ଭୁବନେଶ୍ୱର: ବ୍ରିଟେନର ପୂର୍ବତନ ପ୍ରଧାନମନ୍ତ୍ରୀ ଟୋନି ବ୍ଲେୟାର ଆଜି ନବୀନ ନିବାସରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଭେଟିଛନ୍ତି । ଓଡ଼ିଶାର ଅର୍ଥନୈତିକ ବିକାଶ ପାଇଁ ଆଗାମୀ କାର୍ଯ୍ୟକ୍ରମ ସମ୍ପର୍କରେ ଉଭୟ ନେତାଙ୍କ ମଧ୍ୟରେ ଦୀର୍ଘ ୧ ଘଣ୍ଟା ଧରି ଆଲୋଚନା ହୋଇଥିଲା ।
ଗତ ଜୁଲାଇ ୨୧ ତାରିଖରେ ଓଡ଼ିଶା ସରକାର ଏବଂ ଟୋନି ବ୍ଲେୟାର ଇନଷ୍ଟିଚ୍ୟୁଟ ଫର ଗ୍ଲୋବାଲ୍ ଚେଞ୍ଜ(ଟିବିଆଇ) ମଧ୍ୟରେ ଏକ ଏମଓୟୁ ସ୍ୱାକ୍ଷରିତ ହୋଇଛି । ସେହି ଅନୁଯାୟୀ, ଓଡ଼ିଶା ପାଇଁ ଏକ ବିସ୍ତୃତ ଅର୍ଥନୈତିକ ଯୋଜନା ପ୍ରସ୍ତୁତିରେ ଟିବିଆଇ ମାଗଣାରେ ସାହାଯ୍ୟ ସହଯୋଗ କରୁଛି । ଟିମ୍ ଓଡ଼ିଶା ସହ ମିଶି ଏହି କାର୍ଯ୍ୟ କରାଯାଉଛି ।
ସଂସ୍ଥାର ପ୍ରାରମ୍ଭିକ କାର୍ଯ୍ୟ ଏବଂ ପରାମର୍ଶରେ ମୁଖ୍ୟମନ୍ତ୍ରୀ ଖୁସି ପ୍ରକଟ କରି ଟୋନି ବ୍ଲେୟାରଙ୍କୁ ଧନ୍ୟବାଦ ଜଣାଇଥିଲେ । ଆଗକୁ ଏହି ସହଯୋଗ ଜାରି ରହିବ ବୋଲି ଆଶାପ୍ରକଟ କରିଥିଲେ । ଓଡ଼ିଶାରେ ବିଭିନ୍ନ କ୍ଷେତ୍ରରେ ସଫଳତା ପାଇଁ ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକଙ୍କୁ ବ୍ଲେୟାର ପ୍ରଶଂସା କରିଥିଲେ । ରାଜ୍ୟ ସରକାରଙ୍କ ୫-ଟି କାର୍ଯ୍ୟକ୍ରମକୁ ମଧ୍ୟ ସେ ଭୂୟସୀ ପ୍ରଶଂସା କରିଥିଲେ ।
ସୂଚନାଯୋଗ୍ୟ, ୨୦୧୬ ରେ ସ୍ଥାପିତ ଟୋନି ବ୍ଲେୟାର ଇନଷ୍ଟିଚ୍ୟୁଟ ଫର ଗ୍ଲୋବାଲ୍ ଚେଞ୍ଜର ମୁଖ୍ୟ ହେଉଛନ୍ତି ଟୋନି ବ୍ଲେୟାର । ଲଣ୍ଡନରେ ଏହାର ମୁଖ୍ୟ କାର୍ଯ୍ୟାଳୟ ରହିଛି । ୪୫ ଟି ଦେଶରେ ସଂସ୍ଥା କାର୍ଯ୍ୟ କରୁଛି । ଗଭର୍ଣ୍ଣାସ୍, ଇନଭେଷ୍ଟମେଣ୍ଟ, ବିଦେଶ ନୀତି, ଭିତ୍ତିଭୂମି, ଜଳବାୟୁ, ଶକ୍ତି ଏବଂ ମାନବ ସମ୍ବଳ ଉପରେ ସଂସ୍ଥାର ପାରଦର୍ଶିତା ଅଛି ।
ଓଡ଼ିଶାରେ ଏହାର କାର୍ଯ୍ୟକ୍ରମ ମଧ୍ୟରେ ରହିଛି. କଣ୍ଟେ ଷ୍ଟେଟ୍ ଆନାଲିସିସ୍, ଏକ୍ସଟରନାଲ୍ ବେଞ୍ଚମାର୍କିଂ, ରୋଡମ୍ୟାପ୍ ଡିଜାଇନ୍, କାପାସିଟି ଡେଭେଲପମେଣ୍ଟ, କମ୍ୟୁନିକେସନ୍ ଏବଂ ମଲଟିମୋଡାଲ୍ ଟ୍ରାନସପୋର୍ଟ ଲଜିଷ୍ଟିକସ ।
