ଭୁବନେଶ୍ୱର: ଧାମନଗର ଉପନିର୍ବାଚନ ପାଇଁ ଆଜି ନିର୍ବାଚନ କମିସନଙ୍କ ବିଜ୍ଞପ୍ତି ପ୍ରକାଶ ପାଇଛି । ନଭେମ୍ବର ୩ ତାରିଖରେ ଉପନିର୍ବାଚନ ହେବ ଏବଂ ୬ ତାରିଖରେ ରେଜଲ୍ଟ ବାହାରିବ । ଏଥିପାଇଁ ଆସନ୍ତା ୭ ତାରିଖରେ ବିଜ୍ଞପ୍ତି ଜାରି ହେବ । ନାମାଙ୍କନପତ୍ର ଦାଖଲର ଶେଷ ତାରିଖ ଅକ୍ଟୋବର ୧୪ ଥିବା ବେଳେ ପ୍ରତ୍ୟାହାର ତାରିଖ ୧୭ ତାରିଖ ରହିଛି ।
ବିଷ୍ଣୁ ସେଠୀଙ୍କ ଅକାଳ ବିୟୋଗ ଯୋଗୁଁ ଏହି ଉପନିର୍ବାଚନ ହେଉଛି । ସେ ଥିଲେ ବିଜେପି ଦଳର ବିଧାୟକ । ବିଧାନସଭାକୁ ଦ୍ୱିତୀୟ ଥର ନିର୍ବାଚିତ ବିଷ୍ଣୁ ଟାଣୁଆ ନେତା ଥିଲେ । ବିଧାନସଭାରେ ବିରୋଧୀ ଦଳର ଉପନେତା ପଦ ମଣ୍ଡନ କରିଥିଲେ । ସୁତରାଂ ତାଙ୍କ ବିୟୋଗରେ ଅନୁଷ୍ଠିତ ଉପନିର୍ବାଚନ ବିଜେପି ପାଇଁ ବହୁତ ଗୁରୁତ୍ୱପୂର୍ଣ୍ଣ । ଏହି ଆସନଟି ଦଳ ସପକ୍ଷରେ ବଜାୟ ରଖିବା ବିଜେପି ପାଇଁ ସମ୍ମାନର ପ୍ରଶ୍ନ ।
୨୦୧୯ ନିର୍ବାଚନରେ ବିଷ୍ଣୁ ସେଠୀ ବିଜେଡିର ରାଜେନ୍ଦ୍ର କୁମାର ଦାସଙ୍କୁ ୪, ୬୨୫ ଖଣ୍ଡ ଭୋଟ ବ୍ୟବଧାନରେ ପରାସ୍ତ କରିଥିଲେ । ବିଜେଡିରେ ଗୋଷ୍ଠୀ କନ୍ଦଳ ବିଜେପି ପ୍ରାର୍ଥୀଙ୍କୁ ସୁହାଇଥିଲା । ଏଥର ଉପନିର୍ବାଚନରେ ବିଜେପି ପାଇଁ ତିନି ତିନୋଟି ସୁଯୋଗ ରହିଛି । ପ୍ରଥମତଃ ସହାନୁଭୂତି ଭୋଟ, ଦ୍ୱିତୀୟରେ ବିଜେଡି ଗୋଷ୍ଠୀ କନ୍ଦଳ ଏବଂ ତୃତୀୟରେ, ନଗଦ ଓଡ଼ିଶା ଆସିଥିବା ନଡ୍ଡାଙ୍କ ଗୁରୁମନ୍ତ୍ର ।
ଉଲ୍ଲେଖଥାଉକି, ୨୦୨୪ ରେ ଓଡ଼ିଶାକୁ ବିଜେଡିମୁକ୍ତ କରିବାକୁ ନିକଟରେ କର୍ମୀମାନଙ୍କୁ ଆହ୍ୱାନ ଦେଇଛନ୍ତି ଦଳର ରାଷ୍ଟ୍ରୀୟ ସଭାପତି ଜେ.ପି.ନଡ୍ଡା । ବିଜେଡି ସରକାରକୁ ଫିଙ୍ଗି ଦେବାକୁ କର୍ମୀଙ୍କ କାନରେ ବଳ ଦେଇଛନ୍ତି । ଅଲବତ ଏହା କରିକି ଦେଖାଇବାକୁ ବୋଲି ବିରୋଧୀ ଦଳ ନେତା ଜୟନାରାୟଣ ମିଶ୍ର ଦମ୍ଭ ମାରିଛନ୍ତି । ୨୦୨୪ ଫାଇନାଲ୍ ମ୍ୟାଚ୍ ପୂର୍ବରୁ ଏହି ଉପନିର୍ବାଚନ ବିଜେପି ପାଇଁ ପ୍ରାକ୍ଟସି ମ୍ୟାଚ୍ ବୋଲି ସେ କହିସାରିଲେଣି । ସୁତରାଂ ବିଜେଡିମୁକ୍ତ ଓଡ଼ିଶା ଅଭିଯାନ ଏବଂ ବିଜେପିର ଅସଲ ଶକ୍ତି ଏହି ଧାମନଗର ଉପନିର୍ବାଚନରୁ ହିଁ ଜଣାପଡ଼ିଯିବ ।
