ଭୁବନେଶ୍ୱର: ଭାରତର ମହାମହିମ ରାଷ୍ଟ୍ରପତି ଶ୍ରୀମତୀ ଦ୍ରୌପଦୀ ମୁର୍ମୁ ଆଜି ନିଜ କଲେଜ ମାଟି ରମାଦେବୀ ମହିଳା ବିଶ୍ୱବିଦ୍ୟାଳୟର ଦ୍ୱିତୀୟ ସମାବର୍ତ୍ତନ ଉତ୍ସବରେ ଯୋଗଦେଇଥିଲେ । ଏହି ଅବସରରେ ୪୦ ବର୍ଷ ତଳର ପୁରୁଣା ସ୍ମୃତିକୁ ମନେପକାଇ ଭାବବିହ୍ୱଳ ହୋଇଯାଇଥିଲେ ରାଷ୍ଟ୍ରପତି । ତାଙ୍କ ଜୀବନର ଗତିପଥରେ ଏହି ଶିକ୍ଷାନୁଷ୍ଠାନ ପ୍ରେରଣାର ଉତ୍ସ ବୋଲି କହିଥିଲେ ।
ରାଷ୍ଟ୍ରପତି ତାଙ୍କ ଦୀକ୍ଷାନ୍ତ ଭାଷଣ ଆରମ୍ଭରେ ରମାଦେବୀର ପବିତ୍ର ମାଟିକୁ ବନ୍ଦନ କରିଥିଲେ । ଅଡିିଟୋରିୟମ୍ ହଲ୍ ଉପରେ ଆଖି ବୁଲାଇ କିଛି ସମୟ ପାଇଁ ଭାବୁକ ହୋଇଯାଇଥିଲେ । କହିଥିଲେ- ଏହି ସେଇ ଅଡିଟୋରିୟମ୍.. ସେଇ ସୁଗନ୍ଧ.. ସେଇ ମହକ.. ସେଇ କାନ୍ଥ.. । ସମସ୍ତେ ମତେ ଯେମିତି ଆହ୍ୱାନ କରୁଛନ୍ତି । ଶ୍ରଦ୍ଧାରେ ପାଛୋଟି ଆଣୁଛନ୍ତି ।
ରାଷ୍ଟ୍ରପତି ତାଙ୍କ ଛାତ୍ରୀ ଜୀବନର ସ୍ମୃତିକୁ ମନେ ପକାଇଥିଲେ । କହିଥିଲେ, ମୁଁ ଆଦିବାସୀ ହଷ୍ଟେଲରେ ରହୁଥିଲି । ଅବସର ସମୟରେ ହଷ୍ଟେଲ୍ ପୋର୍ଟିକୋ ପାଖରେ ବସିବାର ମଜ୍ଜା ନିଆରା ଥିଲା । କଲେଜରେ ମୁଖ୍ୟମନ୍ତ୍ରୀ, ମୁଖ୍ୟ ଶାସନ ସଚିବଙ୍କ ଝିଅଠାରୁ ଗରିବ ଚାଷୀର ଝିଅ ସମସ୍ତେ ଆମେ ଏକାଠି ପଢ଼ୁଥିଲୁ । ଆମ ଭିତରେ କଥାବାର୍ତ୍ତାରେ ଭେଦଭାବର ବାତ୍ସ୍ନା ନ ଥିଲା । ଲାଗୁଥିଲା ଦୁର୍ଗମ ପଲ୍ଲୀରୁ ରାଜଧାନୀ ଯାଏଁ ସମସ୍ତେ ସମାନ । ମନରେ ଏହା ଉଦ୍ଦୀପନା ସୃଷ୍ଟି କରୁଥିଲା ।
ନିଜର ଆର୍ଥିକ ଦୂରାବସ୍ଥା ସମ୍ପର୍କରେ ମନେ ପକାଇଥିଲେ ରାଷ୍ଟ୍ରପତି । କହିଥିଲେ, ସେତେବେଳର ପରିସ୍ଥିତି ପାଇଁ କ୍ୟାଣ୍ଟିନ୍ ରେ ଖାଉ ନ ଥିଲି । ବାହାର ଠେଲା ଗାଡ଼ିରୁ କିଛି ଖାଇ ରହିଯାଉଥିଲି । କେବେ କେମିତି ୨୫ ପଇସାର ବାଦାମ ମିଳିଗଲେ ବଡ଼କଥା ବୋଲି ରାଷ୍ଟ୍ରପତି କହିଥିଲେ ।
