ଗିରିବାଳା ବେହେରା କଂଗ୍ରେସର କଟକ ମେୟର ପ୍ରାର୍ଥୀ

ଭୁବନେଶ୍ୱର/କଟକ: କଟକ କଂଗ୍ରେସ ସଂଗଠନର ଟାଣୁଆ ନେତ୍ରୀ ଗିରିବାଳା ବେହେରାଙ୍କୁ ମେୟର ପ୍ରାର୍ଥୀ କରିଛି ଦଳ । ନରସିଂହ ମିଶ୍ରଙ୍କ ଅଧ୍ୟକ୍ଷତାରେ ଆଜି ଅନୁଷ୍ଠିତ କଂଗ୍ରେସ ପ୍ରାର୍ଥୀ ଚୟନ କମିଟିର ପ୍ରଥମ ବୈଠକରେ ଏହି ନିଷ୍ପତ୍ତି ନିଆଯାଇଛି । ଦିନେ ଦୁଇ ଦିନ ମଧ୍ୟରେ ଭୁବନେଶ୍ୱର ଏବଂ ବ୍ରହ୍ମପୁର ମହାନଗର ନିଗମର ମେୟର ପ୍ରାର୍ଥୀ ଚୂଡ଼ାନ୍ତ ହୋଇଯିବ ବୋଲି ଜଣାପଡ଼ିଛି ।

କଟକ ମହାନଗର ନିଗମରେ ଦୁଇ ଦୁଇ ଥର କର୍ପୋରେଟର ଥିବା ଗିରିବାଳା କଂଗ୍ରେସର ଜଣେ ଟାଣୁଆ ନେତ୍ରୀ ଓ ଦକ୍ଷ ସଂଗଠକ ଭାବେ ପତିଆରା ରଖିଛନ୍ତି । ୨୦୧୯ ସାଧାରଣ ନିର୍ବାଚନରେ ମହମ୍ମଦ ମୋକିମ୍ ଙ୍କ ବିଜୟ ପଛରେ ତାଙ୍କର ବଡ଼ ଭୂମିକା ଥିଲା । ଏବେ ଦଳର କଟକ ନଗର ଶାଖାର ନେତୃତ୍ୱ ନେଉଥିବା ବେଳେ ଓଡ଼ିଶା ପ୍ରଦେଶ ମହିଳା କଂଗ୍ରେସର ଉପସଭାନେତ୍ରୀ ଦାୟିତ୍ୱରେ ଅଛନ୍ତି ।

ଏଥିସହ ମେୟର ପ୍ରାର୍ଥୀ ଚୟନରେ କଂଗ୍ରେସ ସମସ୍ତଙ୍କଠାରୁ ଆଗରେ ଅଛି । ଆଜି ଚୟନ କମିଟି ବୈଠକରେ ଗିରିବାଳାଙ୍କ ମେୟର ପ୍ରାର୍ଥୀତ୍ୱ ସମେତ କଟକ ମହାନଗର ନିଗମର ସମସ୍ତ କର୍ପୋରେଟର ପ୍ରାର୍ଥୀତ୍ୱ ମଧ୍ୟ ଚୂଡ଼ାନ୍ତ ହୋଇଛି । ଅନ୍ୟପକ୍ଷରେ ବିଜେଡ଼ି ଏବଂ ବିଜେପି ପକ୍ଷରୁ ମେୟର ପ୍ରାର୍ଥୀତ୍ୱ ନେଇ ସ୍ପଷ୍ଟ ସୂଚନା ମିଳିପାରୁନାହିଁ ।

ପୌର/ମହାନଗର ନିର୍ବାଚନ ପାଇଁ ଆଜି ପ୍ରାର୍ଥୀପତ୍ର ଦାଖଲ ଆରମ୍ଭ ହୋଇଛି । ୭ ତାରିଖ ରହିଛି ପ୍ରାର୍ଥୀପତ୍ର ଦାଖଲର ଶେଷ ଦିନ । ୪୭ଟି ମ୍ୟୁନିସିପାଲିଟି ଏବଂ ୫୯ ଏନଏସିରେ ୨୭ ଲକ୍ଷରୁ ଅଧିକ ଭୋଟର ୩,୦୩୦ ବୁଥ୍ ରେ ମତଦାନ ସାବ୍ୟସ୍ତ କରିବେ । ସେହିଭଳି ଭୁବନେଶ୍ୱର, କଟକ ଏବଂ ବ୍ରହ୍ମପୁର ମହାନଗର ନିଗମରେ ୧୪.୨୬ ଲକ୍ଷ ଭୋଟର ୧୪୦୭ ବୁଥ୍ ରେ ମତଦାନ ସାବ୍ୟସ୍ତ କରିବେ ।