ଭୁବନେଶ୍ୱର: ଦୀର୍ଘ ୧୮ ଘଣ୍ଟାର ଖୋଜାଖୋଜି ପରେ ମିଳିଲା ଜ୍ୟୋତିପ୍ରକାଶଙ୍କ ଶବ । ପଞ୍ଚଶଖା ନଗର ନିକଟ ନାଳରେ ଏକ ବାଉଁଶବୁଦାରେ ଲାଖି ରହିଥିବା ଶବକୁ ଉଦ୍ଧାର କରାଯାଇଛିି । ଗତକାଲି ଅପରାହ୍ନରେ ଗୋଟିଏ ଶବ ଏଇ ଜାଗାରେ ଭାସୁଥିବା କିଛି ସ୍ଥାନୀୟ ଯୁବକ ଦେଖିଥିଲେ । ସେମାନଙ୍କ ସୂଚନା ଆଧାରରେ ଆଜି ସକାଳୁ ଅଗ୍ନିଶମ ବାହିନୀର ଏକ ଟିମ୍ ଓ ସ୍ଥାନୀୟ ଯୁବକ ଡ୍ରେନ୍ ରେ ପଶି ଖୋଜାଖୋଜି କରିଥିଲେ । ଦୁଇ ଘଣ୍ଟା ପରେ ଶବ ପାଇଥିଲେ ।
ଗତକାଲି ବର୍ଷା ବେଳେ ଘରୁ ସାଇକେଲରେ ସୌଭାଗ୍ୟନଗରକୁ ଟ୍ୟୁସନ୍ ଯାଉଥିବା ବରମୁଣ୍ଡା ଗାଁ ଢ଼ିପସାହିର ହୃଷିକେଶ ବେହେରାଙ୍କ ପୁଅ ଜ୍ୟୋତିପ୍ରକାଶ(୧୫) ବର୍ଷା ପାଣିରେ ଡୁବିଥିବା ମୁକୁଳା ଡ୍ରେନ୍ (ନଂ ୮) ରେ ପଡ଼ି ଭାସି ଯାଇଥିଲେ । ପୁଲିସ, ଦମକଳ ବାହିନୀ ଓ ସ୍ଥାନୀୟ ଲୋକେ ଉଦ୍ଧାର କାର୍ଯ୍ୟରେ ଲାଗିଥିଲେ । ଗତକାଲି ରାତି ସାଢ଼େ ୧୦ଟା ପର୍ଯ୍ୟନ୍ତ ସର୍ଚ୍ଚ ଅପରେସନ୍ ଚାଲିଥିଲେ ମଧ୍ୟ ନିରାଶ ହୋଇଥିଲେ ।
ଛାତ୍ର ଭାସିଯାଇଥିବା ଡ୍ରେନ୍ ର ପଛପଟ ଗଣ୍ଡମୁଣ୍ଡା କେନାଲ୍ ରୁ ଆଜି ସକାଳୁ ସର୍ଚ୍ଚ ଅପରେସନ୍ ପୁଣି ଆରମ୍ଭ ହୋଇଥିଲା । ଦେଢ଼ଘଣ୍ଟା ଧରି ଅଗ୍ନିଶମ ବାହିନୀ ଖୋଜାଖୋଜି କରି ଆଗ ହାତ ଟେକି ଦେଇଥିଲେ । ପରେ ସେମାନଙ୍କ ସହ ସ୍ଥାନୀୟ ଅଞ୍ଚଳର କିଛି ଲୋକ ଡ୍ରେନ୍ ରେ ଖୋଜି ଏକ ବାଉଁଶବୁଦାରେ ଲାଖିଥିବା ଶବ ପାଇଥିଲେ । ଶବର ନାକ ଓ ପାଟିରେ ଗଭୀର କ୍ଷତ ରହିଛି । ଦେହସାରା ଖଣ୍ଡିଆଖାବରା ହେବା ସହ ଶବଟି ଫୁଲିଯାଇଛି । ସେଠାରେ ଶୋକାକୂଳ ପରିସ୍ଥିତି ସୃଷ୍ଟି ହୋଇଛି ।
ନାଳରୁ ଶବ ଉଦ୍ଧାର ପରେ ଏମସ୍ କୁ ନିଆଯାଇଛି । ସେଠାରେ ପରିବାରବର୍ଗଙ୍କ ଦ୍ୱାରା ଶବ ଚିହ୍ନଟ ହେବ ବୋଲି ଜଣାପଡ଼ିଛି । ତେବେ ଶବଟି ଯେ ଜ୍ୟୋତିପ୍ରକାଶଙ୍କର ଏକପ୍ରକାର ସ୍ପଷ୍ଟ ହୋଇଗଲାଣି ।