେଟିକ୍ ଷ୍ଟାଡିୟମ୍ ର ନିର୍ମାଣ କାର୍ଯ୍ୟକୁ ରାଜ୍ୟ ସରକାର ପ୍ରାଥମିକତା ଦେଇଛନ୍ତି । ମୁଖ୍ୟମନ୍ତ୍ରୀ ଏହାର ଅଗ୍ରଗତି ନେଇ ସନ୍ତୋଷ ପ୍ରକାଶ କରିବା ସହ କଳିଙ୍ଗ ଷ୍ଟାଡିୟମ୍ କୁ କ୍ରୀଡ଼ା ଭିତ୍ତିଭୂମିରେ ଏହା ସମଗ୍ର ଦେଶରେ ଅଗ୍ରଣୀ ସ୍ଥାନ ଦେବ ବୋଲି ଆଶା ରଖିଥିଲେ ।
ଏହି ଅବସରରେ ମୁଖ୍ୟମନ୍ତ୍ରୀ ୫ଟି କ୍ରୀଡ଼ା ଭିତ୍ତିଭୂମି ସୁବିଧାର ଉଦଘାଟନ କରିବା ସହ ୮୯ ବହୁମୁଖୀ ବା ମଲଟି ପରପୋଜ୍ ଇନଡୋର ହଲ୍ ର ଭିତ୍ତିପ୍ରସ୍ତର ସ୍ଥାପନ କରିଥିଲେ । ଉଦଘାଟିତ ପ୍ରକଳ୍ପ ମଧ୍ୟରେ ରହିଛି କଳିଙ୍ଗ ଷ୍ଟାଡିୟମ୍ ରେ ବିଜୁ ପଟ୍ଟନାୟକ ୱେଟଲିଫ୍ଟିଂ ହଲ୍ ଏବଂ ନୂଆ ସ୍ପୋର୍ଟସ୍ ହଷ୍ଟେଲ୍ । ଅନୁଗୁଳ ଓ ବାରିପଦାରେ ଗୋଟିଏ ଲେଖାଏଁ ସୁଇମିଂ ପୁଲ୍ ଏବଂ ରାଉରକେଲାରେ ଏକ ଇନଡୋର ଷ୍ଟାଡିୟମ୍ ।
