ବାରବାଟୀ ଲଜ୍ଜା: ଧିକ୍ ତୁମ ପାରିବାପଣିଆ

ଭୁବନେଶ୍ୱର: ବାରବାଟୀ ଷ୍ଟାଡିୟମ୍ ରେ ଇଂଲଣ୍ଡ ସହ ଭାରତ ଖେଳୁଥିବା ଚିତ୍ତାକର୍ଷକ ଅନ୍ତର୍ଜାତୀୟ କ୍ରିକେଟ୍ ମ୍ୟାଚ୍ ମଝିରେ ଫ୍ଲଡ୍ ଲାଇଟ୍ ଲିଭିଯିବା ଏବଂ ଲାଇଟ୍ ଆସିବାକୁ ୨୫ ମିନିଟ୍ ସମୟ ଲାଗିବା ଅକଳ୍ପନୀୟ ଲାଗୁଥିଲେ ବି ସାରା ବିଶ୍ୱବାସୀ ଆଖିରେ ଦେଖିଲେ । ଏଥିପାଇଁ ଦୋଷୀ ଯିଏ ହୁଅନ୍ତୁ ନା କାହିଁକି, ଓଡ଼ିଶାକୁ ହିଁ ନିନ୍ଦିତ ହେବାକୁ ପଡ଼ିଛି । ବିଶ୍ୱ ଦରବାରରେ ଓଡ଼ିଶାକୁ ଭୀଷଣ ଭାବେ ଲଜ୍ଜିତ ହେବାକୁ ପଡ଼ିଛି । ୫ ବର୍ଷର ବ୍ୟବଧାନ ପରେ ଅନ୍ତର୍ଜାତୀୟ କ୍ରିକେଟ୍ ମ୍ୟାଚ୍ ପାଇଥିବା ବାରବାଟୀ ଷ୍ଟାଡିୟମ୍ କୁ ଏହି ଅଘଟଣ କଳଙ୍କର ଟିକା ପିନ୍ଧାଇ ଦେଇଛି ।

ଇଂଲଣ୍ଡ ଦେଇଥିବା ୩୦୫ ରନ୍ ର ଟାର୍ଗେଟ୍ କୁ ହାସଲ କରିବା ଲାଗି ବାରବାଟୀ ପଡ଼ିଆରେ ଓହ୍ଲାଇଥିଲେ ଭାରତର ଦୁଇ ଓପନିଂ ବ୍ୟାଟସମ୍ୟାନ୍ ରୋହିତ ଶର୍ମା ଓ ଶୁବନମ୍ ଗିଲ । ସେମାନଙ୍କ ଧୂଆଁଧାର ବ୍ୟାଟିଂରେ ଖେଳ ଜମି ଆସୁଥିଲା ବେଳେ ଫ୍ଲଡ୍ ଲାଇଟ୍ ଲିଭି ଯାଇଥିଲା । ଫଳରେ ଖେଳ ଅଟକି ଯାଇଥିଲା । କ୍ୟାପଟେନ୍ ରୋହିତ ଶର୍ମା ବିରକ୍ତି ଭାବରେ ପଡ଼ିଆ ଛାଡ଼ିଥିଲେ । ଜେନେରେଟର ଖରାପ ହେବାରୁ ଏଭଳି ସ୍ଥିତି ଉପୁଜିଥିଲେ ମଧ୍ୟ ବ୍ୟାକ୍ ଅପ୍ ଜେନେରେଟର ଚାଲୁ କରିବାକୁ ମିନିଟ୍ କି ଦୁଇ ମିନିଟ୍ ନୁହେଁ, ପୂରା ୨୫ ମିନିଟ୍ ଲାଗିଗଲା । ସୁତରାଂ ଅନ୍ତର୍ଜାତୀୟ ମ୍ୟାଚ୍ ଖେଳାଉଥିବା ବାରବାଟୀ ପଡ଼ିଆ ଖେଳ ମଝିରୁ ୨୫ ମିନିଟ୍ ଧରି ଅନ୍ଧାରରେ ରହିଲା ।

