ଭୁବନେଶ୍ୱର: ଓଡ଼ିଶା ପାଇଁ ଆଉ ଏକ ଗୌରବର ମୁହୂର୍ତ୍ତ । ଓଡ଼ିଆ ପୁଅ ଦିଲ୍ଲୀପ ତିର୍କୀ ହକି ଇଣ୍ଡିଆ ସଭାପତି ଭାବେ ନିଦ୍ଦ୍ୱର୍ନ୍ଦରେ ନିର୍ବାଚିତ ହୋଇଛନ୍ତି । ହକି ଇଣ୍ଡିଆ ଏହି ସର୍ବୋଚ୍ଚ ପଦବୀ ପାଇଁ ଦିଲ୍ଲୀପ ଗତ ରବିବାର ଦିନ ନାମାଙ୍କନ ପତ୍ର ଦାଖଲ କରିଥିଲେ । ଉତ୍ତର ପ୍ରଦେଶ ହକି ସଭାପତି ରାକେଶ କାଟ୍ୟାଲ ଏବଂ ଝାଡ଼ଖଣ୍ଡ ହକି ସଭାପତି ଭୋଳାନାଥ ସିଂହ ମଧ୍ୟ ପ୍ରର୍ଥୀପତ୍ର ଦାଖଲ କରିଥିଲେ । ଅକ୍ଟୋବର ୧ ରେ ନିର୍ବାଚନ ହୋଇଥାନ୍ତା । ମାତ୍ର ଆଜି ଶ୍ରୀ କାଟ୍ୟାଲ୍ ଏବଂ ଶ୍ରୀ ସିଂହ ପ୍ରାର୍ଥୀପତ୍ର ପ୍ରତ୍ୟାହାର କରିନେବାରୁ ଦିଲ୍ଲୀପ ତିର୍କୀଙ୍କୁ ସଭାପତି ଭାବେ ଘୋଷଣା କରାଯାଇଛି । ଅନ୍ତର୍ଜାତୀୟ ହକି ଫେଡେରେସନ୍ ଏହାକୁ ସ୍ୱୀକୃତି ଦେଇଛନ୍ତି । ହକି ଇଣ୍ଡିଆ ସଭାପତି ପଦ ମଣ୍ଡନ କରିବାରେ ଭାରତୀୟ ହକି ଟିମ୍ ର ପୂର୍ବତନ ଅଧିନାୟକ ୪୪ ବର୍ଷୀୟ ଦିଲ୍ଲୀପ ହେଉଛନ୍ତି ପ୍ରଥମ ଓଡ଼ିଆ । ଭାରତୀୟ ହକି ଟିମ୍ କୁ ଏକ ନୂଆ ଶୀର୍ଷରେ ପହଞ୍ଚାଇବାକୁ ଚେଷ୍ଟା କରିବି ବୋଲି ସେ ତାଙ୍କ ପ୍ରଥମ ପ୍ରତିକ୍ରିୟା ଟୁଇଟ୍ କରିଛନ୍ତି ।
ସୁନ୍ଦରଗଡ଼ ଜିଲ୍ଲାରେ ଜନ୍ମିତ ଦିଲ୍ଲୀପ ଭାରତୀୟ ହକିର ଜଣେ କିମ୍ବଦନ୍ତୀ ବ୍ୟକ୍ତିତ୍ୱ । ଭାରତୀୟ ଦଳରେ ଜଣେ ଦୁର୍ଦ୍ଦଶ ଡିଫେଣ୍ଡର୍ସ ଥିଲେ । ଭାରତୀୟ ହକି ଦଳର ଅଧିନାୟକ ଥିଲେ । ତାଙ୍କର ୧୫ ବର୍ଷରୁ ଉଦ୍ଧ୍ୱର୍ ହକି କ୍ୟାରିୟର୍ ଭିତରେ ରେକର୍ଡ ସଂଖ୍ୟକ ୪୧୨ ଟି ଅନ୍ତର୍ଜାତୀୟ ମ୍ୟାଚ୍ ଖେଳିଛନ୍ତି । ୧୯୯୬ ଆଟାଲାଣ୍ଟ, ୨୦୦୦ ସିଡନି ଏବଂ ୨୦୦୪ ଏଥେନ୍ସ ଅଲିମ୍ପିକ୍ କ୍ରୀଡ଼ାରେ ସେ ଭାରତରୁ ପ୍ରତିନିଧିତ୍ୱ କରିଥିଲେ । ୧୯୯୮ ଏସିଆନ୍ ଗେମ୍ ରେ ସ୍ୱର୍ଣ୍ଣପଦକ ହାସଲ କରିଥିବା ଭାରତୀୟ ଦଳର ସେ ଥିଲେ ସଦସ୍ୟ । ୨୦୧୦ ମସିହାରେ ସେ ଅନ୍ତର୍ଜାତୀୟ ହକିରୁ ଅବସର ନେଇଥିଲେ । ୨୦୧୨ ମସିହାରେ ବିଜେଡ଼ି ତାଙ୍କୁ ରାଜ୍ୟସଭା ସାଂସଦ କରି ପଠାଇଥିଲା । ଓଡ଼ିଶା ହକି ପ୍ରମୋସନ୍ କାଉନସିଲ୍ ର ଅଧ୍ୟକ୍ଷ ଭାବେ ବର୍ତ୍ତମାନ କାର୍ଯ୍ୟ କରୁଛନ୍ତି ।
ଭାରତୀୟ ହକିକୁ ଉଲ୍ଲେଖନୀୟ ଅବଦାନ ପାଇଁ ଭାରତ ସରକାର ୨୦୦୪ ମସିହାରେ ତାଙ୍କୁ ପଦ୍ମଶ୍ରୀ ସମ୍ମାନରେ ଭୂଷିତ କରିଥିଲେ । ୨୦୦୨ ରେ ସେ ଅର୍ଜୁନ ପୁରସ୍କାର ପାଇଥିଲେ । ୧୯୯୬ ରେ ଏକଲବ୍ୟ ପୁରସ୍କାର, ୧୯୯୮ରେ ହକି ଇଅର ବୁକ୍ ପୁରସ୍କାର, ୨୦୦୪ ରେ ବିଜୁ ପଟ୍ଟନାୟକ ଖେଳାଳୀ ପୁରସ୍କାର, ୨୦୦୯ ରେ ହକି ଷ୍ଟାର, ୨୦୧୨ ରେ ସୋକେସ୍ ଓଡ଼ିଶା ଆୱାର୍ଡ ପାଇଥିଲେ ।
ଓଡ଼ିଶାକୁ ପୁଣି ଥରେ ଗୌରବାନ୍ୱିତ କରିଥିବା ଦିଲ୍ଲୀପ ତିର୍କୀଙ୍କୁ ସବୁ ମହଲରୁ ଶୁଭେଚ୍ଛାର ସୁଅ ଛୁଟିଛି ।
