ନୂଆଦିଲ୍ଲୀ/ଭୁବନେଶ୍ୱର: ମହିଳା ସଶକ୍ତିକରଣ ପ୍ରସଙ୍ଗରେ ଆଜି ରାଜ୍ୟସଭାରେ ନିଜ ମାତୃଭାଷା ଓଡ଼ିଆରେ ବଳିଷ୍ଠ ଯୁକ୍ତି ଉପସ୍ଥାପନ କରି ସମସ୍ତଙ୍କ ଦୃଷ୍ଟି ଆକର୍ଷଣ କରିଥିଲେ ବିଜେଡ଼ିର ଯୁବ ସାଂସଦ ଡ. ସସ୍ମିତ୍ ପାତ୍ର । ସସ୍ମିତ୍ ଙ୍କ ଚମତ୍କାର ଉପସ୍ଥାପନାରେ ଗୃହର ଅଧ୍ୟକ୍ଷ ଶ୍ରୀ ଭେଙ୍କିୟା ନାଇଡୁ ମୁଗ୍ଧ ହୋଇଯାଇଥିଲେ । ଆଉ ଆପେ ତାଙ୍କ ପାଟିରୁ ଓଡ଼ିଆରେ ପ୍ରଶଂସା ବାହାରି ଆସିଥିଲା । ‘ତମର ଭାଷାରେ ଅତି ସୁନ୍ଦର କହିଲେ’ ବୋଲି କହିଥିଲେ ଭେଙ୍କିୟା । ରାଜ୍ୟସଭାରେ ୧୬ ମାସର କାର୍ଯ୍ୟକାଳ ଭିତରେ ସସ୍ମିତ୍ ଏଥରକୁ ମିଶାଇ ଚତୁର୍ଥ ଥର ପାଇଁ ଗୃହର ଅଧ୍ୟକ୍ଷଙ୍କ ପ୍ରଶଂସା ସାଉଁଟିବା ଚର୍ଚ୍ଚାର ବିଷୟ ହୋଇଛି ।
ଆଜି ରାଜ୍ୟସଭାର ଶୂନ୍ୟକାଳରେ ମହିଳା ସଶକ୍ତିକରଣ ପ୍ରସଙ୍ଗ ଅବତାରଣା କରିଥିଲେ ସସ୍ମିତ୍ । ଏହି ଅବସରରେ ମହିଳା ସଂରକ୍ଷଣ ବିଲ୍ ପାରିତ ପାଇଁ ଦୃଢ଼ ଦାବି କରିଥିଲେ । ଏହି ପ୍ରସଙ୍ଗରେ ନିଜର ଯୁକ୍ତି ରଖିବାକୁ ଯାଇ ମହିଳାଙ୍କ ଆର୍ଥିକ, ସାମାଜିକ ଓ ରାଜନୈତିକ ସଶକ୍ତିକରଣ ବିଷୟ ଆଲୋଚନା କରିଥିଲେ ।
ସସ୍ମିତ୍ କହିଥିଲେ, ମହିଳାଙ୍କ ସାମାଜିକ ଓ ଅର୍ଥନୈତିକ ସଶକ୍ତିକରଣ ପାଇଁ ଏକ ଯୋଜନା ଆଣିବାର ଅଛି । ଓଡ଼ିଶାରେ ମିଶନ୍ ଶକ୍ତି ନାମରେ ଏକ ଯୋଜନା ଅଛି । ଯେଉଁଥିରେ ୮୦ ଲକ୍ଷ ମହିଳା ସଶକ୍ତ ହେଉଛନ୍ତି । ଏହି ଯୋଜନାରେ ନିଜର ଜୀବନ ଜୀବିକା ସେମାନେ ପରିବର୍ତ୍ତିତ କରିପାରିଛନ୍ତି । କେନ୍ଦ୍ର ସରକାର ଯେଉଁଭଳି ଭାବେ ନ୍ୟାସନାଲ୍ ମାଟରନିଟି ସ୍କିମ୍ ରେ ଓଡ଼ିଶାର “ମମତା ଯୋଜନା’ର ମଡେଲ ଅନୁସରଣ କରିଛନ୍ତି ସେହିଭଳି ଭାବେ “ମିଶନ ଶକ୍ତି’ ର ମଡେଲ ଆପଣାନ୍ତୁ । ମହିଳା ସ୍ୱଂୟ ସହାୟକ ଗୋଷ୍ଠୀମାନଙ୍କ ଦ୍ୱାରା କାର୍ଯ୍ୟକ୍ରମ ଗ୍ରହଣ କରନ୍ତୁ । ଏହା ଦେଶର ମହିଳାମାନଙ୍କ ସାମାଜିକ ଓ ଅର୍ଥନୈତିକ ସଶକ୍ତିକରଣରେ ସହାୟକ ହେବ ।
ସେହିଭଳି ମହିଳାଙ୍କ ରାଜନୈତିକ ସଶକ୍ତିକରଣ ପ୍ରସଙ୍ଗ ଉଲ୍ଲେଖ କରି ସସ୍ମିତ୍ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ କାର୍ଯ୍ୟକ୍ରମ ଓ ଆଭିମୁଖ୍ୟ ଦୋହରାଇଥିଲେ । ନବୀନ ପଟ୍ଟନାୟକ ଯେଉଁ ପ୍ରକାର ଭାବେ ମହିଳା ସଶକ୍ତିକରଣ ପାଇଁ ମହିଳା ସଂରକ୍ଷଣ ବିଲ୍ ପାଇଁ ବାରମ୍ବାର କହି ଆସୁଛନ୍ତି, କେନ୍ଦ୍ର ସରକାର ଟାଳଟୁଳ ନୀତି ଛାଡ଼ି ମହିଳା ସଂରକ୍ଷଣ ବିଲ୍ କୁ ତୁରନ୍ତ ପାରିତ କରିବାର ଆବଶ୍ୟକତା ଅଛି । ଗତ ସାଧାରଣ ନିର୍ବାଚନରେ ମୁଖ୍ୟମନ୍ତ୍ରୀ ନିଜ ଦଳ ବିଜେଡ଼ି ପକ୍ଷରୁ ଲୋକସଭାରେ ଏକ ତୃତୀୟାଂଶ ଆସନ ମହିଳାମାନଙ୍କ ପାଇଁ ସଂରକ୍ଷିତ କରିଥିଲେ ବୋଲି ସସ୍ମିତ୍ ମନେ ପକାଇ ଦେଇଥିଲେ ।
ମୋଟାମୋଟି ଭାବେ ସାମାଜିକ ଓ ଅର୍ଥନୈତିକ ଦୃଷ୍ଟିରୁ ମିଶନ ଶକ୍ତିକୁ ଏକ ରାଷ୍ଟ୍ରୀୟ କାର୍ଯ୍ୟକ୍ରମ ଭାବେ ଗ୍ରହଣ କରିବା ଏବଂ ରାଜନୈତିକ ସଶକ୍ତିକରଣ ପାଇଁ ମହିଳା ସଂରକ୍ଷଣ ବିଲ୍ ତୁରନ୍ତ ପାରିତ କରିବା ପାଇଁ ଦାବି କରିଥିଲେ ସସ୍ମିତ୍ ।
