ଭୁବନେଶ୍ୱର:ପାଲଲହଡ଼ା ଥାନା ଅନ୍ତର୍ଗତ ଶିଗଡ଼ ପଞ୍ଚାୟତର ନନ୍ଦିନୀପାଲି ଗାଁରେ ଏକ ବୀଭତ୍ସ କାଣ୍ଡ ଘଟିଛି । ଜଣେ ମହିଳାଙ୍କ ପ୍ରତି ଦୁର୍ବୃତ୍ତମାନେ ବର୍ବରତାର ସବୁ ସୀମା ଟପିଯାଇଛନ୍ତି । ୩୨ ବର୍ଷୀୟ ମହିଳାଙ୍କୁ କେବଳ ଗଣଦୁଷ୍କର୍ମ ଓ ହତ୍ୟା କରିନାହାନ୍ତି, ତାଙ୍କ ଗୁପ୍ତାଙ୍ଗକୁ କ୍ଷତାକ୍ତ କରି ଗର୍ଭାଶୟ ଓ ଅନ୍ତନଳୀ ବାହାର କରିଦେଇଛନ୍ତି । ଗାଁର ଅଙ୍ଗନବାଡ଼ି କେନ୍ଦ୍ର ଭିତରୁ ତାଙ୍କର କ୍ଷତବିକ୍ଷତ ମୃତଦେହ ଉଦ୍ଧାର କରାଯାଇଛି ।
ସୂଚନା ଅନୁଯାୟୀ, ନନ୍ଦିନୀପାଲି ଗ୍ରାମର ଅଜୁ ନାୟକ ଓ ତାଙ୍କ ପତ୍ନୀ ରମ୍ଭା ନାୟକ ନିଜର ୪ ପିଲା ସହ ଦେବଗଡ଼ ଜିଲ୍ଲା ବାରକୋଟ ଥାନା ଡେରାପଥରରେ ରହି ଲୋକଙ୍କ ଗାଈ ଚରାଉଥିଲେ । ସେଥିରୁ ଅର୍ଜିତ ରୋଜଗାରରେ ପରିବାର ଚଳୁଥିଲା । ଗାଁରେ ବାପାମାଆ ଅନ୍ୟତ୍ର ରହୁଥିଲା ବେଳେ ନିଜ ଘରେ ତାଲା ପଡ଼ିଥିଲା । ବିପିଏଲ୍ ଚାଉଳ ପାଇଁ ଗତ ୧୯ ତାରିଖରେ ରମ୍ଭା ନନ୍ଦିନୀପାଲିକୁ ଏକା ଆସିଥିଲେ । ଶିଗଡ଼ ପଞ୍ଚାୟତ ଅଫିସରୁ ୩୫ କେଜି ଚାଉଳ ଉଠାଇ ସେ ଘରକୁ ଯାଇଥିଲେ । ପରଦିନ ସଂଧ୍ୟାରେ ଘର ନିକଟରେ ଥିବା ନବନିର୍ମିତ ଅଙ୍ଗନବାଡି କେନ୍ଦ୍ର ଆଗରେ କେତେଜଣ ଶିଶୁ ଖେଳୁଥିବା ବେଳେ ରମ୍ଭାଙ୍କ କ୍ଷତବିକ୍ଷତ ମୃତଦେହ ଭିତରେ ପଡ଼ିଥିବା ଦେଖିଥିଲେ ।
ପୁଲିସ ଗାଁରେ ପହଞ୍ଚି ଶବ ଜବତ କରିବା ପରେ ପାଲଲହଡ଼ା ଡାକ୍ତରଖାନାରେ ବ୍ୟବଚ୍ଛେଦ କରାଇଥିଲା । ୬ ଜଣଙ୍କୁ ସନେ୍ଦହରେ ଅଟକ ରଖି ପଚରାଉଚୁରା କରୁଛି । ତେବେ ୪ ଦିନ ପରେ ମଧ୍ୟ ଦୁର୍ବୃତ୍ତଙ୍କୁ ଗିରଫ କରିବାରେ ପୁଲିସ ସକ୍ଷମ ହୋଇନାହିଁ । ଏହି ବୀଭତ୍ସ ଗଣଦୁଷ୍କର୍ମ ଏବଂ ହତ୍ୟାକାଣ୍ଡ ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ଖେଳାଇ ଦେଇଛି ।
ଏହି ଅମାନୁଷିକ ଓ ବର୍ବର କାଣ୍ଡ ଦିଲ୍ଲୀର ନିର୍ଭୟା କାଣ୍ଡଠାରୁ କମ୍ ଭୟଙ୍କର ନ ଥିଲେ ମଧ୍ୟ ଦୁର୍ଭାଗ୍ୟର କଥା ଯେ ଆମର ଗଣମାଧ୍ୟମ ଏହି ଖବରକୁ ଗୁରୁତ୍ୱ ଦେଇନାହାନ୍ତି । କେବଳ ‘ସମାଜ’କୁ ଛାଡ଼ିଦେଲେ ବୋଧହୁଏ ଅନ୍ୟ ପ୍ରମୁଖ ଖବରକାଗଜ ଏବଂ ଟିଭିରେ ଏହି ଖବର ନାହିଁ । ରାଜଧାନୀରେ କିଟ୍ ଏବଂ ଅଚ୍ୟୁତ ସାମନ୍ତଙ୍କ ପାଖରେ ଅଟକି ଯାଇଛନ୍ତି । ଏକ ନମ୍ବର ଟିଭି ବାଲାଙ୍କୁ ୨୦୦ କିଲୋମିଟର ଦୂରରେ ଘଟିଥିବା ଅତି ସମ୍ବେଦନଶୀଳ, ଅମାନବୀୟ ଓ ବର୍ବରକାଣ୍ଡ ତୁଚ୍ଛ ମନେ ହୋଇଛି ।
ଖାଲି ଟିଭି କି ଖବରକାଗଜ ନୁହେଁ । ମୁଖ୍ୟ ବିରୋଧୀ ଦଳ ବିଜେଡି ମଧ୍ୟ ଏହି ଘଟଣାକୁ ନଜର ଅନ୍ଦାଜ କରିଦେଇଛି । ସେମାନଙ୍କର ସୋସିଆଲ୍ ମିଡିଆରେ ସିମୁଳିଆ ଥାନା ଭିତରେ ବିଜେପି ନେତାଙ୍କ ଦାଦାଗିରିର ଦୁଇବର୍ଷ ତଳର ପୁରୁଣା ଫଟୋକୁ ଭାଇରାଲ୍ କରାଯାଉଥିବା ବେଳେ ପାଲଲହଡ଼ା ବର୍ବର କାଣ୍ଡ ଗୁରୁତ୍ୱହୀନ ହୋଇଯାଇଛି । ଏହା ହିଁ ଆମ ରାଜ୍ୟବାସୀଙ୍କର ଦୁର୍ଭାଗ୍ୟ ।
