ଭୁବନେଶ୍ୱର: ଜି.ଉଦୟଗିରିର ବିଧାୟକ ସାଲୁଗା ପ୍ରଧାନ ହେବେ ଓଡ଼ିଶା ବିଧାନସଭାର ଉପବାଚସ୍ପତି । ବିଜେଡି ପକ୍ଷରୁ ଆଜି ତାଙ୍କ ନାଁ ଘୋଷଣା ହେବା ପରେ ସେ ପ୍ରାର୍ଥୀପତ୍ର ଦାଖଲ କରିଛନ୍ତି । ଆସନ୍ତାକାଲି ସକାଳ ସାଢ଼େ ୯ଟାରେ ଉପବାଚସ୍ପତି ନିର୍ବାଚନ ଅନୁଷ୍ଠିତ ହେବ । ଅନ୍ୟ କେହି ପ୍ରାର୍ଥୀପତ୍ର ଦାଖଲ କରିବାର ସମ୍ଭାବନା ନ ଥିବାରୁ ଆନୁଷ୍ଠାନିକ ଭାବେ ତାଙ୍କୁ ଉପବାଚସ୍ପତି ଭାବେ ଘୋଷଣା କରାଯିବ ।
୬୪ ବର୍ଷୀୟ ସାଲୁଗା ପ୍ରଧାନ ହେଉଛନ୍ତି କନ୍ଧମାଳ ଜିଲ୍ଲାର ଜଣେ ପ୍ରମୁଖ ଆଦିବାସୀ ଚେହେରା । ବିଜେଡି ଟିକେଟରେ ୨୦୦୦ ମସିହାରେ ଜି. ଉଦୟଗିରି ବିଧାନସଭା ଆସନରୁ ସେ ପ୍ରଥମ ଥର ବିଧାନସଭାକୁ ନିର୍ବାଚିତ ହୋଇଥିଲେ । ୨୦୧୯ ମସିହାରେ ସେ ଦ୍ୱିତୀୟ ଥର ପାଇଁ ବିଧାନସଭାକୁ ଆସିଛନ୍ତି ।
ଉପବାଚସ୍ପତି ପଦ ଲାଗି ପ୍ରାର୍ଥୀ ହୋଇଥିବାରୁ ଶ୍ରୀ ପ୍ରଧାନ ଦଳର ସଭାପତି ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଗଭୀର କୃତଜ୍ଞତା ଜଣାଇଛନ୍ତି । ବିଧାନସଭା ଗୃହ ପରିଚାଳନାରେ ବରିଷ୍ଠ ସଦସ୍ୟମାନଙ୍କର ସହଯୋଗ ମଧ୍ୟ କାମନା କରିଛନ୍ତି । ତାଙ୍କୁ ଉପବାଚସ୍ପତି ପ୍ରାର୍ଥୀ କରି ଆଗାମୀ ନିର୍ବାଚନ ପରିପ୍ରେକ୍ଷୀରେ ବିଜେଡି ଆଦିବାସୀ କାର୍ଡ ଖେଳିଛି ବୋଲି ବିରୋଧୀ ଦଳଙ୍କର ଅଭିଯୋଗର କଡ଼ା ଜବାବ ଦେଇଛନ୍ତି ସାଲୁଗା । ଦୁଇଥରର ବିଧାୟକ ଭାବେ ବିଧାନସଭାରେ ଅଭିଜ୍ଞତା ଥିବାରୁ ଉପବାଚସ୍ପତି ପଦ ଲାଗି ତାଙ୍କଠାରେ ଯୋଗ୍ୟତାର ଅଭାବ ନାହିଁ ବୋଲି ସେ ଦୃଢ଼ତାର ସହ କହିଛନ୍ତି ।
ସୂଚନାଯୋଗ୍ୟ, ବିଧାନସଭାର ଉପବାଚସ୍ପତି ପଦରୁ ରଜନୀକାନ୍ତ ସିଂହ ଗତ ୮ ତାରିଖ ଦିନ ଇସ୍ତଫା ଦେଇଥିଲେ । ଦଳୀୟ କାର୍ଯ୍ୟକ୍ରମରେ ସକ୍ରିୟ ରହିବାକୁ ସେ ଏହି ସାମ୍ବିଧାନିକ ପଦରୁ ଇସ୍ତଫା ଦେଇଥିବା ସ୍ପଷ୍ଟ କରିଥିଲେ । ସେହିଦନଠାରୁ ଉପବାଚସ୍ପତି ପଦ ଖାଲି ପଡ଼ିଛି ।
