ସୌମ୍ୟବାହିନୀ କେଳେଙ୍କାରୀ: ମିଶନ ଶକ୍ତି ଗୃହ ନିର୍ମାଣ ପାଇଁ ଆସିଥିବା ଟଙ୍କା ଚଳୁ

ଭୁବନେଶ୍ୱର: ଖଣ୍ଡପଡ଼ା ନିର୍ବାଚନମଣ୍ଡଳୀର ବାହୁବଳୀ ବିଜେଡ଼ି ନେତା ତଥା ଭାପୁର ବ୍ଲକ୍ ଭାରପ୍ରାପ୍ତ ଅଧ୍ୟକ୍ଷ ଗୟାଧର ପରିଡ଼ାଙ୍କ ବିରୋଧରେ ଗୋଟିକ ପରେ ଗୋଟିଏ ଦୁର୍ନୀତି ଅଭିଯୋଗ ଆସିବାରେ ଲାଗିଛି । ମିଶନ ଶକ୍ତି ଗୃହ ନିର୍ମାଣ ପାଇଁ ଆସିଥିବା ସାଢ଼େ ୪ ଲକ୍ଷ ଅନୁଦାନ ଅର୍ଥକୁ ମିଥ୍ୟା ବିଲ୍ ଜରିଆରେ ହଡ଼ପ କରାଯାଇଥିବାର ଏକ ନିର୍ଦ୍ଦିଷ୍ଟ ଅଭିଯୋଗ ବିଭାଗୀୟ ସଚିବ ଶ୍ରୀମତୀ ସୁଜାତା କାର୍ତ୍ତିକେୟନ୍ ଙ୍କ ପାଖକୁ ଆସିଛି । ସ୍ୱୟଂ ସହାୟକ ଗୋଷ୍ଠୀର ମା’ ମାନଙ୍କୁ ଗୟାଧର ଅଶ୍ଲୀଳ ଭାଷାରେ ଗାଳିଗୁଲଜ କରି ଦୁର୍ବ୍ୟବହାର କରିଥିବା ଏଥିରେ ଦର୍ଶାଯାଇଛି ।

ଭାପୁର ବ୍ଲକ୍ ଫତେଗଡ଼ ଗ୍ରାମ ପଞ୍ଚାୟତର ୪ ଟି ମହିଳା ସ୍ୱଂୟ ସହାୟକ ଗୋଷ୍ଠୀର ସଭାନେତ୍ରୀମାନେ ଏହି ଅଭିଯୋଗ କରିଛନ୍ତି । ଏହି ସ୍ୱୟଂ ସହାୟକ ଗୋଷ୍ଠୀଗୁଡ଼ିକ ହେଲା- ମା’ ଭଗବତୀ ମହିଳା ସ୍ୱୟଂ ସହାୟିକା ଗୋଷ୍ଠୀ, ସାଇଦୁର୍ଗା ମହିଳା ସ୍ୱୟଂ ସହାୟିକା ଗୋଷ୍ଠୀ, ମା’ କାଳିକା ମହିଳା ସ୍ୱୟଂ ସହାୟିକା ଗୋଷ୍ଠୀ ଏବଂ ତୁଳସୀ ମହିଳା ସ୍ୱୟଂ ସହାୟିକା ଗୋଷ୍ଠୀ ।

ସେମାନେ ଉଲ୍ଲେଖ କରିଛନ୍ତି ଯେ ରାଜ୍ୟ ସରକାର ଓ ମିଶନ ଶକ୍ତି ବିଭାଗର ସହଯୋଗ ଏବଂ ଉଦ୍ୟମରେ ଗ୍ରାମାଞ୍ଚଳରେ ମହିଳା ସ୍ୱୟଂ ସହାୟକ ଗୋଷ୍ଠୀ ଦ୍ୱାରା ରାଜ୍ୟରେ ମହିଳା ସଶକ୍ତିକରଣ କ୍ଷେତ୍ରରେ ଆମ ପରି ମହିଳାମାନଙ୍କୁ ଆତ୍ମନିର୍ଭର ହେବାରେ ଏକ ନୂଆ ପରିଚୟ ଦେଇଛି । କିନ୍ତୁ ଦୁଃଖ ଓ ପରିତାପର ବିଷୟ ଯେ ଆମ ଗ୍ରାମ ପଞ୍ଚାୟତରେ ଏକ ମହିଳା ଶକ୍ତି ମିଶନ ଗୃହ ନିର୍ମାଣ ପାଇଁ ଅନୁଦାନ ଆସିଥିବା ୪,୫୦,୦୦୦ ଟଙ୍କା ଫତେଗଡ଼ ଗ୍ରାମ ପଞ୍ଚାୟତର ତୋଫାନ କୁମାର ପ୍ରଧାନ ଏବଂ ମୁଖ୍ୟ ଷଡ଼ଯନ୍ତ୍ରକାରୀ ଗୟାଧର ପରିଡ଼ା ଏବଂ କିଛି ଅସାଧୁ କର୍ମଚାରୀଙ୍କ ଦ୍ୱାରା ମିଥ୍ୟା କାଗଜପତ୍ର ଓ ମିଥ୍ୟା ବିଲ୍ ପ୍ରସ୍ତୁତ କରି ଆତ୍ମସାତ କରିଛନ୍ତି ।

