ଇନ୍ଦିରା ଗାନ୍ଧୀଙ୍କ ଚରିତ୍ର ସଂହାରରେ ଓଡିଆ ୱେବ୍ ଚାନେଲ୍

ଭୁବନେଶ୍ୱର: ବ୍ୟଭିଚାର ଖବର ପ୍ରସାରଣକୁ ପ୍ରାଥମିକତା ଦେଉଥିବା ଓଡିଆ ୱେବ୍ ଚାନେଲ୍ ‘ଓଡିଶା ଭାସ୍କର’ ନେହେରୁ ଓ ଗାନ୍ଧୀ ପରିବାରର ଚରିତ୍ର ସଂହାର କରିଛି । ଭାରତର ପ୍ରଥମ ପ୍ରଧାନମନ୍ତ୍ରୀ ଜବାହାରଲାଲ ନେହେରୁ, ପତ୍ନୀ କମଳା ନେହେରୁ, କନ୍ୟା ଇନ୍ଦିରା ଗାନ୍ଧୀଙ୍କ ବ୍ୟକ୍ତିଗତ ଜୀବନ ସମ୍ପର୍କରେ କପୋଳକଳ୍ପିତ ଓ କୁତ୍ସିତ ଖବର ପ୍ରଚାର କରାଯାଇଛି । ଦେଶର ଗର୍ବ ଓ ଗୌରବ ଏହି ଜନନାୟକମାନଙ୍କ ବ୍ୟକ୍ତିଗତ ଜୀବନକୁ ବିକୃତ କରିଥିବା ସଂପୃକ୍ତ ୱେବ୍ ଚାନେଲ୍ ବିରୋଧରେ ଆଜି ଥାନାରେ ଏତଲା ହୋଇଛି ।

ଇନ୍ଦିରା ଗାନ୍ଧୀଙ୍କ ପ୍ରେମ ସମ୍ପର୍କର କଳା ସତ! ଏହି ଶୀର୍ଷକରେ ଓଡ଼ିଶା ଭାସ୍କର ୱେବ୍ ଚାନେଲ୍ ଦୁଇ ଦିନ ତଳେ ଏକ ଭିଡିଓ ଅପଲୋଡ୍ କରିଥିଲା । ଇନ୍ଦିରା ଗାନ୍ଧୀଙ୍କ ଚରିତ୍ରକୁ ଏଥିରେ ବିକୃତ କରାଯିବା ସହ ତାଙ୍କ ପୂର୍ବ ଓ ପର ପୁରୁଷର ଚରିତ୍ର ସଂହାର କରାଯାଇଥିବା ଅଭିଯୋଗ ହୋଇଛି । ନେହେରୁଙ୍କ ପୂର୍ବ ପୁରୁଷ ହିନ୍ଦୁ ନଥିଲେ ବୋଲି ମନଗଢ଼ା କାହାଣୀରେ ଦର୍ଶାଯାଇଛି ।

ସୋସିଆଲ୍ ମିଡିଆରେ ଏହା ଭାଇରାଲ୍ ହେବା ପରେ କଂଗ୍ରେସ ମହଲରେ ତୀବ୍ର ପ୍ରତିକ୍ରିୟା ସୃଷ୍ଟି ହୋଇଛି । ଦେଶ ପାଇଁ ସ୍ୱାଧୀନ ଆଣିଥିବା ଏବଂ ବଳିଦାନ ଦେଇଥିବା ଜନନାୟକମାନଙ୍କ ଚରିତ୍ର ସଂହାର କରାଯାଇ ଲୋକଙ୍କ ମନରେ ଘୃଣାଭାବ ସୃଷ୍ଟି ଉଦ୍ୟମକୁ ବିଭିନ୍ନ ମହଲରୁ ନାପସନ୍ଦ କରାଯାଇଛି । ଏଭଳି ନ୍ୟୁଜ୍ ସଂସ୍ଥା ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି ହୋଇଛି ।

ଭୁବନେଶ୍ୱର ଜିଲ୍ଲା କଂଗ୍ରେସ ପକ୍ଷରୁ ଆଜି କ୍ୟାପିଟାଲ୍ ଥାନାରେ ଓଡ଼ିଶା ଭାସ୍କର ଚାନେଲ୍ ମାଲିକ ମଧୁ ମହାନ୍ତି, ୟୁଟ୍ୟୁବ ଏବଂ ଫେସବୁକ୍ ବିରୋଧରେ ଏତଲା ଦିଆଯାଇଛି । ଏଥିରେ କୁହାଯାଇଛି ଯେ ଇନ୍ଦିରା ଗାନ୍ଧୀ, କମଳା ନେହେରୁ, ଜବାହାରଲାଲ ନେହେରୁ, ସଞ୍ଜୟ ଗାନ୍ଧୀଙ୍କ ବିରୋଧରେ ଯେଭଳି ନିନ୍ଦନୀୟ ଏବଂ ଅଶ୍ଲୀଳ ଖବର ପ୍ରସାରଣ କରିଛି, ତାହା ସାଧାରଣ ଜନତାଙ୍କ ମନରେ ଆଘାତ ଦେଇଛି । ଏପରିକି ଜାତିର ଜନକ ମହାତ୍ମା ଗାନ୍ଧୀଙ୍କୁ ମଧ୍ୟ ଏହି ଚାନେଲ୍ ରେ ଅପମାନିତ କରାଯାଇଛି । ମୁସଲମାନ ସମ୍ପ୍ରଦାୟକୁ ମଧ୍ୟ ଆକ୍ଷେପ କରି ମନ୍ତବ୍ୟ ଦିଆଯାଇଛି । ଏହି ଅପରାଧୀମାନଙ୍କୁ ତୁରନ୍ତ ଗିରଫ କରିବା ସହ ଏମାନଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ପାଇଁ ଦାବି କରାଯାଇଛି ।

ସେହିଭଳି ପିସିସି ସାଧାରଣ ସମ୍ପାଦିକା ରଶ୍ମି ମହାପାତ୍ରଙ୍କ ପକ୍ଷରୁ କୋର୍ଟରେ ଏକ ଫୌଜଦାରୀ ମାନହାନି ମାମଲା ରୁଜୁ କରାଯାଇଛି । ଏଥିରେ ଓଡ଼ିଶା ଭାସ୍କର ମାଲିକ ମଧୁ ମହାନ୍ତି, ୟୁଟ୍ୟୁବ୍ ଏବଂ ଫେସବୁକ୍ କୁ ପକ୍ଷ କରାଯାଇଛି । ଆଇପିସି ଧାରା ୪୯୯, ୫୦୦ ଏବଂ ଦେଶଦ୍ରୋହ ୧୨୪(କ) ମାମଲା ରୁଜୁ ପାଇଁ ଆବେଦନ କରାଯାଇଥିବା ଜଣାପଡ଼ିଛି ।