ଭୁୁବନେଶ୍ୱର: ଆଗ ପ୍ୟାଣ୍ଟ ଓ କୋର୍ଟ ପିନ୍ଧାଇ ଦିଆଗଲା । ବିରୋଧ ହେବାରୁ ଦେହରୁ ପ୍ୟାଣ୍ଟ କୋର୍ଟ ହଟାଇ ଧୋତି ପଞ୍ଜାବୀ ପିନ୍ଧାଇ ଦିଆଗଲା । ନବବାବୁ କାହିଁକି ଓଡିଶାରେ ଏମିତି ପାଦ ପର୍ଯ୍ୟନ୍ତ ଲମ୍ବିଥିବା ଧୋତି କେହି କେବେ ପିନ୍ଧି ନ ଥିବେ । ବରେଣ୍ୟ ପୁରୁଷ ପୂର୍ବତନ ମୁଖ୍ୟମନ୍ତ୍ରୀ ନବକୃଷ୍ଣ ଚୌଧୁରୀଙ୍କ ପ୍ରତିମୂର୍ତ୍ତିକୁ ତାଙ୍କ କର୍ମମାଟି ଅନୁଗୁଳ ପୌରପାଳିକା ଏମିତି ଜୋକର୍ ରୂପ ଦେବା ଏବଂ ଜନସାଧାରଣଙ୍କ ଭୀଷଣ ପ୍ରତିକ୍ରିୟା ପରେ ସରକାର ହସ୍ତକ୍ଷେପ କରିବାକୁ ବାଧ୍ୟ ହୋଇଛନ୍ତି ।
ଅନୁଗୁଳର ଗୋପବନ୍ଧୁ ପାର୍କରେ ସ୍ଥାପିତ ନବକୃଷ୍ଣ ଚୌଧୁରୀଙ୍କ ବିକୃତ ପ୍ରତିମୂର୍ତ୍ତିକୁ ରାଜ୍ୟ ସରକାର ଆଜି ହଟାଇ ଦେଇଛନ୍ତି । ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶକ୍ରମେ ଏହାକୁ ହଟା ଯାଇଥିବା ସୂଚନା ଓ ଲୋକସମ୍ପର୍କ ବିଭାଗ ପକ୍ଷରୁ ଜାରି ଏକ ପ୍ରେସ୍ ବିଜ୍ଞପ୍ତିରେ କୁହାଯାଇଛି । ବିଧାନସଭା ସମ୍ମୁଖରେ ନିର୍ମିତ ପ୍ରତିମୂର୍ତ୍ତି ଢ଼ାଞ୍ଚାରେ ଅନୁଗୁଳ ସହରରେ ନୂତନ ପୂର୍ଣ୍ଣାବୟବ ପ୍ରତିମୂର୍ତ୍ତି ନିର୍ମାଣ ହେବ । ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ ପକ୍ଷରୁ ସମସ୍ତ କାର୍ଯ୍ୟର ତଦାରଖ କରିବାକୁ ରାଜ୍ୟ ସରକାର ନିଷ୍ପତ୍ତି ନେଇଛନ୍ତି ।
ଖାଲି ସେତିକି ନୁହେଁ, ନବକୃଷ୍ଣ ଚୌଧୁରୀ ଓ ମାଳତୀ ଦେବୀଙ୍କ ଅନୁଷ୍ଠାନ ବାଜି ରାଉତ ଛାତ୍ରାବାସର ପୁନରୁଦ୍ଧାର ଓ ସଂରକ୍ଷଣ ତଥା ସମୂହ ବିକାଶ ପାଇଁ ସରକାର ଯଥାଶୀଘ୍ର ପଦକ୍ଷେପ ନେବେ ବୋଲି କୁହାଯାଇଛି । ସଂସ୍କୃତି ବିଭାଗର ନିର୍ଦ୍ଦେଶକଙ୍କ ନେତୃତ୍ୱରେ ଏକ ଉଚ୍ଚସ୍ତରୀୟ ଅଫିସର ଦଳ ଆସନ୍ତାକାଲି(ଗୁରୁବାର) ବାଜି ରାଉତ ଛାତ୍ରାବାସ ଗସ୍ତ କରିବେ । ଏହି ଅଫିସର ଦଳରେ ଓବିସିସିର ପରିଚାଳନା ନିର୍ଦ୍ଦେଶକ, ସଂସ୍କୃତି ବିଭାଗ ଯୁଗ୍ମ ନିର୍ଦ୍ଦେଶକ ଏବଂ ଉତ୍କଳମଣି ପଣ୍ଡିତ ଗୋପବନ୍ଧୁ ଦାସଙ୍କ ଜନ୍ମପୀଠ ସୁଆଣ୍ଡୋର ସଂରକ୍ଷଣ ତଥା ନିର୍ମାଣ କାର୍ଯ୍ୟରେ ନିୟୋଜକ ଶିଳ୍ପୀ ଜୟନ୍ତ ଦାସ ଅନୁଗୁଳ ଗସ୍ତ କରିବେ ।