ଏହି ଅବସରରେ ରାଷ୍ଟ୍ରପତି କଲେଜର ଦୁଇ ଶିକ୍ଷୟିତ୍ରୀଙ୍କୁ ମଧ୍ୟ ମନେ ପକାଇଥିଲେ । ସେମାନେ ହେଉଛନ୍ତି, ଅର୍ଥନୀତି ଅଧ୍ୟାପିକା ବୀଣାପାଣି ମହାନ୍ତି ଏବଂ ସାହିତ୍ୟ ଅଧ୍ୟାପିକା ଶକୁନ୍ତଳା ବଳିୟାରସିଂହ । ସେମାନଙ୍କ ଛାତ୍ରୀଭାବେ ନିଜକୁ ସୌଭାଗ୍ୟ ମଣିଥିଲେ ।
ରାଷ୍ଟ୍ରପତି ତାଙ୍କ ଅଭିଭାଷଣରେ ନାରୀଶକ୍ତିର ଗୁରୁତ୍ୱ କହିଥିଲେ । ବର୍ତ୍ତମାନର ନାରୀଶକ୍ତି ସଶକ୍ତ ହେବାର ଆବଶ୍ୟକତା ରହିଛି । ସେମାନଙ୍କ ପାଖରେ ସାମର୍ଥର ଅଭାବ ନାହିଁ, କେବଳ ପ୍ରଚେଷ୍ଟା ଦରକାର । ଜୀବନ ବିଶ୍ୱବିଦ୍ୟାଳୟରେ ସଫଳ ହେବାକୁ ହେଲେ ନିଜ ଉପରେ ଆସ୍ଥା ରଖିବାକୁ ପଡ଼ିବ ବୋଲି ରାଷ୍ଟ୍ରପତି ଉପସ୍ଥିତ ଛାତ୍ରଛାତ୍ରୀଙ୍କୁ ଆହ୍ୱାନ ଦେଇଥିଲେ ।
ଏହି କାର୍ଯ୍ୟକ୍ରମରେ ରାଜ୍ୟପାଳ ପ୍ରଫେସର ଗଣେଶୀ ଲାଲ, କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ମନ୍ତ୍ରୀ ରୋହିତ ପୂଜାରୀ ଏବଂ ଅଶୋକ ପଣ୍ଡା ଉପସ୍ଥିତ ଥିଲେ ।
ରାଷ୍ଟ୍ରପତି ଶ୍ରୀମତୀ ମୁର୍ମୁ ଦୁଇଦିନିଆ ଓଡ଼ିଶା ଗସ୍ତରେ ଆସିଛନ୍ତି । ବାୟୁସେନାର ସ୍ୱତନ୍ତ୍ର ବିମାନରେ ଆସି ଦିନ ପ୍ରାୟ ୧୨ଟାରେ ଭୁବନେଶ୍ୱରରେ ପହଞ୍ଚିଥିଲେ । ବିମାନବନ୍ଦରରେ ରାଜ୍ୟପାଳ ପ୍ରଫେସର ଲାଲ, ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ, କେନ୍ଦ୍ରମନ୍ତ୍ରୀ ଶ୍ରୀ ପ୍ରଧାନ ତାଙ୍କୁ ସ୍ୱାଗତ କରିଥିଲେ । ରାଷ୍ଟ୍ରପତି ସେଠାରୁ ସିଧାସଳଖ ଆସି ଉକ୍ରଳ ମଣ୍ଡପରେ ଅନୁଷ୍ଠିତ ଜ୍ଞାନପ୍ରଭା ମିସନ୍ ର ପ୍ରତିଷ୍ଠା ଦିବସ ସମାରୋହରେ ଯୋଗଦେଇଥିଲେ ।
ଆସନ୍ତାକାଲି ସକାଳେ ରାଷ୍ଟ୍ରପତି ଶ୍ରୀଲିଙ୍ଗରାଜ ମନ୍ଦିର ଯାଇ ମହାପ୍ରଭୁଙ୍କୁ ଦର୍ଶନ କରିବେ । ପରେ ସେ କଟକସ୍ଥିତ ଜାତୀୟ ଧାନ ଗବେଷଣା ପ୍ରତିଷ୍ଠାନରେ ଇଣ୍ଡିଆନ୍ ରାଇସ୍ କଂଗ୍ରେସକୁ ଉଦଘାଟନ କରିବେ ।
