ଡିଆଇଜି ବ୍ରିଜେଶ ରାୟଙ୍କୁ ବଦଳି

ଭୁବନେଶ୍ୱର: ଡିଆଇଜି ବ୍ରିଜେଶ ରାୟଙ୍କର ବଦଳି ହୋଇଛି । ତାଙ୍କ ପତ୍ନୀଙ୍କ ନିର୍ଯ୍ୟାତନାରେ ଅତିଷ୍ଠ ହୋଇଥିବା ଜଣେ ମହିଳା ହୋମଗାର୍ଡ ଆତ୍ମହତ୍ୟା ଉଦ୍ୟମ କରି ଦୁଇଟି ଯାକ ଗୋଡ଼ ହରାଇବା ଖବର ଆଲୋଡ଼ନ ସୃଷ୍ଟି କରିବା ପରିପ୍ରେକ୍ଷୀରେ ରାଜ୍ୟ ସରକାର ଏହି କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି । ବ୍ରିଜେଶଙ୍କୁ ଅନୁଗୁଳରୁ କଟକସ୍ଥିତ ପୁଲିସ ମୁଖ୍ୟାଳୟକୁ ବଦଳି କରାଯାଇଛି ।

ଡିଆଇଜି ଶ୍ରୀ ରାୟଙ୍କ ପତ୍ନୀଙ୍କ ବିରୋଧରେ ସଙ୍ଗୀନ ଅଭିଯୋଗ ଆଣିଛନ୍ତି ତାଙ୍କ ଘରୋଇ କାମରେ ନିୟୋଜିତ ମହିଳା ହୋମଗାର୍ଡ ଅନୁଗୁଳ ଜିଲ୍ଲା ରାଣୀଗୋଡ଼ାର ସୈରିଦ୍ରୀ ସାହୁ । ଆତ୍ମହତ୍ୟା ଉଦ୍ୟମରେ ଦୁଇଟି ଗୋଡ଼ ହରାଇ କଟକର ଅଶ୍ୱିନୀ ହସ୍ପିଟାଲ୍ରେ ଚିକିତ୍ସିତ ହେଉଥିବା ସୈରିଦ୍ରୀ ହୋମଗାର୍ଡ ଡିଜିଙ୍କୁ ଏକ ଚିଠିରେ ଡିଆଇଜି ପତ୍ନୀଙ୍କ ନିଷ୍ଠୁର ଆଚରଣ ସମ୍ପର୍କରେ ଲେଖିଛନ୍ତି ।

ଅଭିଯୋଗ ଅନୁଯାୟୀ, ସାତ ମାସ ତଳେ ଡିଆଇଜି ବ୍ରିଜେଶ ରାଏ ଅନୁଗୁଳରେ ଯୋଗ ଦେବା ପରେ ତାଙ୍କ ଘରୋଇ କାମରେ ସୈରିଦ୍ରୀଙ୍କୁ ନିୟୋଜିତ କରାଯାଇଥିଲା । ଡିଆଇଜିଙ୍କ ଘରର ଯାବତୀୟ କାମ ସେ କରୁଥିଲେ । କିନ୍ତୁ କୌଣସି କାମରେ ଟିକେ ଭୁଲ ହେଲେ ଡିଆଇଜିଙ୍କ ପତ୍ନୀ ଭୀଷଣ ନିର୍ଯ୍ୟାତନା ଦେଉଥିଲେ । ତାଙ୍କୁ ମାଡ଼ ମାରୁଥିଲେ । ଚାକିରି ନେଇଯିବାର ଧମକ ଦେଉଥିଲେ । ଗତ ୪ ତାରିଖରେ ଡିଆଇଜିଙ୍କ ପତ୍ନୀ ତାଙ୍କୁ ଗଳା ଧକ୍କା ଦେଇ ଘରୁ ବାହାର କରିଦେଇଥିଲେ ।

ଚାକିରି ଚାଲିଯିବାର ଭୟ ଏବଂ ନିର୍ଯ୍ୟାତନାରେ ଅତିଷ୍ଠ ସୈରିଦ୍ରୀ ଶେଷରେ ଆତ୍ମହତ୍ୟା କରିବାକୁ ନିଷ୍ପତ୍ତି ନେଇ ଏକ ଚଳନ୍ତା ଟ୍ରେନ୍ ଆଗକୁ ଡେଇଁପଡ଼ିଥିଲେ । ସୌଭାଗ୍ୟକୁ ସେ ବଞ୍ଚି ଯାଇଥିଲେ ମଧ୍ୟ ଦୁଇଟି ଯାକ ଗୋଡ଼ ହରାଇଥିଲେ । ଅଶ୍ୱିନୀ ହସ୍ପିଟାଲରେ ସେ ଚିକିତ୍ସାଧୀନ ଅଛନ୍ତି । ତାଙ୍କ ଅବସ୍ଥା ଗୁରୁତର ଥିବା ତାଙ୍କ ଝିଅ ସୁଚିସ୍ମିତା ପ୍ରଧାନ ଗଣମାଧ୍ୟମକୁ ସୂଚନା ଦେଇଛନ୍ତି ।

ଏହି ଖବର ସମଗ୍ର ରାଜ୍ୟରେ ଆଲୋଡ଼ନ ସୃଷ୍ଟି କରିବା ପରେ ଆଜି ସକାଳେ ଗଣମାଧ୍ୟମର ପ୍ରତିନିଧିମାନେ ଡିଆଇଜି ଶ୍ରୀ ରାୟଙ୍କ ପ୍ରତିକ୍ରିୟା ଲୋଡ଼ିଥିଲେ । ମାତ୍ର ମହିଳା ହୋମଗାର୍ଡଙ୍କ ଅଭିଯୋଗକୁ ସେ ବାଏଁ ବାଏଁ ଉଡ଼ାଇ ଦେଇଥିଲେ । ହୋମଗାର୍ଡଙ୍କ ପାରିବାରିକ ଅଶାନ୍ତି ତାଙ୍କ ଆତ୍ମହତ୍ୟା ଉଦ୍ୟମର କାରଣ ହୋଇପାରେ ବୋଲି କହିଥିଲେ ।

ଡିଆଇଜି ଶ୍ରୀ ରାୟଙ୍କ ପତ୍ନୀଙ୍କ ଏତାଦୃଶ ନିଷ୍ଠୁର ଆଚରଣ ସମ୍ପର୍କରେ ଜାତୀୟ ମାନବାଧିକାର ଆୟୋଗଙ୍କଠାରେ ଏକ ମାମଲା ରୁଜୁ ହୋଇଛି । ସେପଟେ ରାଜ୍ୟ ମାନବାଧିକାର ଆୟୋଗ ନିଜ ଆଡୁ ଏହି ମାମଲାକୁ ଗମ୍ଭୀରତାର ସହ ଗ୍ରହଣ କରି ଡିଜିଙ୍କୁ ରିପୋର୍ଟ ତଲବ କରିଛନ୍ତି । ସେପ୍ଟେମ୍ବର ୧୫ ସୁଦ୍ଧା ରିପୋର୍ଟ ଦେବାକୁ ଡିଜିଙ୍କୁ ଆୟୋଗ ନିର୍ଦ୍ଦେଶ ଦେଇଛନ୍ତି ।