ତେବେ ବିଭ୍ରାଟ ସେତିକିରେ ଅଟକିଲା ନାହିଁ । ନୂଆ ଜେନେରେଟର୍ ଲାଗିବା ପରେ ଲାଇଟ୍ ଜଳିଲା । ଅଟକି ରହିଥିବା ଖେଳ ପୁଣି ଆରମ୍ଭ ହେଲା । ରୋହିତ ଶର୍ମା ଓ ଶୁବନମ୍ ଗିଲ ପୋଜିସନ୍ ନେଲେ । ଆଉ ଠିକ୍ ସେହି ସମୟରେ ବାଜି ଉଠିଲା ଡିଜେ ମ୍ୟୁଜିକ୍ । ଉଚ୍ଚ ଶବ୍ଦରେ ଷ୍ଟାଡିୟମ୍ ଫାଟି ପଡ଼ିଲା । ବ୍ୟାଟିଂରେ ଧ୍ୟାନ ଲଗାଇ ନ ପାରି ପୁଣି ବିରକ୍ତି ପ୍ରକାଶ କଲେ ରୋହିତ ଶର୍ମା । ଅମ୍ପାୟାର୍ କିଛି ସମୟ ପାଇଁ ଖେଳ ବନ୍ଦ କରିବାକୁ ବାଧ୍ୟ ହୋଇଥିଲେ । ମ୍ୟୁଜିକ୍ ବନ୍ଦ ପରେ ଯାଇ ଖେଳ ଆରମ୍ଭ ହୋଇଥିଲା ।

ଏକ ଅନ୍ତର୍ଜାତୀୟ କ୍ରିକେଟ୍ ମ୍ୟାଚ୍ ଏଭଳି ପରିସ୍ଥିତିର ସାମନା କରିବା ବିରଳ ଘଟଣା ବୋଲି କୁହାଯାଉଛି । ଗାଁ କ୍ରିକେଟ୍ ମ୍ୟାଚ୍ ରେ ବି ଏଭଳି ସ୍ଥିତି ସୃଷ୍ଟି ହେଉ ନ ଥିବ । ଆଜିକାଲି ବାହାଘରିଆ ଭୋଜିରେ ବି ଲାଇଟ୍ ବ୍ୟବସ୍ଥାକୁ ସୁନିଶ୍ଚିତ କରିବା ପାଇଁ ପ୍ଲାନ୍-ବି, ପ୍ଲାନ୍-ସି ପ୍ରସ୍ତୁତ ରଖାଯାଉଛି । ପ୍ରଥମ ଲାଇଟ୍ ଖରାପ ହେବା ମାତ୍ରେ ଦ୍ୱିତୀୟ ବ୍ୟବସ୍ଥା କରିବାକୁ ମୁହୂର୍ତ୍ତେ ବି ସମୟ ଲାଗୁନି । ସବୁକିଛି ସ୍ୱୟଂଚାଳିତ । ମାତ୍ର ବାରବାଟୀରେ ଅନ୍ତର୍ଜାତୀୟ ମ୍ୟାଚ୍ ବେଳେ ଫ୍ଲଡ୍ ଲାଇଟ୍ ଚାଲିଯିବା ଏବଂ ଆଲୁଅ ଫେରାଇ ଆଣିବାକୁ ପାଖାପାଖି ଅଧଘଣ୍ଟା ସମୟ ଲାଗିବା ସମସ୍ତଙ୍କୁ ଚକିତ କରୁଛି ।

କ୍ରିକେଟ୍ ପ୍ରେମୀଙ୍କ ମନରେ ତୀବ୍ର ପ୍ରତିକ୍ରିୟା ଏବଂ ବିଶ୍ୱବ୍ୟାପୀ ନିନ୍ଦିତ ହେବା ପରେ ଓସିଏ ସମ୍ପାଦକ ସଞ୍ଜୟ ବେହେରା ଆଜି ଗଣମାଧ୍ୟମକୁ ଅଜବ ସଫେଇ ଦେଇଛନ୍ତି । କୁଆଡେ,ଦ୍ୱିତୀୟ ଜେନେରେଟର ରହିଥିବା ଗାଡ଼ି ଆଗରେ ଖେଳାଳିମାନଙ୍କୁ ନେଇ ଆସିଥିବା ବସ୍ ଟି ରହିଯାଇଥିଲା । ଆଉ ସେହି ବସ୍ ଡ୍ରାଇଭର ଅନ୍ୟତ୍ର କେଉଁଠି ବସି ଖେଳ ଦେଖୁଥିଲେ । ତେଣୁ ଦ୍ୱିତୀୟ ଜେନେରେଟର ଲାଗିବାରେ ବିଳମ୍ବ ହୋଇଥିଲା ।
ଓସିଏ ସମ୍ପାଦକଙ୍କର ଏହି ସଫେଇ ଆଈ ମା କାହାଣୀ ଭଳି ମନେ ହେଉଛି । କାରଣ ଏହା ଯେ ଡାହା ମିଛ ହୋଇପାରେ ତାହା ଭାବିବାକୁ ବି ପଡୁନି । ଛୋଟିଆ ପିଲାଙ୍କୁ ବାଆଁରେଇ ଲଲିପପ୍ ଦେବା ଭଳିଆ କଥା । ଏକ ଜରୁରୀକାଳୀନ ପରିସ୍ଥିତିର ସାମନା ପାଇଁ ରହିଥିବା ଦ୍ୱିତୀୟ ଜେନେରେଟର କେଉଁଠି କିଭଳି ଅବସ୍ଥାରେ ରହିବା କଥା ତାହା ବୁଝାଇବାର ଆବଶ୍ୟକତା ନାହିଁ । ବେହେରା ବାବୁ ସେଭଳି ଗପ ଆଉ ଶୁଣାନ୍ତୁ ନାହିଁ । ଓସିଏ ମୁଣ୍ଡରୁ ଦୋଷ ଖସାଇବା ପାଇଁ ଏହା ତାଙ୍କର ଉଦ୍ୟମ ବୋଲି ସମସ୍ତେ କହୁଛନ୍ତି ।

