ଭୁବନେଶ୍ୱର: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆସନ୍ତାକାଲି ପଦ୍ମପୁର ପ୍ରଚାର ମଇଦାନକୁ ଓହ୍ଲାଉଛନ୍ତି । ଦଳୀୟ ପ୍ରାର୍ଥୀ ବର୍ଷା ସିଂ ବରିହାଙ୍କ ପାଇଁ ସେ ଭୋଟ ମାଗିବେ । ନିର୍ବାଚନମଣ୍ଡଳୀର ତିନୋଟି ଯାକ ବ୍ଲକ୍ ରେ ତିନୋଟି ସାଧାରଣ ସଭାରେ ମୁଖ୍ୟମନ୍ତ୍ରୀ ଯୋଗଦେବେ । ଦିନ ୧୧ଟା ୨୫ ମିନିଟ୍ ରେ ପ୍ରଥମେ ଝାରବନ୍ଧ, ୧୨ଟା ୩୦ ମିନିଟ୍ ରେ ପାଇକମାଳ ହାଇସ୍କୁଲ ପଡ଼ିଆ ଏବଂ ଅପରାହ୍ନ ୩ଟା ୩୦ ମିନିଟ୍ ରେ ପଦ୍ମପୁର ହାଇସ୍କୁଲ ପଡ଼ିଆରେ ମୁଖ୍ୟମନ୍ତ୍ରୀ ଜନସଭାକୁ ସମ୍ବୋଧିତ କରିବେ ।
କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଲଗାତର ତିନିଦିନ ଧରି ପଦ୍ମପୁରରେ ପ୍ରଚାର କରିଛନ୍ତି । ଶେଷ ଦିନରେ ବି ସେ ପ୍ରଚାର କରିବେ । ସବୁ ସଭାରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ସେ ସିଧାସଳଖ ଟାର୍ଗେଟ୍ କରିଛନ୍ତି । ୨୨ ବର୍ଷ ଶାସନର ହିସାବ ମାଗିଛନ୍ତି । ମୋଟାମୋଟି ଭାବେ ଦଳୀୟ ପ୍ରାର୍ଥୀ ପ୍ରଦୀପ ପୁରୋହିତଙ୍କୁ ଜିତାଇବା ପାଇଁ ଆପ୍ରାଣ ଚେଷ୍ଟା ଚଳାଇଛନ୍ତି । ଏହି ଉପନିର୍ବାଚନ ଫଳାଫଳ ଓଡ଼ିଶାରେ ତାଙ୍କ ଭବିଷ୍ୟତ ନିର୍ଣ୍ଣୟ କରିବାକୁ ଥିବାରୁ ସେ ଅକ୍ଲାନ୍ତ ପରିଶ୍ରମ କରୁଛନ୍ତି ।
ତାଙ୍କ ଦଳର ସାଂସଦ ଜୁଏଲ୍ ଓରାମ୍ ଆଜି ବିଜେଡି ପ୍ରାର୍ଥୀ ବର୍ଷା ସିଂ ବରିହାଙ୍କୁ ବ୍ୟକ୍ତିଗତ ଟାର୍ଗେଟ୍ କରି ବିବାଦୀୟ ମନ୍ତବ୍ୟ ଦେଇଛନ୍ତି । ଝାରବନ୍ଧ ବ୍ଲକ୍ ରେ ଏକ ନିର୍ବାଚନୀ ସଭାରେ ଭାଷଣ ଦେଇ ସେ କହିଛନ୍ତି, ବରିହାର ଝିଅ ହେଲେ ବି ସେ ବଳିୟାରସିଂହର ବୋହୂ । ଆମେ ତାଙ୍କୁ ବର୍ଷା ବରିହା କହିବା ଠିକ୍ ନୁହେଁ । ସେ ହେଉଛନ୍ତି ବର୍ଷା ବଳିୟାରସିଂହ । ଆମ ଜାତିର ନୁହଁନ୍ତି । ତାଙ୍କ ବାହାଘରରେ ଆମେ ଭୋଜି ଖାଇନୁ । ବରିହା ଭୋଜି ଦେଇନି କି ବଳିୟାରସିଂହ ବି ଦେଇନି । ଯିଏ ଜାତିର ନୁହେଁ, ସେ ପାର୍ଟିର ନୁହେଁ; ଯିଏ ପାର୍ଟିର ନୁହେଁ, ସେ ମାଟିର ନୁହେଁ ବୋଲି ଟିପ୍ପଣୀ ଦେଇଛନ୍ତି ଜୁଏଲ୍ । ଖାଲି ସେତିକି ନୁହେଁ, ପ୍ରଚାର ବେଳେ ବର୍ଷା କାନ୍ଦିବା ନେଇ ବି ସେ କଟାକ୍ଷ କରିଛନ୍ତି । ଝିଅ ବିଦା ହେଲା ବେଳେ କାନ୍ଦେ, ସେ ବିଦା ହୋଇଛନ୍ତି ତେଣୁ କାନ୍ଦୁଛନ୍ତି ବୋଲି ଜୁଏଲ୍ କହିଛନ୍ତି ।
