ପୁଲିସ କ୍ଲିନଚିଟ୍ ପାଇଥିବା ଡିଏଫଓଙ୍କୁ ଘାଣ୍ଟିଲା କ୍ରାଇମବ୍ରାଞ୍ଚ

ଭୁୁବନେଶ୍ୱର: ପାରଳାଖେମୁଣ୍ଡି ଏସିଏଫ୍ ସୌମ୍ୟରଞ୍ଜନ ମହାପାତ୍ର ମୃତ୍ୟୁ ମାମଲାରେ ଡିଏଫଓ ସଂଗ୍ରାମ କେଶରୀ ବେହେରାଙ୍କୁ ଆଜି କ୍ରାଇମବ୍ରାଞ୍ଚ ଟିମ୍ ପ୍ରାୟ ତିନି ଘଣ୍ଟା କାଳ ଜେରା କରିଛନ୍ତି । ପୁଲିସ କ୍ଲିନଚିଟପ୍ରାପ୍ତ ଏହି ଅଧିକାରୀଙ୍କୁ କ୍ରାଇବ୍ରାଞ୍ଚ ଅଧିକାରୀମାନେ ଗୁଡ଼େଇ ତୁଡ଼େଇ ପ୍ରଶ୍ନ କରିଥିଲେ । ଆବଶ୍ୟକ ପଡ଼ିଲେ ଡିଏଫଓ ଏବଂ ବିଦ୍ୟାଭାରତୀଙ୍କ ଲାଇ ଡିଟେକ୍ସନ୍ ଟେଷ୍ଟ ହେବ ବୋଲି ସୂଚନା ମିଳିଥିବାରୁ ମାମଲାରେ ଡିଏଫଓଙ୍କ ସଂପୃକ୍ତି ସମ୍ପର୍କରେ କ୍ରାଇବ୍ରାଞ୍ଚ ହାତରେ କିଛି ଠୋସ୍ ତଥ୍ୟ ଲାଗିଥିବା ସନ୍ଦେହ କରାଯାଉଛି ।

ଗୁରୁତ୍ୱପୂର୍ଣ୍ଣ କଥା ହେଉଛି, ପାରଳାଖେମୁଣ୍ଡି ଡାକ୍ତରଖାନାରେ ସୌମ୍ୟଙ୍କ ମୃତ୍ୟୁକାଳୀନ ଜମାନବନ୍ଦୀ ରେକର୍ଡ ବେଳେ ଡିଏଫଓ ସେଠାରେ ଉପସ୍ଥିତ ଥିଲେ ମଧ୍ୟ ଏହା ଚପି ଯାଇଥିଲା । ପୁଲିସ ତଦନ୍ତ ବେଳେ ଏ ଦିଗକୁ ଯାଇ ନ ଥିଲା । ଡିଏଫଓଙ୍କୁ ନାମକୁ ମାତ୍ର ପଚରାଉଚୁରା କରିବା ପରେ ଏସପି ସାମ୍ବାଦିକ ସମ୍ମିଳନୀ ଡାକି ତାଙ୍କୁ କ୍ଲିନଚିଟ୍ ଦେଇଦେଇଥିଲେ । ତେବେ କ୍ରାଇବ୍ରାଞ୍ଚ ମାମଲାର ତଦନ୍ତ ଭାର ନେଲା ପରେ ଡିଏଫଓଙ୍କ ଭୂମିକାକୁ ନେଇ ପୁଣି ଚର୍ଚ୍ଚା ଆରମ୍ଭ ହୋଇଛି ।

ଗତକାଲି ସୋସିଆଲ୍ ମିଡ଼ିଆରେ ଭାଇରାଲ୍ ହୋଇଥିବା ଏକ ଭିଡ଼ିଓରୁ ଏକ ନିଚ୍ଛକ ତଥ୍ୟ ପଦାକୁ ଆସିଥିଲା । ସୌମ୍ୟଙ୍କ ମୃତ୍ୟୁକାଳୀନ ଜମାନବନ୍ଦୀ ରେକର୍ଡ ବେଳେ ଡିଏଫଓ ସେଠାରେ ଉପସ୍ଥିତ ଥିବା ଏହି ଭିଡ଼ିଓ କହୁଛି । ନିଜେ ଡିଏଫଓ ଏହି ବିଷୟକୁ ଗୋପନ ରଖିଥିଲେ । ସେଠାରେ ଉପସ୍ଥିତ ସୌମ୍ୟମ୍ୟଙ୍କ ପତ୍ନୀ ବିଦ୍ୟାଭାରତୀ ମଧ୍ୟ ଗୋପନ ରଖିଥିଲେ । ଡ୍ୟୁଟିରେ ଥିବା ଡାକ୍ତର କି ତଦନ୍ତକାରୀ ପୁଲିସ ମଧ୍ୟ ଏହାକୁ ଗୋପନ ରଖିଥିଲେ । ସୁତରାଂ ସୌମ୍ୟଙ୍କ ମୃତ୍ୟୁକାଳୀନ ଜମାନବନ୍ଦୀ ରେକର୍ଡ ବେଳେ ଡିଏଫଓଙ୍କ ଉପସ୍ଥିତିକୁ କୌଣସି କାରଣରୁ ମିଳିମିଶି ଚାପି ଦେଇଥିଲେ ।