ସେପଟେ ଖେଳାଳୀ ମାନଙ୍କୁ ନେଇଥିବା ଡଲଫିନ୍ ବସ୍ ର ମାଲିକ କହିଛନ୍ତି ଡ୍ରାଇଭର୍ ବସ୍ ପାଖରେ ଉପସ୍ଥିତ ଥିଲେ ଏବଂ ଦୁଇ ତିନି ମିନିଟ୍ ରେ ପହଞ୍ଚି ଯାଇଥିଲେ ।

କେବଳ ଓସିଏର ଏହା ଦାୟିତ୍ୱହୀନତା ବୋଲି କୁହାଯାଇପାରିବ ନାହିଁ । ରାଜ୍ୟ ସରକାରଙ୍କର ମଧ୍ୟ ଏଥିରେ ଉତ୍ତରଦାୟିତ୍ୱ ରହିଛି । କାରଣ ବାରବାଟୀରେ ଭାରତ-ଇଂଲଣ୍ଡ କ୍ରିକେଟ୍ ମ୍ୟାଚ୍ ପାଇଁ ଲମ୍ବା ସମୟରୁ ପ୍ରସ୍ତୁତି ଚାଲିଥିଲା । ଓସିଏର ପ୍ରସ୍ତୁତି କାର୍ଯ୍ୟକୁ ରାଜ୍ୟ ସରକାର ତଦାରଖ କରୁଥିଲେ । ନିଜେ ମୁଖ୍ୟମନ୍ତ୍ରୀ ମୋହନ ମାଝୀ ସମୀକ୍ଷା ବୈଠକ କରିଥିଲେ । କ୍ରୀଡ଼ାମନ୍ତ୍ରୀ ସୁରଜ ସୂର୍ଯ୍ୟବଂଶୀ ମ୍ୟାଚ୍ ପ୍ରସ୍ତୁତି ତଦାରଖ ପାଇଁ ଚାରି ଚାରି ଥର ବାରବାଟୀ ଷ୍ଟାଡିୟମ୍ ଯାଇଥିଲେ । ତେଣୁ ମ୍ୟାଚ୍ ବେଳେ ଏତେବଡ଼ ଅଘଟଣରେ ନିନ୍ଦା ଓ ଅପବାଦରୁ ଖସିବା ପାଇଁ ରାଜ୍ୟ ସରକାର ଓସିଏକୁ ଦାୟୀ କରି ବସି ପଡ଼ିଲେ ଚଳିବ ନାହିଁ । ଉତ୍ତରଦାୟିତ୍ୱ ନେବାକୁ ପଡ଼ିବ ।

ଆଜି କ୍ରୀଡ଼ା ବିଭାଗ ପକ୍ଷରୁ ଓସିଏକୁ ବାରବାଟୀ ଫ୍ଲଡ୍ ଲାଇଟ୍ ବିଭ୍ରାଟର କାରଣ ଦର୍ଶାଅ ନୋଟିସ୍ ଜାରି କରାଯାଇଛି । କାହିଁକି ଲାଇଟ୍ ବନ୍ଦ ହେଲା ୧୦ ଦିନରେ ଉତ୍ତର ରଖିବାକୁ ନିର୍ଦ୍ଦେଶ ଦିଆଯାଇଛି । ଓସିଏର ଦାୟିତ୍ୱହୀନତା ପାଇଁ କାର୍ଯ୍ୟାନୁଷ୍ଠାନ ହେବ ବୋଲି କ୍ରୀଡ଼ାମନ୍ତ୍ରୀ ଗଣମାଧ୍ୟକୁ ପ୍ରତିକ୍ରିୟା ଦେଇଛନ୍ତି ।

ବାରବାଟୀରେ ଏତେବଡ଼ ବିଭ୍ରାଟ୍ ପାଇଁ ବିଜେଡି ଓ କଂଗ୍ରେସ ରାଜ୍ୟ ସରକାରଙ୍କୁ କଡ଼ା ସମାଲୋଚନା କରିଛନ୍ତି । ବିଜେଡ଼ି ପକ୍ଷରୁ କ୍ରୀଡ଼ାମନ୍ତ୍ରୀଙ୍କ ଇସ୍ତଫା ଦାବି କରାଯାଇଛି ।