ଏ ସମ୍ପର୍କରେ ଗୟାଧର ପରିଡ଼ାଙ୍କୁ ପଚାରିବାରୁ ସେ ସମସ୍ତ ସ୍ୱୟଂ ସହାୟକ ଗୋଷ୍ଠୀର ମା’ ମାନଙ୍କୁ ଅସଭ୍ୟ ଅଶ୍ଲୀଳ ଶବ୍ଦ ଗାଳି କରି ଆମ୍ଭ ସମସ୍ତଙ୍କୁ ଦୁର୍ବ୍ୟବହାର କରିଥିଲେ । ଏହି ଦୁର୍ନୀତିର ଉପଯୁକ୍ତ ତଦନ୍ତ କରି ତୁରନ୍ତ କାର୍ଯ୍ୟାନୁଷ୍ଠାନ ନିଆଯାଉ ବୋଲି ସେମାନେ ଦାବି କରିଛନ୍ତି ।

ଆଉ କିଛି ଅଭିଯୋଗ ଅନୁଯାୟୀ, କେବଳ ଫତେଗଡ଼ ନୁହେଁ, ଭାପୁରର ୨୦ଟି ପଞ୍ଚାୟତରେ ସମାନ ଅବସ୍ଥା । ମିଶନ ଗୃହ ପାଇଁ ଆସିଥିବା ସମସ୍ତ ଟଙ୍କା ଆତ୍ମସାତ କରାଯାଇଛି । କୌଣସି ଜାଗାରେ ମାଟି ଗାଣ୍ଡୁଆଟେ ପଡ଼ିନି ।

ସୂଚନାଥାଉକି, ଦଳିତ ବର୍ଗର ବ୍ଲକ୍ ଅଧ୍ୟକ୍ଷା ଶାନ୍ତିଲତା ବେହେରାଙ୍କ ଦସ୍ତଖତ ଓ ଲେଟର୍ ପ୍ୟାଡ୍ କୁ ଜାଲ୍ କରି ଉପାଧ୍ୟକ୍ଷ ଗୟାଧର ପରିଡ଼ା ୮୦ କୋଟି ଟଙ୍କାର ମିଥ୍ୟା ବିଲ୍ କରାଇ ନେଇଥିବା ଅଭିଯୋଗ ଗତ ମାସରେ ହଇଚଇ ସୃଷ୍ଟି କରିଥିଲା । ତେବେ ଦଳିତ ଶାନ୍ତିଲତାଙ୍କ ଅଭିଯୋଗ ତାଙ୍କ ପାଇଁ ମହଙ୍ଗା ହେଲା । ସ୍ଥାନୀୟ ବିଧାୟକ ସୌମ୍ୟରଞ୍ଜନ ପଟ୍ଟନାୟକଙ୍କ ପ୍ରଚ୍ଛନ୍ନ ସହଯୋଗରେ ଶାନ୍ତିଲତାଙ୍କ ବିରୋଧରେ ଅନାସ୍ଥା ପ୍ରସ୍ତାବ ଅଣାଯାଇ ହଟାଇ ଦିଆଗଲା ।

ଇତିମଧ୍ୟରେ ଉପଜିଲ୍ଲାପାଳଙ୍କ ତଦନ୍ତ ରିପୋର୍ଟରେ ଶାନ୍ତିଲତାଙ୍କ ଅଭିଯୋଗର ସତ୍ୟତା ପ୍ରମାଣିତ ହୋଇଥିଲେ ମଧ୍ୟ ଗୟାଧରଙ୍କ ବିରୋଧରେ କାର୍ଯ୍ୟାନୁଷ୍ଠାନ ନାହିଁ । ଫତେଗଡ଼ ପୁଲିସ ବି ଶାନ୍ତିଲତାଙ୍କ ଏତଲା ଉପରେ ଚୁପ୍ ବସିଯାଇଛି । ଜିଲ୍ଲା ପ୍ରଶାସନ ଓ ପୁଲିସର ନିରବଦ୍ରଷ୍ଟାକୁ ନେଇ ସ୍ଥାନୀୟ ଅଞ୍ଚଳରେ ପ୍ରତିକ୍ରିୟା ସୃଷ୍ଟି କରିଛି । ଦୁର୍ନୀତି ଓ ଅରାଜକତା ପାଇଁ ସହଯୋଗ କରିଥିବା ବିଧାୟକଙ୍କ ବିରୋଧରେ ମଧ୍ୟ ପ୍ରବଳ ଜନ ଅସନ୍ତୋଷ ସୃଷ୍ଟି ହୋଇଛି ।

ଏବେ ସ୍ୱୟଂ ସହାୟକ ଗୋଷ୍ଠୀର ମା’ ମାନଙ୍କ ଅଭିଯୋଗ ଉପରେ ବିଭାଗୀୟ ସଚିବ କି କାର୍ଯ୍ୟାନୁଷ୍ଠାନ ନେଉଛନ୍ତି ତାହାକୁ ଅଞ୍ଚଳବାସୀ ଅପେକ୍ଷା କରିଛନ୍ତି ।

ସ୍ୱୟଂ ସହାୟକ ଗୋଷ୍ଠୀ ମା’ ମାନଙ୍କ ଅଭିଯୋଗ ସଂକ୍ରାନ୍ତରେ ଗୟାଧର ପରିଡ଼ାଙ୍କ ପ୍ରତିକ୍ରିୟା ଆଣିବା ପାଇଁ ଆମେ ଉଦ୍ୟମ କରିଥିଲୁ । ମାତ୍ର ଯୋଗାଯୋଗ ସମ୍ଭବ ହୋଇନାହିଁ ।