ନବୀନଙ୍କ ପ୍ରଶଂସାରେ ନୀତୀଶଙ୍କ ସ୍ତମ୍ଭ

ଭୁବନେଶ୍ୱର: ଇଣ୍ଡିଆଟୁଡେ ଇନ୍ ରେ ବିହାର ମୁଖ୍ୟମନ୍ତ୍ରୀ ନୀତୀଶ କୁମାର ଏକ ସ୍ତମ୍ଭ ଲେଖିଛନ୍ତି । ତାହା ଅନ୍ୟ କୌଣସି ପ୍ରସଙ୍ଗରେ ନୁହେଁ । ବରଂ ଓଡ଼ିଶା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଗୁଣଗାନ କରି ଲେଖିଛନ୍ତି । ‘ନବୀନ ପଟ୍ଟନାୟକ: ସଫ୍ଟ ପାୱାର୍’ ଶୀର୍ଷକ ଏହି ଲେଖାରେ ନବୀନଙ୍କ ନେତୃତ୍ୱ ଓ ବ୍ୟକ୍ତିତ୍ୱର ଉଚ୍ଚ ପ୍ରଶଂସା କରିଛନ୍ତି ନୀତୀଶ । ଜଣେ ମୁଖ୍ୟମନ୍ତ୍ରୀଙ୍କୁ ଆଉ ଜଣେ ମୁଖ୍ୟମନ୍ତ୍ରୀ ପ୍ରଶଂସା କରି ସ୍ତମ୍ଭ ଲେଖିବା ଏକ ବିରଳ ଘଟଣା ବୋଲି କୁହାଯାଉଛି ।

ନବୀନ ପଟ୍ଟନାୟକଙ୍କ ସହ ଦୀର୍ଘ ଦିନର ସମ୍ପର୍କରୁ ତାଙ୍କର ଅନୁଭୂତି ବାଣ୍ଟି ନୀତୀଶ ଲେଖିଛନ୍ତି, ନବୀନ ଜଣେ ଭିନ୍ନ ରାଜନେତା । ସମାଜର ତଳସ୍ତରର ଲୋକମାନଙ୍କ ବିକାଶ ପାଇଁ ତାଙ୍କର ଦୃଷ୍ଟିଭଙ୍ଗୀ ରହିଛି । ବିକାଶ ଜରିଆରେ ସମସ୍ତଙ୍କୁ ନ୍ୟାୟ ଦେବା ଏବଂ ସାଂସ୍କୃତିକ ପରମ୍ପରା ପ୍ରତି ତାଙ୍କର ସମ୍ମାନ ପାଇଁ ସେ ସମସ୍ତଙ୍କ ପାଖରେ ଆଦୃତ ।

ବିଜୁ ବାବୁଙ୍କ ପୁଅ ପରିଚୟରେ ସେ ରାଜନୀତିକୁ ଆସିଥିଲେ । ମାତ୍ର ଗତ ୨୪ ବର୍ଷରେ ସେ ନିଜର ଲିଗାସୀ ସୃଷ୍ଟି କରିଛନ୍ତି । କ୍ଷମତା ଓ ସମୟ ସାଧାରଣତଃ ମଣିଷକୁ ବଦଳାଇଦିଏ । କିନ୍ତୁ ନବୀନଙ୍କ କ୍ଷେତ୍ରରେ ସେଭଳି ଘଟିନାହିଁ । ୫୦ ବର୍ଷରେ ମୁଁ ତାଙ୍କୁ ଯେମିତି ଦେଖିଥିଲି ଆଜି ଠିକ୍ ସେମିତି ଦେଖୁଛି । ରାଜ୍ୟ ତଥା ଦେଶ ପାଇଁ ତାଙ୍କର ସମ୍ପୂର୍ଣ୍ଣ ନିଷ୍ଠା ଓ ପ୍ରତିଶ୍ରୁତିବଦ୍ଧତା ରହିଛି ବୋଲି ଲେଖିଛନ୍ତି ନୀତୀଶ ।

ନବୀନ ପଟ୍ଟନାୟକ ରାଜନୀତିରେ ଏତେ ସଫଳ କେମିତି ବୋଲି ଲୋକେ ପଚାରନ୍ତି । ଏକ ସାକ୍ଷାତକାରରେ ନବୀନ ବାବୁ ଏହାର ଉତ୍ତର ଦେଇଛନ୍ତି । କହିଛନ୍ତି ‘ମୁଁ ଲୋକଙ୍କ ପାଇଁ କାମ କରେ, ନିର୍ବାଚନ ପାଇଁ ନୁହେଁ ।’ ଓଡ଼ିଶାବାସୀ ତାଙ୍କର ପରିବାର ବୋଲି ବାର୍ତ୍ତା ଦେବାକୁ ସେ ସକ୍ଷମ ହୋଇଛନ୍ତି । ସେଥିପାଇଁ ନିର୍ବାଚନ ପରେ ନିର୍ବାଚନ ଜିତୁଛନ୍ତି । କଥା ଅପେକ୍ଷା ସେ କାମରେ ବିଶ୍ୱାସ ରଖନ୍ତି ।

୨୦୨୦ରେ ନବୀନ ମୁଖ୍ୟମନ୍ତ୍ରୀ ଦାୟିତ୍ୱ ନେଲା ବେଳେ ଓଡ଼ିଶା ଜଟିଳ ସମୟ ଦେଇ ଗତି କରୁଥିଲା । ମାତ୍ର ଦୁଇ ଦଶନ୍ଧୀରେ ଏହି ପ୍ରାକୃତିକ ଦୁର୍ବିପାକଭରା ରାଜ୍ୟ ଏହାର ମୁକାବିଲା କରିବାକୁ ସକ୍ଷମ ହୋଇପାରିଛି । ତାଙ୍କର ବାତ୍ୟା ମୁକାବିଲା କୌଶଳ ଜାତୀୟ ଓ ଅନ୍ତର୍ଜାତୀୟସ୍ତରରେ ପ୍ରଶଂସିତ ହୋଇଛି । କେବଳ ସେତିକି ନୁହେଁ, କ୍ରୀଡ଼ା ଓ ପର୍ଯ୍ୟଟନର ବିକାଶରେ ନବୀନ ଆଣିଛନ୍ତି ପରିବର୍ତ୍ତନ । ରାଜ୍ୟ ଅଭିବୃଦ୍ଧି ହାର ବି କିଛି କମ୍ ନାହିଁ ।

ଜଣେ ଭଦ୍ର, ଶିଷ୍ଟାଚାର, ସମ୍ପୂର୍ଣ୍ଣ ଆତ୍ମବିଶ୍ୱାସୀ, ସଂକଳ୍ପବଦ୍ଧ ଏବଂ ଆଦର୍ଶ ବ୍ୟକ୍ତି ଭାବେ ଇତିହାସ ତାଙ୍କୁ ମନେ ରଖିବ ବୋଲି ନୀତୀଶ ଲେଖିଛନ୍ତି ।