ଭୁବନେଶ୍ୱର: ସିବିଏସଇ ଢ଼ାଞ୍ଚାରେ ଓଡ଼ିଶା ମାଧ୍ୟମିକ ଶିକ୍ଷା ବୋର୍ଡ ଏଥର ବହୁ ଆଗରୁ ମାଟ୍ରିକ୍ ପରୀକ୍ଷା ତାରିଖ ଘୋଷଣା କରିଛି । ଆସନ୍ତାବର୍ଷ ଫେବ୍ରୁଆରୀ ୨୦ ତାରିଖରୁ ମାଟ୍ରିକ ପରୀକ୍ଷା ଆରମ୍ଭ ହେବ । ମାର୍ଚ୍ଚ ୪ ତାରିଖ ପର୍ଯ୍ୟନ୍ତ ଏହା ଚାଲିବ । ମାଟ୍ରିକ ସହ ମଧ୍ୟମା, ରାଜ୍ୟ ମୁକ୍ତ ବିଦ୍ୟାଳୟ ପରୀକ୍ଷା ବି ହେବ ।
ମାର୍ଚ୍ଚ ୧୨ ରୁ ସମସ୍ତ ପରୀକ୍ଷାର ଖାତାଦେଖା ଆରମ୍ଭ ହେବ । ଖାତାଦେଖା ଅତିକମ୍ ରେ ୧୨ ଦିନ ଚାଲିବ । ତେବେ ବିସ୍ତୃତ କାର୍ଯ୍ୟସୂଚୀ ପରେ ଘୋଷଣା ହେବ ବୋଲି ବୋର୍ଡ ପକ୍ଷରୁ କୁହାଯାଇଛି ।
ସେହିଭଳି ମାଟ୍ରିକ ପିଲାଙ୍କ ସ୍କୁଲ ଷାଣ୍ମାସିକ ପରୀକ୍ଷା ସେପ୍ଟେମ୍ବର ୧୩ ରୁ ଆରମ୍ଭ ହୋଇ ୧୬ ତାରିଖ ପର୍ଯ୍ୟନ୍ତ ଚାଲିବ । ଏହାର ପ୍ରଶ୍ନପତ୍ର ବୋର୍ଡ ପ୍ରସ୍ତୁତ କରିବ । ମାତ୍ର ଯେଝା ସ୍କୁଲ ପରୀକ୍ଷା କରି ଖାତା ମୂଲ୍ୟାୟନ କରିବେ । ମାଟ୍ରିକ ପରୀକ୍ଷା ଫର୍ମ ଫିଲଅପ୍ ଅକ୍ଟୋବର ମାସରେ ହେବ ।
ଦୁଇବର୍ଷ ପରେ ମାଟ୍ରିକ୍ ପରୀକ୍ଷା ପୁଣି ପୁରୁଣା ପଦ୍ଧତିରେ ହେବ । କୋଭିଡ୍ ଯୋଗୁଁ ଦୁଇବର୍ଷ ଧରି ମାଟ୍ରିକ୍ ପରୀକ୍ଷା ସମ୍ପୂର୍ଣ୍ଣ ଭାବେ ସମ୍ମେଟିଭ୍ ଆସେସମେଣ୍ଟରେ ହେଉଥିଲା । ଏଥର ସେହି ପୁରୁଣା ପଦ୍ଧତି ୬ ଟି ବିଷୟରେ ପିଲା ୧୦୦ ମାର୍କ ଲେଖାଏଁ ପରୀକ୍ଷା ଦେବେ । ତେବେ ପରୀକ୍ଷା ଫଳ ନିର୍ଦ୍ଧାରଣ ପଦ୍ଧତିରେ ପରିବର୍ତ୍ତନ କରାଯାଇଛି । ୬ ଟି ବିଷୟର ପରୀକ୍ଷାରେ ୮୦ ପ୍ରତିଶତ ୱେଟେଜ୍ ରହିବ । ଇଣ୍ଟରନାଲ ଆସେସମେଣ୍ଟରେ ୧୦ ପ୍ରତିଶତ ଏବଂ ଆସପିରେସନାଲ୍ କମ୍ପୋନେଣ୍ଟରେ ୧୦ ପ୍ରତିଶତ ୱେଟେଜ୍ ଦିଆଯାଇ ଫଳ ପ୍ରକାଶ ପାଇବ ବୋଲି ବୋର୍ଡ ଉପସଭାପତି ନିହାର ରଞ୍ଜନ ମହାନ୍ତି ସୂଚନା ଦେଇଛନ୍ତି ।
ଆସନ୍ତାବର୍ଷ ୫ ଲକ୍ଷ ୫୦ ହଜାରରୁ ଅଧିକ ପିଲା ମାଟ୍ରିକ୍ ପରୀକ୍ଷା ଦେବେ ।
