ଭୁୁବନେଶ୍ୱର: ଆଇଜି ଅରୁଣ ବୋଥ୍ରାଙ୍କ ନେତୃତ୍ୱରେ ୫ ଜଣିଆ ସ୍ପେଶାଲ୍ ଇନଭେଷ୍ଟିଗେସନ୍ ଟିମ୍(ଏସଆଇଟି) ନୟାଗଡ଼ ‘ପରୀ’ ମୃତ୍ୟୁ ଘଟଣାର ତଦନ୍ତ କରିବ । ଏହି ଟିମ୍ ରେ ଅଛନ୍ତି କ୍ରାଇମବ୍ରାଞ୍ଚ ଏସପି ଆର.କେ.ଦୋରା, ଏଏସପି ଆର.ସି. ଥମ୍ବ, ଇନସପେକ୍ଟର ନରେନ୍ଦ୍ର କୁମାର ବେହେରା ଏବଂ ଇନସପେକ୍ଟର ମମତାରାଣୀ ପଣ୍ଡା । ଆଜି ଗୃହ ବିଭାଗ ପକ୍ଷରୁ ଏହାର ବିଜ୍ଞପ୍ତି ପ୍ରକାଶ ପାଇବା ସହ ଜଣେ ବିଚାରପତିଙ୍କ ତତ୍ତ୍ୱାବଧାନ ପାଇଁ ହାଇକୋର୍ଟ ରେଜିଷ୍ଟ୍ରାର୍ ଙ୍କ ପାଖକୁ ଚିଠି ପଠାଯାଇଛି ।
ପ୍ରଥମେ କ୍ରାଇମବ୍ରାଞ୍ଚ ଏବଂ ଏବେ ଏସଆଇଟି ତଦନ୍ତ ଜରିଆରେ ନୟାଗଡ଼ର କୁନିଝିଅ ପରୀକୁ ନ୍ୟାୟ ଦେବା ପାଇଁ ସରକାର ତତ୍ପରତା ଦେଖାଇଥିଲେ ମଧ୍ୟ ମୁଖ୍ୟ ବିରୋଧୀ ଦଳ ବିଜେପି ଏହାକୁ ଗ୍ରହଣ କରିନାହିଁ । ପରୀ ମୃତ୍ୟୁ ଘଟଣାର ସିବିଆଇ ତଦନ୍ତ ଏବଂ ମନ୍ତ୍ରୀ ଅରୁଣ ସାହୁଙ୍କ ଇସ୍ତଫା ଦାବିରେ ଅଟଳ ରହି ସେମାନେ ଲଗାତର ତୃତୀୟ ଦିନ ପାଇଁ ଗୃହକୁ ସମ୍ପୂର୍ଣ୍ଣ ଅଚଳ କରିଛନ୍ତି ।
ଦାବି ପୂରଣ ନ ହେଲା ଯାଏଁ ସେମାନେ ହଟିବେ ନାହିଁ ବୋଲି ବିରୋଧୀ ଦଳ ନେତା ପ୍ରଦୀପ୍ତ ନାୟକ ଏବଂ ବିଧାୟକ ବିଷ୍ଣୁ ସେଠୀ ସ୍ପଷ୍ଟ କରିଛନ୍ତି । ଆଜି ବିଧାନସଭା ଆରମ୍ଭ କ୍ଷଣି ବିଜେପି ବିଧାୟକମାନେ ଗୃହର ମଧ୍ୟଭାଗକୁ ଚାଲି ଆସି ପୂର୍ବଭଳି ନାରାବାଜି, ହଟ୍ଟଗୋଳ କରିଥିଲେ । ଫଳ ଗୃହ ଚାଲିପାରି ନ ଥିଲା । ଅପରାହ୍ନ ଅଧିବେସନରେ ବିରୋଧୀ ଦଳ ମୁଖ୍ୟ ସଚେତକ ମୋହନ ମାଝୀ ବାଚସ୍ପତିଙ୍କ ପୋଡିୟମ୍ ଉପରକୁ ଚଢ଼ି ମାଇକ୍ ଭାଙ୍ଗିଦେଇଥିଲେ । ବିଜେପି ବିଧାୟକଙ୍କ ପ୍ରବଳ ହଟ୍ଟଗୋଳ ଯୋଗୁଁ ଆଜି ପଞ୍ଚାୟତିରାଜ ବିଭାଗର ଖର୍ଚ୍ଚ ଦାବି ଆଲୋଚନା ସମ୍ଭବ ହୋଇ ନ ଥିଲା ।