ବର୍ଷାଙ୍କ ପ୍ରତି ଜୁଏଲ୍ ଙ୍କ ଏହି ମନ୍ତବ୍ୟ ପଦ୍ମପୁର ରାଜନୀତିରେ ନିଆଁ ଲଗାଇ ଦେଇଛି । ଏହାପୂର୍ବରୁ ବିରୋଧୀ ଦଳ ନେତା ଜୟନାରାୟଣ ମିଶ୍ର ବର୍ଷାଙ୍କ ଉପରେ ଅନୁରୂପ ମନ୍ତବ୍ୟ ଦେଇଥିଲେ । ଭୋଟ ପାଇଁ ବିଜେପି ନେତାମାନେ ଶାଳୀନତା ଭୁଲି ଯାଇଛନ୍ତି ଏବଂ ଜଣେ ମହିଳାଙ୍କୁ ଅସମ୍ମାନ କରି ଅଭଦ୍ରାମୀର ସୀମା ଟପିଯାଇଛନ୍ତି ବୋଲି ବିଜେଡି ନେତା ପ୍ରତିକ୍ରିୟା ଦେଇଛନ୍ତି । ଜୁଏଲ୍ ଙ୍କ ମନ୍ତବ୍ୟକୁ କଂଗ୍ରେସ ବି ନାପସନ୍ଦ କରିଛି ।
ଏହାପୂର୍ବରୁ ଆଜି ସକାଳେ ବର୍ଷାଙ୍କର ଏକ ଭିଡ଼ିଓ ସୋସିଆଲ୍ ମିଡିଆରେ ଭାଇରାଲ୍ ହୋଇଛି । ଏଥିରେ କୋହଭରା କଣ୍ଠରେ ବର୍ଷା କହିଛନ୍ତି- ମୁଁ ପଦ୍ମପୁରରେ ଜନ୍ମ ହୋଇଛି, ଏଠାରେ ପାଠ ପଢ଼ିଛି । କିନ୍ତୁ ମୋ ବାହାଘରକୁ ନେଇ ସୋସିଆଲ ମିଡିଆରେ ଚର୍ଚ୍ଚା ହେବା ମୋତେ ଆଘାତ ଦେଇଛି । ପୂର୍ବରୁ ଏ ବାବଦରେ ଚର୍ଚ୍ଚା ହେଉ ନ ଥିଲା । ମାତ୍ର ମୁଁ ପ୍ରାର୍ଥୀ ଭାବେ ଘୋଷଣା ହେବା ପରଠୁ ଏପରି ଅପପ୍ରଚାର କରାଯାଉଛି । ଏହା ମୋ ନାରୀତ୍ୱକୁ ଅପମାନ ପହଞ୍ଚାଉଛି । ମୋତେ ବହୁତ କଷ୍ଟ ଦେଉଛି ।
ବର୍ଷା କହିଛନ୍ତି, କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ବିହାର ଓ ମଧ୍ୟପ୍ରଦେଶରୁ ସାଂସଦ ହୋଇଛନ୍ତି । ମାତ୍ର ଓଡ଼ିଶାରୁ ରାଜନୀତି କରୁଛନ୍ତି । ପଦ୍ମପୁର ମୋ ନିଜ ମାଟି । ମୁଁ ଏଠାରୁ ରାଜନୀତି କରିପାରିବିନି କି? ମୋ ଜନ୍ମମାଟିଠୁ ଅଲଗା କରିବା ପାଇଁ ସେମାନେ ଗୋଟେ ହୀନ ରାଜନୀତି କରୁଛନ୍ତି । ଯେଉଁମାନେ ମୋତେ ଅପବାଦ କରୁଛନ୍ତି ସେମାନେ ମା’ ମାନଙ୍କୁ କିପରି ସମ୍ମାନ ଦିଆଯାଏ ମୁଖ୍ୟମନ୍ତ୍ରୀଙ୍କଠୁ ଶିଖିବା ଦରକାର ।
ଶେଷର ବର୍ଷା କହିଛନ୍ତି, ଯାହା ଯିଏ କହିବାର କୁହ, ମୁଁ କିନ୍ତୁ ପଦ୍ମପୁରରେ ଅଛି । ପଦ୍ମପୁର ଲୋକମାନଙ୍କ ସହ ସବୁବେଳେ ଠିଆ ହୋଇଥିବି । ପଦ୍ମପୁରର ସେବା କରୁଥିବି ।