ତେବେ ନବକୃଷ୍ଣ ଚୌଧୁରୀଙ୍କ ପ୍ରତିମୂର୍ତ୍ତିକୁ ଦୁଇ ଦୁଇ ଥର ବିକୃତ କରିଥିବା ଅନୁଗୁଳ ପୌରପାଳିକା ଉପରେ କୌଣସି କାର୍ଯ୍ୟାନୁଷ୍ଠାନ ନିଆଯାଇନାହିଁ । ଏଭଳି ଅକ୍ଷମଣୀୟ ଭୁଲ୍ କୁ ସରକାର ହାଲକା ଭାବେ ନେବା ଉଚିତ ନୁହେଁ ବୋଲି ସଚେତନ ନାଗରିକମାନେ ମତ ଦେଇଛନ୍ତି ।
ସୂଚନାଯୋଗ୍ୟ, ଉତ୍କଳ ଦିବସରେ ଅନୁଗୁଳ ଗୋପବନ୍ଧୁ ପାର୍କରେ ସ୍ୱାଧୀନତା ସଂଗ୍ରାମୀଙ୍କର ପ୍ରତିମୂର୍ତ୍ତି ସ୍ଥାପନ କରିବାକୁ ପୌର ପ୍ରଶାସନ ଆଗ୍ରହ ପ୍ରକାଶ କରି ତିନିମାସ ତଳୁ କାମ ଆରମ୍ଭ କରିଥିଲା । ନାଗପୁରରୁ ମିସ୍ତ୍ରୀ ଅଣାଯାଇ ନବକୃଷ୍ଣ ଚୌଧୁରୀଙ୍କର ଏକ ପାସପୋର୍ଟ ଧରାଇ ଦିଆଗଲା । ଏହି ଫଟୋରୁ ସଂଗ୍ରାମୀଙ୍କର ପୂର୍ଣ୍ଣ ଅବୟବ ପ୍ରତିମୂର୍ତ୍ତି ତିଆରି କରିବାକୁ କୁହାଗଲା । ଫଟୋରେ ନବବାବୁ ସାର୍ଟ ପିନ୍ଧିଥିଲେ, ତାଙ୍କୁୁ ପ୍ୟାଣ୍ଟ ପିନ୍ଧାଇ ଦିଆଗଲା । ପାଦରେ ବୁଟ୍ ଗଳାଇ ଦିଆଗଲା । ପ୍ରତିମୂର୍ତ୍ତି ଅନାବରଣ ପରେ ବିଭିନ୍ନ ମହଲରୁ ତୀବ୍ର ପ୍ରତିକ୍ରିୟା ଆସିବା ପରେ ଅନୁଗୁଳ ନଗରପାଳ ଅକ୍ଷୟ ସାମନ୍ତ ଲିଖିତ ଭାବେ କ୍ଷମାପ୍ରାର୍ଥନା କରିଥିଲେ । ତ୍ରୁଟିର ସଂଶୋଧନ କରାଯାଉଛି ବୋଲି କହିଥିଲେ ।
ଏହି ତ୍ରୁଟିର ସଂଶୋଧନ ଏମିତି ହେଲା.. । ରାତାରାତି ଭାଙ୍ଗି ପ୍ୟାଣ୍ଟକୁ ବଦଳାଇ ଧୋତି ପଞ୍ଜାବୀ ବଦଳାଇ ଧୋତି ପଞ୍ଜାବୀ ପିନ୍ଧାଇ ଦିଆଗଲା । ନବବାବୁ ଆଣ୍ଠୁ ଲୁଚୁ ନ ଥିବା ଧୋତି ପିନ୍ଧୁଥିଲା ବେଳେ ପ୍ରତିମୂର୍ତ୍ତିରେ ତାଙ୍କୁ ପାଦ ପର୍ଯ୍ୟନ୍ତ ଧୋତି ପିନ୍ଧାଇ ଦିଆଗଲା । ଓଡିଆମାନେ ଏମିତି ଧୋତି ଜମାରୁ ପିନ୍ଧନ୍ତି ନାହିଁ ।
