ଭୁବନେଶ୍ୱର: ରାଜନୀତିରେ ଆଉ ଜଣେ ‘ବାବୁ’ଙ୍କର ପ୍ରବେଶ ହୋଇଛି । ପୂର୍ବତନ ମୁଖ୍ୟ ଶାସନ ସଚିବ ବିଜୟ ପଟ୍ଟନାୟକ ଆଜି କଂଗ୍ରେସରେ ଯୋଗଦେଇଛନ୍ତି । ଦିଲ୍ଲୀ ଏଆଇସିସି କାର୍ଯ୍ୟାଳୟରେ ସଭାପତି ମଲ୍ଲିକାର୍ଜୁନ ଖଡ଼ଗେଙ୍କ ଉପସ୍ଥିତିରେ ସେ ଆନୁଷ୍ଠାନିକ ଭାବେ ‘ହାତ’ ଧରିଛନ୍ତି ।
ଶ୍ରୀ ପଟ୍ଟନାୟକ କଂଗ୍ରେସରେ ଯୋଗଦେବେ ବୋଲି ପୂର୍ବରୁ ଆଭାସ ମିଳିସାରିଥିଲା । ତେବେ କେବେ ଯୋଗଦେବେ ତାହା ସ୍ପଷ୍ଟ ହୋଇ ନ ଥିଲା । ତିନି ଦିନ ତଳେ ପିସିସି ସଭାପତି ଶରତ ପଟ୍ଟନାୟକଙ୍କ ସହ ସେ ଦିଲ୍ଲୀ ଯିବା ପରେ ଖବରରେ ସ୍ପଷ୍ଟତା ଆସିଥିଲା ।
ଆଜି ସେ କଂଗ୍ରେସରେ ଯୋଗଦେବା ପରେ ରାଜ୍ୟ ସରକାରଙ୍କୁ ଶାଣିତ ସ୍ୱରରେ ସମାଲୋଚନା କରିଛନ୍ତି । ରାଜ୍ୟରେ କୁଶାସନ, ଦୁର୍ନୀତି ଓ ହିଂସାର ବାତାବରଣ ଚାଲିଛି । ଏ ବ୍ୟବସ୍ଥାରେ ପରିବର୍ତ୍ତନର ଆବଶ୍ୟକତା ରହିଛି । ଓଡ଼ିଶାରେ ଗଣତନ୍ତ୍ରର ପୁନଃ ପ୍ରତିଷ୍ଠା ହେବା ଦରକାର । ବର୍ତ୍ତମାନର ଅବସ୍ଥାରେ ପରିବର୍ତ୍ତନ ପାଇଁ ରାଜନୀତିକୁ ଆସିଛି ବୋଲି ସେ କହିଛନ୍ତି । ଏଥିସହ ଆଗାମୀ ସାଧାରଣ ନିର୍ବାଚନ ଲଢ଼ିବେ ବୋଲି ଇଚ୍ଛା ପ୍ରକାଶ କରିଛନ୍ତି ।
୧୯୭୬ ବ୍ୟାଚ୍ ର ଆଇଏଏସ୍ ହେଉଛନ୍ତି ବିଜୟ ପଟ୍ଟନାୟକ । ରାଜ୍ୟର ମୁଖ୍ୟ ଶାସନ ସଚିବ ପଦରେ ଥାଇ ୨୦୧୩ ମସିହାରେ ଚାକିରିରୁ ଅବସର ନେଇଥିଲେ । ଖୁବ୍ ପ୍ରଭାବଶାଳୀ ଅଫିସର ଥିଲେ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କର ଥିଲେ ଅତ୍ୟନ୍ତ ଅନୁଗତ । ୨୦୧୦ ମସିହା ସେପ୍ଟେମ୍ବର ପର୍ଯ୍ୟନ୍ତ ସେ ମୁଖ୍ୟମନ୍ତ୍ରୀଙ୍କର ପ୍ରମୁଖ ଶାସନ ସଚିବ ଭାବେ କାର୍ଯ୍ୟ କରିଥିଲେ । ଏହାପରେ ତାଙ୍କୁ ମୁଖ୍ୟ ଶାସନ ସଚିବ ପଦବୀ ମିଳିଥିଲା । ଏକଦା ପ୍ୟାରୀମୋହନ ମହାପାତ୍ରଙ୍କ ବିକଳ୍ପ ଭାବେ ତାଙ୍କୁ କିଛି ମହଲରେ ଚିତ୍ରଣ କରାଯାଉଥିଲା ।
ମୁଖ୍ୟମନ୍ତ୍ରୀଙ୍କର ବିଶ୍ୱସ୍ତ ଥିବା ଶ୍ରୀ ପଟ୍ଟନାୟକ ଚାକିରିରୁ ଅବସର ଗ୍ରହଣ କଲା ପରେ ଷ୍ଟାଫ୍ ସିଲେକ୍ସନ୍ କମିସନ୍ ର ଅଧ୍ୟକ୍ଷ ଭାବେ ନିଯୁକ୍ତି ପାଇଥିଲେ । ଏହାପରେ ତାଙ୍କୁ ମାନବାଧିକାର କମିସନ ଭାବେ ନିଯୁକ୍ତି ମିଳିଥିଲା । ଅଚାନକ ସେଠାରୁ ଇସ୍ତଫା ଦେଇ ୨୦୧୫ ମସିହାରେ ବେଦାନ୍ତର ପ୍ରସ୍ତାବିତ ପୁରୀ ବିଶ୍ୱବିଦ୍ୟାଳୟ ପ୍ରକଳ୍ପର ଅଧ୍ୟକ୍ଷ ଭାବେ ଯୋଗଦେଇଥିଲେ । ସେଠାରେ ଦୁଇବର୍ଷ କାର୍ଯ୍ୟ କଲା ପରେ ବେଦାନ୍ତ ଫାଉଣ୍ଡେସନ୍ ମୁଖ୍ୟ ଅନୀଲ ଅଗ୍ରୱାଲ୍ ଙ୍କ ଉପରେ ଅସନ୍ତୋଷ ପ୍ରକାଶ କରି ଚାକିରି ଛାଡ଼ି ଦେଇଥିଲେ ।
ସେବେଠାରୁ ସେ ରାଜନୀତିରେ ଯୋଗଦେବା ନେଇ ଚର୍ଚ୍ଚା ଲାଗି ରହିଥିଲା । ନିକଟରେ ଓଡ଼ିଶାରେ ପାଦ ଥାପିଥିବା ବିଆରଏସ୍ ରେ ସେ ଯୋଗଦେଉଥିବା ପ୍ରଚାର ହୋଇଥିଲା । ମାତ୍ର ତା’ ପୂର୍ବରୁ ସେ ଦିଲ୍ଲୀରେ ରାହୁଲ ଗାନ୍ଧୀଙ୍କୁ ଭେଟି କଂଗ୍ରେସରେ ଯୋଗଦେବାକୁ ଇଚ୍ଛା ପ୍ରକାଶ କରିସାରିଥିଲେ । ଯାହା ଆଜି ବାସ୍ତବ ରୂପ ନେଇଛି ।
