ହୋଲଡିଂ ଟାକ୍ସ: କିଟ୍ ବିରୋଧରେ ମିଛ ଖବର ଧରାପଡ଼ିଲା

ଭୁବନେଶ୍ୱର: କିଟ୍, କିସ୍ ଏବଂ କିମ୍ସ ପଛରେ ପଡ଼ିଯାଇଛି ୧ ନମ୍ବର ଚାନେଲ ଓଟିଭି । କିଟ୍ ରେ ନେପାଳୀ ଛାତ୍ରୀ ଆତ୍ମହତ୍ୟା ଘଟଣା ପରଠୁ ଅଚ୍ୟୁତ ସାମନ୍ତଙ୍କ ପ୍ରତିଷ୍ଠାନ ବିରୋଧରେ ଖିଅ ଖୋଜିବାରେ ଲାଗିପଡ଼ିଛି ଏହି ଟିଭି । ପ୍ରତିଦିନ ଗୋଟିଏ ଗୋଟିଏ ବେକ୍ରିଂ ଖବର ପ୍ରସାରଣ କରୁଛି । ତେବେ କିଟ୍ ଏବଂ କିମ୍ସ ବିରୋଧରେ ଆଜି ବିଗ୍ ବେକ୍ରିଂ ଖବର କରିଥିବା ଓଟିଭିର ଏକ ଡାହା ମିଛ ଧରାପଡ଼ିଛି । ଓଲଟି ଏହି ଖବରର ହକଦାର ଯେ ଓଟିଭି ତାହା ଖବରଦାତା ବୋଧହୁଏ ଜାଣିନାହାନ୍ତି ।

କିଟ୍ ଏବଂ କିମ୍ସ ଅନୁଷ୍ଠାନ ବିଏମସିର ହୋଲଡିଂ ଟିକସ ବକେୟା ରଖିଛନ୍ତି ବୋଲି ଆଜି ସକାଳେ ଓଟିଭିରେ ‘ବିଗ୍ ବେକ୍ରିଂ’ ଖବର ଚାଲିଥିଲା । ସେଥିରେ କୁହାଯାଇଥିଲା ଯେ କିମ୍ସର ୨ କୋଟିରୁ ଅଧିକ ଟଙ୍କା ଏବଂ କିଟ୍ ର ୧ କୋଟିରୁ ଅଧିକ ଟଙ୍କାର ହୋଲଡିଂ ଟିକସ ବକେୟା ରହିଛି । ବକେୟା ଖିଲାପକାରୀଙ୍କୁ ଚିହ୍ନଟ କରି ବିଏମସି ପକ୍ଷରୁ ନୋଟିସ୍ ଜାରି ହୋଇଥିବା କୁହାଯାଇଥିଲା ।

ମାତ୍ର ଏହା ଡାହା ମିଛ ବୋଲି ଅନୁସନ୍ଧାନରୁ ଜଣାପଡ଼ିଛି । ବିଏମସିର ହୋଲଡିଂ ଟିକସ ବାବଦରେ କିମ୍ସ ଏବଂ କିଟ୍ ର ଟଙ୍କାଟିଏ ମଧ୍ୟ ବକେୟା ନାହିଁ । ପ୍ରତିବର୍ଷ ମାର୍ଚ୍ଚ ୩୦ ନିର୍ଦ୍ଧାରିତ ତାରିଖରେ ହୋଲଡିଂ ଟିକସ ଦେଉଥିଲେ । ଏଥର କିନ୍ତୁ ଆଗୁଆ ମାର୍ଚ୍ଚ ୬ ତାରିଖରେ ହୋଲଡିଂ ଟିକସ ପୈଠ କରିଛନ୍ତି ।

ହୋଲଡିଂ ଟିକସ ବାବଦରେ କିଟ୍, କିସ୍, କିମ୍ସ ଆଦି ଅନୁଷ୍ଠାନ ଉପରେ ବିଏମସିର ବାର୍ଷିକ ପ୍ରାପ୍ୟ ହେଉଛି ୩ କୋଟି ୮୪ ଲକ୍ଷ ଟଙ୍କା । ବିଏମସିର ସୂଚନା ଅନୁଯାୟୀ ଏହି ସଂସ୍ଥା ଉପରେ ବକେୟା ହୋଲଡିଂ ଟିକସ ନାହିଁ । ସବୁ ଅପଡେଟ୍ ରହିଛି । ସଂସ୍ଥା ପକ୍ଷରୁ ୨୦୨୪-୨୫ ଆର୍ଥିକ ବର୍ଷ ପାଇଁ ଚଳିତ ମାସ ୬ ତାରିଖରେ ୩ କୋଟି ୮୪ ଲକ୍ଷ ଟଙ୍କା ଆରଟିଜିଏସ୍ ମାଧ୍ୟମରେ ପେମେଣ୍ଟ କରାଯାଇଛି । ସେହି RTGS ନଂ ହେଲା IBR 5202503064114170/dt. 06.03.2025.

ଅନ୍ୟପକ୍ଷରେ ଅଚ୍ୟୁତ ସାମନ୍ତଙ୍କ ସଂସ୍ଥା ବିରୋଧରେ ମିଛ ଖବର ଦେଇ ଓଲଟି ଓଟିଭି ଫସିଯାଇଛି । ଓଟିଭି ନିଜେ ଖୋଳୁଥିବା ଗାତରେ ପଡ଼ିବାକୁ ଯାଉଛି । ଚନ୍ଦକା ଇଣ୍ଡଷ୍ଟ୍ରି୍ଆଲ୍ ଅଞ୍ଚଳରେ ଓଟିଭି ଅଫିସ ହେବା ଦିନଠୁଁ ଏ ପର୍ଯ୍ୟନ୍ତ ବିଏମସିକୁ ସେଠାରୁ ଟଙ୍କାଟିଏ ବି ହୋଲଡିଂ ଟିକସ ଆସିନାହିଁ । ବିଏମସି ହୋଲଡିଂ ଟିକସ ଖାତାରେ ଓଟିଭି ଅଫିସ ବିଲଡିଂ ନାଁ ବି ଚଢ଼ିନି । ହୋଲଡିଂ ଟିକସ ଖାତାରେ ନାଁ ଚଢ଼େଇବା ପାଇଁ ବିଏମସି କର୍ମଚାରୀ ବାରମ୍ବାର ଦୌଡୁଥିଲେ ମଧ୍ୟ କର୍ତ୍ତୃପକ୍ଷ ଧରାଛୁଆ ଦେଉନାହାନ୍ତି । ଅର୍ଥାତ ଓଟିଭି ପ୍ରତିବର୍ଷ ଲକ୍ଷ ଲକ୍ଷ ଟଙ୍କାର ହୋଲଡିଂ ଟିକସ ଫାଙ୍କି ଚାଲିଛି ।