ଭୁବନେଶ୍ୱର: ବାଜା ବାଜୁଥିଲା । ବାଣ ଫୁଟୁଥିଲା । ଡିଜେ ତାଳରେ ନାଚୁଥିଲେ ବରଯାତ୍ରୀ । ବାହାଘର ବେଦୀରେ ମନ୍ତ୍ର ଉଚ୍ଚରଣ ସହ ବର କନ୍ୟାଙ୍କର ହାତଗଣ୍ଠି ବି ପଡ଼ିଥିଲା । ତେବେ ଇଏ କୌଣସି ସତ ସତିକା ବର କନ୍ୟାଙ୍କର ବାହାଘର ନ ଥିଲା । ଥିଲା କଂଗ୍ରେସର ଏକ ପଲିଟିକାଲ୍ ଷ୍ଟଣ୍ଟ୍ । ଆଜି ମାଷ୍ଟରକ୍ୟାଣ୍ଟିନ୍ ଛକରେ ବିଜେପିକୁ ବର ଏବଂ ବିଜେଡିକୁ କନିଆଁ ବେଶରେ ସଜେଇ ଏମିତି ବାହାଘର କରିଥିଲା ରାଜ୍ୟ କଂଗ୍ରେସ ।
ତ୍ର କଂଗ୍ରେସ ସଭାପତି ୟାସର ନୱାଜଙ୍କ ନେତୃତ୍ୱରେ ଆଜି ଏହି ଷ୍ଟଣ୍ଟ କରାଯାଇଥିଲା । ଏଥିପାଇଁ ପୂର୍ବରୁ ନିମନ୍ତ୍ରଣ କାର୍ଡ ବି ଛପାଯାଇଥିଲା । ଆଜି ସତସତିକା ବାହାଘର ଭଳି ଡିଜେ ବଜାଇ, ବାଣ ଫୁଟାଇ ବରଯାତ୍ରୀ ଆସିଥିଲେ । ବରଯାତ୍ରୀ ଦଳରେ ସାମିଲ ଥିଲେ ରାଜ୍ୟ ପ୍ରଭାରୀ ଡ. ଅଜୟ କୁମାର, ପିସିସି ସଭାପତି ଶରତ ପଟ୍ଟନାୟକ, ପୂର୍ବତନ ସଭାପତି ଜୟଦେବ ଜେନା, ପ୍ରଚାର କମିଟି ଅଧ୍ୟକ୍ଷ ବିଜୟ ପଟ୍ଟନାୟକ, ବରିଷ୍ଠ ବିଧାୟକ ସୁରେଶ ରାଉତରାୟ ପ୍ରମୁଖ । ଡିଜେ ତାଳେ ତାଳେ ଏହି ନେତାମାନେ ନାଚିଥିଲେ । ବିବାହ ବେଦୀରେ ବିଜେପି ଏବଂ ବିଜେଡି ମୁଖା ପିନ୍ଧି ବରକନ୍ୟା ବସିଥିଲେ । ସ୍ୱତନ୍ତ୍ର ଭାବେ ବ୍ରାହ୍ମଣ ସେମାନଙ୍କୁ ବିବାହ କରାଇବା ସହ ହାତଗଣ୍ଠି ଫିଟାଇଥିଲେ । ବିଜେପି ଓ ବିଜେଡି ମୁଖାଧାରୀ ବର କନ୍ୟା ଉଭୟଙ୍କୁ ଫୁଲମାଳ ପିନ୍ଧାଇଥିଲେ ।
ଶ୍ରୀ ନଓ୍ୱାଜ କହିଛନ୍ତି ଯେ ବିଜେଡ଼ି ଓ ବିଜେପି ସବୁ ନିଷ୍ପତିରେ ଏକ । କେବଳ ଲୋକଙ୍କୁ ଦେଖାଇବା ପାଇଁ ବିଧାନସଭାରେ କଳିର ଡ୍ରାମା କରନ୍ତି । କିନ୍ତୁ ଲୋକସଭାରେ ଏମାନଙ୍କର ଭୂମିକା ସ୍ଵାମୀ ସ୍ତ୍ରୀ ପରି । କଳା କୃଷି ଆଇନ, ଏନଆରସି, ସିଏଏ, ମଣିପୁର ଦଙ୍ଗା, ଜିଏସଟି ବୋଝ, ବିମୁଦ୍ରାୟନର ବିପର୍ଯ୍ୟସ୍ତ ପରିସ୍ଥିତି, ରାଷ୍ଟ୍ରପତି ଓ ଉପରାଷ୍ଟ୍ରପତି ନିର୍ବାଚନ ପ୍ରଭୃତି ପ୍ରସଙ୍ଗରେ ସଂସଦରେ ଏହି ବିଜେଡ଼ି ଓ ବିଜେପିର ଭୂମିକା ସ୍ଵାମୀ-ସ୍ତ୍ରୀ ଭୂମିକା ପରି ପରିଲିକ୍ଷିତ ହୋଇଛି। ସମସ୍ତ ପ୍ରସଙ୍ଗରେ ବିଜେଡ଼ି ବିଜେପିକୁ ଆଖୁବୁଜା ସମର୍ଥନ କରିଛି । ରେଳବାଇ ମନ୍ତ୍ରୀ ଅଶ୍ୱିନୀ ବୈଷ୍ଣବଙ୍କ ରାଜ୍ୟସଭା ନିର୍ବାଚନରେ ବିଜେଡ଼ି ବିଜେପି ଉଭୟଙ୍କର ପ୍ରାର୍ଥୀ ବୈଷ୍ଣବ ଥିଲେ । ଦୁଇଦଳ ମଧ୍ୟ ଏକାଠି ୯ ବର୍ଷ ଶାସନ କରିଛନ୍ତି। କେବଳ ଓଡ଼ିଶାର ଲୋକଙ୍କ ବିଭ୍ରାନ୍ତ କରିବାପାଇଁ ଓଡ଼ିଶାରେ ଏହି ଦୁଇଦଳ ମିଛରେ କଳି ଲାଗନ୍ତି। ଏଣୁ ତାଙ୍କର ସୁସମ୍ପର୍କକୁ ହୃଦୟଙ୍ଗମ କରି ଛାତ୍ର କଂଗ୍ରେସ ଏହି ବିବାହ ଉତ୍ସବ ଆୟୋଜନ କରିଥିଲା ।