ପାଖାପାଖି ଦେଢ଼ମାସ ପରେ ଏହାର ଭିଡ଼ିଓ ଭାଇରାଲ୍ ହୋଇଥିବାରୁ ଡିଏଫଓ ଫାଙ୍କି ପାରିନାହାନ୍ତି । ଆଜି ଜେରା ବେଳେ ଡିଏଫଓ ସେଦିନ ନିଜର ଉପସ୍ଥିତି ସମ୍ପର୍କରେ ମାନିଥିବା କ୍ରାଇବ୍ରାଞ୍ଚ ଡିଏସପି ଜ୍ଞାନରଞ୍ଜନ ମିଶ୍ର ଗଣମାଧ୍ୟମକୁ କହିଛନ୍ତି ।

ତେବେ ସାମ୍ବାଦିକମାନଙ୍କ ଆଗରେ ଡିଏଫଓ କିନ୍ତୁ ଏହା ମାନିନାହାନ୍ତି । ସୌମ୍ୟଙ୍କ ମୃତ୍ୟୁକାଳୀନ ଜମାନବନ୍ଦୀ ରେକର୍ଡ ବେଳେ ସେ ଉପସ୍ଥିତ ଥିଲେ ନା ନାହିଁ ବୋଲି ସାମ୍ବାଦିକମାନେ ପ୍ରଶ୍ନ କରିବାରୁ ନା ବୋଲି କହିଥିଲେ । ସାମ୍ବାଦିକମାନେ ତାଙ୍କୁ ଆଉ କିଛି ପ୍ରଶ୍ନ କରିବାରୁ ଡିଏଫଓ ଉତକ୍ଷିପ୍ତ ହୋଇଯାଇଥିଲେ । ଆଉ କୌଣସି ପ୍ରଶ୍ନର ଜବାବ ଦେଇ ନ ଥିଲେ ।

ସୂଚନାଥାଉକି, ସୌମ୍ୟଙ୍କ ମୃତ୍ୟୁ ପାଇଁ ପତ୍ନୀ ବିଦ୍ୟାଭାରତୀଙ୍କ ସମେତ ଡିଏଫଓ ଓ ରୋଷେୟାଙ୍କୁ ଦାୟୀ କରି ତାଙ୍କ ବାପା ଥାନାରେ ଏତଲା ଦେଇଛନ୍ତି । ବିଦ୍ୟାଭାରତୀ ଓ ଡିଏଫଓଙ୍କ ମଧ୍ୟରେ ଅନୈତିକ ସମ୍ପର୍କ ଥିଲା ଏବଂ ସେହି କାରଣରୁ ସୌମ୍ୟଙ୍କୁ ଯୋଜନାବଦ୍ଧ ହତ୍ୟା କରାଯାଇଥିବା ବାପାଙ୍କ ଅଭିଯୋଗକ୍ରମେ ପୁଲିସ ହତ୍ୟା ଓ ଅପରାଧିକ ଷଡ଼ଯନ୍ତ୍ର ମାମଲା ରୁଜୁ କରିଛି । ତେବେ ତଦନ୍ତକାରୀ ପୁଲିସ ଡିଏଫଓଙ୍କୁ ମାତ୍ର କେଇ ଘଣ୍ଟାର ଜେରା ପରେ କ୍ଲିନଚିଟ୍ ଦେବା ସମସ୍ତଙ୍କୁ ଚକିତ କରିଥିଲା । ରୋଷେୟା ମନ୍ମଥଙ୍କୁ ମଧ୍ୟ କ୍ଲିନଚିଟ୍ ଦେଇଥିଲା ପାରଳା ପୁଲିସ ।

ପୁଲିସ ତଦନ୍ତ ଉପରେ ସୌମ୍ୟଙ୍କ ପରିବାର ଆପତ୍ତି ଉଠାଇବା ଏବଂ ଗଣମାଧ୍ୟମରେ ପୁଲିସର ତଦନ୍ତ ପ୍ରକ୍ରିୟା ଉପରେ ଗଣମାଧ୍ୟମ କ୍ରମାଗତ ଭାବେ ପ୍ରଶ୍ନ ଉଠାଇବାରୁ ଚଳିତ ଅଗଷ୍ଟ ୧୪ରେ ପୁଲିସ ଡିଜି ମାମଲାର ତଦନ୍ତ ଦାୟିତ୍ୱ କ୍ରାଇବ୍ରାଞ୍ଚକୁ ହସ୍ତାନ୍ତର କରିଥିଲେ । କ୍ରାଇମବ୍ରାଞ୍ଚ ଡିଏସପି ଜ୍ଞାନରଞ୍ଜନ ମିଶ୍ରଙ୍କ ନେତୃତ୍ୱରେ ୪ ଜଣିଆ ଟିମ୍ ଏଇ ୬ ଦିନରେ ୧୫ ଜଣଙ୍କୁ ଜେରା କରିସାରିଲେଣି । କେବଳ ବିଦ୍ୟାଭାରତୀଙ୍କୁ ଜେରା ବାକି ଅଛି ।