ପୁରୀ: ଶ୍ରୀମନ୍ଦିରରେ ପଥର ପଡ଼ି ଆହତ ହୋଇଥିବା ଜଣେ ସେବକଙ୍କ ପ୍ରତି ଶ୍ରୀମନ୍ଦିର ମୁଖ୍ୟ ପ୍ରଶାସକ ଡ. କ୍ରିଷନ୍ କୁମାରଙ୍କ ଦରଦୀ ଭାବ ଆଜି ପୁରୀରେ ଚର୍ଚ୍ଚାର ବିଷୟ ହୋଇଛି । ମୁଖ୍ୟ ପ୍ରଶାସକ ନିଜେ ଆହତ ସେବକଙ୍କୁ ତାଙ୍କ ଘରେ ଯାଇ ଭେଟିବା ସହ ଭୁବନେଶ୍ୱରରେ ତାଙ୍କ ଚିକିତ୍ସାର ସମସ୍ତ ବନ୍ଦୋବସ୍ତ କରିଥିବାରୁ ସେବାୟତ ମହଲରେ ଭୁରି ଭୁରି ପ୍ରଶଂସା କରାଯାଇଛି ।
ଆଜି ସକାଳୁ ସକାଳୁ ଶ୍ରୀମନ୍ଦିର ପଶ୍ଚିମ ଦ୍ୱାରରେ ଥିବା ଉଗ୍ର ନୃସିଂହ ମନ୍ଦିରର ହିରଣ୍ୟକଶ୍ୟପଙ୍କ ମୂର୍ତ୍ତି ଖସିପଡ଼ିଥିଲା । ସେବକ କୁନୁ ଓରଫ୍ ଜମ୍ବେଶ୍ୱର ମହାପାତ୍ରଙ୍କ ଉପରେ ପଥର ଖସିପଡ଼ିବାରୁ ତାଙ୍କ ଗୋଡରେ ଗଭୀର ଆଘାତ ଲାଗିଥିଲା । ପ୍ରାଥମିକ ଚିକିତ୍ସା ପାଇଁ ତାଙ୍କୁ ତୁରନ୍ତ ଡାକ୍ତରଖାନା ନିଆଯାଇଥିଲା । ଏକ୍ସରେରୁ ଗୋଡ ଭାଙ୍ଗିଥିବା ଜଣାପଡ଼ିବା ପରେ ଡାକ୍ତରମାନେ ତାଙ୍କୁ ଭୁବନେଶ୍ୱର ରେଫର୍ କରିଥିଲେ । ମାତ୍ର କୌଣସି କାରଣରୁ ଶ୍ରୀ ମହାପାତ୍ର ଘରକୁ ପଳାଇ ଆସିଥିଲେ ।