ଗୃହର ମୂଲ୍ୟବାନ ସମୟ ନଷ୍ଟ କରି ବିଜେପିର ଏଭଳି ଆଭିମୁଖ୍ୟକୁ ବିଜେଡ଼ି କଡ଼ା ସମାଲୋଚନା କରିଥିବା ବେଳେ ଆଜି କଂଗ୍ରେସ ମଧ୍ୟ ବିଜେପିର ଆଭିମୁଖ୍ୟକୁ ନାପସନ୍ଦ କରିଛି । କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର କହିଛନ୍ତି, ଆମେ ଏସଆଇଟି ତଦନ୍ତ ଦାବି କରିଥିଲୁ । ହାଇକୋର୍ଟ ବିଚାରପତିଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ପରୀ ମୃତ୍ୟୁ ଘଟଣାର ଏସଆଇଟି ତଦନ୍ତ ଘୋଷଣା ହୋଇଥିବାରୁ ଆଉ ପାଟିତୁଣ୍ଡର ଆବଶ୍ୟକତା ନାହିଁ । ଜଣେ ମନ୍ତ୍ରୀ ହାଇକୋର୍ଟଙ୍କୁ ପ୍ରଭାବିତ କରି ତଦନ୍ତକୁ ଦିଗହରା କରିବା ସମ୍ଭବ କି ବୋଲି ବିଜେପିର ଦାବି ପରିପ୍ରେକ୍ଷୀରେ ଶ୍ରୀ ମିଶ୍ର ପ୍ରଶ୍ନ କରିଛନ୍ତି ।
ଆଜି ଗୃହ କାର୍ଯ୍ୟ ଆରମ୍ଭରୁ ବିଜେପି ସଦସ୍ୟଙ୍କ ହଟ୍ଟଗୋଳ ମଧ୍ୟରେ ସଂସଦୀୟ ବ୍ୟାପାର ମନ୍ତ୍ରୀ ବିକ୍ରମ କେଶରୀ ଆରୁଖ ଏକ ବିବୃତ୍ତି ଜରିଆରେ ଏସଆଇଟି ତଦନ୍ତ ପାଇଁ ମୁଖ୍ୟମନ୍ତ୍ରୀଙ୍କ ଘୋଷଣାରେ ସୃଷ୍ଟି ହୋଇଥିବା ଦ୍ୱନ୍ଦ ଦୂର କରିଥିଲେ । ହାଇକୋର୍ଟଙ୍କ ତତ୍ତ୍ୱାବଧାନରେ ଏସଆଇଟି ମାମଲାର ତଦନ୍ତ କରିବ ଏବଂ ଗୃହ ବିଭାଗ ପକ୍ଷରୁ ଖୁବ୍ ଶୀଘ୍ର ଏହାର ବିଜ୍ଞପ୍ତି ପ୍ରକାଶ ପାଇବ ବୋଲି ଗୃହକୁ ଅବଗତ କରାଇଥିଲେ । ସଂସଦୀୟ ମନ୍ତ୍ରୀଙ୍କ ବିବୃତ୍ତିର କିଛି ସମୟ ପରେ ଗୃହ ବିଭାଗ ପକ୍ଷରୁ ଏସଆଇଟି ଗଠନ ବିଜ୍ଞପ୍ତି ପ୍ରକାଶ ପାଇଥିଲା ।
ଏସଆଇଟି ଦ୍ୱାରା ତଦନ୍ତ କରିବାକୁ କଂଗ୍ରେସର ଦାବି ପୂରଣ ହେବା ପରେ ବିଧାୟକମାନେ ନରମ ପଡ଼ିଥିଲେ ମଧ୍ୟ ବାଚସ୍ପତିଙ୍କ ନିର୍ଦ୍ଦେଶରେ ବୁଧବାର ଦିନ ଗୃହ ରାଷ୍ଟ୍ରମନ୍ତ୍ରୀ ଦେଇଥିବା ବିବୃତି ଉପରେ ବିଧାୟକ ଦଳ ନେତା ନରସିଂହ ମିଶ୍ର ଆପତ୍ତି ଉଠାଇଥିଲେ । ରାଷ୍ଟ୍ରମନ୍ତ୍ରୀ କେବଳ କ୍ରାଇମବ୍ରାଞ୍ଚ ତଦନ୍ତ କଥା କହିଥିଲେ ମଧ୍ୟ ଅନ୍ୟ ୩ଟି ପ୍ରସଙ୍ଗ ଉପରେ କାହିଁକି ଜବାବ ରଖିଲେ ନାହିଁ ତାହା ଜାଣିବାକୁ ଚାହିଁଥିଲେ । ଏହାକୁ ନେଇ କଂଗ୍ରେସ ବିଧାୟକମାନେ ହୋ ହଲ୍ଲା କରିଥିଲେ ।