ଏହି ପରିପ୍ରେକ୍ଷୀରେ ବିଜେପିର ପ୍ରାର୍ଥୀ କିଏ ହେବ ତାହା ସବୁଠାରୁ ଗୁରୁୂତ୍ୱପୂର୍ଣ୍ଣ । ଦିବଗଂତ ବିଧାୟକ ବିଷ୍ଣୁ ସେଠୀଙ୍କ ପୁଅଙ୍କୁ ପ୍ରାର୍ଥୀ କରିବାକୁ ଦଳ ମନସ୍ଥ କରିସାରିଥିବା ଦଳ ପକ୍ଷରୁ ସଙ୍କେତ ମିଳୁଛି । କାରଣ ଦଳର ବିଜୟ ପାଇଁ ଏହା ଶ୍ରେଷ୍ଠ ବିକଳ୍ପ । ତାଙ୍କୁ ପ୍ରାର୍ଥୀ କରି ସହାନୁଭୂତି ଭୋଟ ପାଇବାକୁ ବିଜେପି ଆଶା ରଖିଥାଇପାରେ ।
ଏହା ସତ ଯେ ବିଜେପିରେ ବିଷ୍ଣୁ ସେଠୀଙ୍କ ବିକଳ୍ପ ନାହାନ୍ତି । କେବଳ ତାଙ୍କ ପୁଅକୁ ପ୍ରାର୍ଥୀ କରିଦେଲେ ଲୋକ ଭୋଟ ଦେଇଦେବେ ବୋଲି ଯଦି ବିଜେପି ଭାବୁଥାଏ ତେବେ ତାହା ଭୁଲ୍ । ବାଲେଶ୍ୱର ଉପନିର୍ବାଚନରୁ ବିଜେପି ଏହା ଶିକ୍ଷାଲାଭ କରିଥିବ । ମଦନ ମୋହନ ଦତ୍ତଙ୍କ ବିୟୋଗଜନିତ ସହାନୁଭୂତି ଭୋଟ ତାଙ୍କ ପୁଅକୁ ମିଳିଥିଲେ ସେ ନିର୍ବାଚନ ଜିତିଯାଇଥାନ୍ତେ । ମାତ୍ର ତାହା ସମ୍ଭବ ହେଲାନି ।
ସେପଟେ ବିଜେଡି ପାଇଁ ଉପନିର୍ବାଚନ ଜିତିବା ସେତେ ସହଜ ନୁହେଁ । ବିଜେଡିରେ ଗୋଷ୍ଠୀ ବିବାଦ ଆଗରୁ ଥିଲା ଏବଂ ତାହା ରହିଛି । ଗତ ନିର୍ବାଚନରେ ପ୍ରାର୍ଥୀ ରାଜେନ୍ଦ୍ର ଦାସଙ୍କୁ ମୁକ୍ତିକାନ୍ତ ମଣ୍ଡଳ ସହଯୋଗ କରି ନ ଥିଲେ । ଓଲଟି ତାଙ୍କ ଯୋଗୁଁ ବିଜେଡ ଭୋଟ୍ ବିଜେପି ପକେଟ୍ କୁ ଯାଇଥିଲା । ଏବେ ମଣ୍ଡଳଙ୍କ ଜାଗାରେ ଚାନ୍ଦବାଲି ବିଧାୟକ ବ୍ୟୋମକେଶ ରାୟଙ୍କ ଭୂମିକାକୁ ଲୋକେ ଚର୍ଚ୍ଚା କରୁଛନ୍ତି । ରାଜେନ୍ଦ୍ରଙ୍କ ବଦଳରେ ତାଙ୍କର ଜଣେ ସମର୍ଥକଙ୍କୁ ପ୍ରାର୍ଥୀ କରିବାକୁ ସେ ଲବି କରୁଥିବା ଚର୍ଚ୍ଚା ହେଉଛି । ଏହା ସତ ହୋଇଥିଲେ ବିଜେଡି ପାଇଁ ଉପନିର୍ବାଚନ ସମସ୍ୟା ଆସିପାରେ ବୋଲି କୁହାଯାଉଛି ।
ତେବେ ସେ ଯାହା ହେଉ, ଉପନିର୍ବାଚନରେ ଶାସକ ଦଳକୁ ସାମନା କରିବା ବିରୋଧୀ ଦଳ ପାଇଁ ସବୁବେଳେ ଚାଲେଂଜ ରହିଛି । ଖାସ୍ କରି ବିଜେଡିର ପ୍ରସ୍ତୁତି ଏବଂ ରଣକୌଶଳ ବେଶ ସୁଦୃଢ଼ ଥିବାରୁ ସାଧାରଣ ନିର୍ବାଚନ ପରି ଉପନିର୍ବାଚନରେ ଏଠାରେ ଗୋଷ୍ଠୀ କନ୍ଦଳ ମୁଣ୍ଡ ଟେକିବାର ଆଶଙ୍କା ବହୁତ କମ । ବିରୋଧୀ ଦଳଠାରୁ ଆସନଟି ଛଡ଼ାଇ ଆଣିବା ଶାସକ ଦଳ ପାଇଁ ସମାନ ଭାବେ ସମ୍ମାନର ପ୍ରଶ୍ନ ।
ତେଣୁ ଉପନିର୍ବାଚନ ବେଶ୍ ରୋଚକ ହେବ ଏଥିରେ ସନ୍ଦେହ ନାହିଁ ।
