ନିଜ ଲୋକପ୍ରିୟତା ମାପିଲେ ଅପରାଜିତା !

ଭୁବନେଶ୍ୱର: ଜଟଣୀ ଅନ୍ତର୍ଗତ ଛଣଘର ଗ୍ରାମ ପଞ୍ଚାୟତରେ ନିର୍ଦ୍ଦିଷ୍ଟ ସମିତି ସଭ୍ୟ ପ୍ରାର୍ଥୀଙ୍କ ପାଇଁ ଧୂମ୍ ପ୍ରଚାର କରିଥିଲେ ସ୍ଥାନୀୟ ସାଂସଦ ଅପରାଜିତା ଷଡ଼ଙ୍ଗୀ । ଘରକୁ ଘର ବୁଲି ଭୋଟ ଭିକ୍ଷା କରିଥିଲେ । ମାତ୍ର ଫଳ କ’ଣ ହେଲା ଜାଣନ୍ତି? ସେହି ପ୍ରାର୍ଥୀଙ୍କ ସପକ୍ଷରେ ପଡ଼ିଛି ୧୪ ଟି ଭୋଟ । ବୋଧହୁଏ ଏତିକି ଭୋଟ ତାଙ୍କ ପରିବାରରୁ ହିଁ କେବଳ ଆସିଛି । ଅନ୍ୟ କେହି ତାଙ୍କୁ ଭୋଟ ଦେଇନାହାନ୍ତି ।

ସେପଟେ, ବେଗୁନିଆ-ବୋଲଗଡ଼ ନିର୍ବାଚନମଣ୍ଡଳୀରେ ଗତଥର ବିଜେପି ଦଖଲରେ ଥିଲା ୩ ଟି ଜିଲ୍ଲା ପରିଷଦ ଜୋନ୍ । ଯତୀନ ମହାନ୍ତିଙ୍କ ନେତୃତ୍ୱରେ ଦଳ ଲଢ଼ି ଏହି ସଫଳତା ପାଇଥିଲା । ମାତ୍ର ଏଥର ଲଢ଼େଇର ନେତୃତ୍ୱ ନେଇଥିଲେ ଅପରାଜିତା ଷଡ଼ଙ୍ଗୀ । ଘନ ଘନ ପ୍ରଚାରରେ ଆସିଥିଲେ । ହେଲେ ଫଳ ହୋଇଛି ଶୂନ୍ । ନୂଆ ଆସନ ଯୋଡି ହେବା ଦୂରେ ଥାଉ, ସେହି ତିନିଟି ଯାକ ଆସନ ବି ହାତରୁ ଖସିଯାଇଛି ।

ଖାଲି ବେଗୁନିଆ- ବୋଲଗଡ଼ ନୁହେଁ, ଭୁବନେଶ୍ୱର ସଂସଦୀୟ କ୍ଷେତ୍ରରେ ଥିବା ୨୬ ଜୋନ୍ ରୁ ଗୋଟିଏ ବି ଆସନ ବିଜେପି ଜିତିପାରିନାହିଁ । ଖୋର୍ଦ୍ଧା ଜିଲ୍ଲାରେ ୩୦ ଜିଲ୍ଲା ପରିଷଦ ଆସନ ମଧ୍ୟରୁ ଗତଥର ବିଜେପି ୧୦ ଟି ଆସନ ଦଖଲ କରିଥିଲା । ମାତ୍ର ଏଥର ମିଳିଛି ଦୁଇଟି ଆସନ । ତାହା ପୁଣି ପୁରୀ ସଂସଦୀୟ କ୍ଷେତ୍ର ଅନ୍ତର୍ଗତ ବାଣପୁରର ଦୁଇଟି ଜୋନ୍ ରେ ।

ପ୍ରଚାର ଓ ପ୍ରସାରରେ ନିଜ ସଂସଦୀୟ କ୍ଷେତ୍ରରେ କେବଳ ଆବଦ୍ଧ ନ ଥିଲେ ସାଂସଦ ଅପରାଜିତା । ସାରା ରାଜ୍ୟ ବୁଲି ନିଜର ଉପସ୍ଥିତି ଜାହିର କରିଥିଲେ । ବିଭିନ୍ନ ଜିଲ୍ଲାରେ ଦଳୀୟ ପ୍ରାର୍ଥୀଙ୍କ ପାଇଁ ନିର୍ବାଚନ ପ୍ରଚାର, ରାଲି କରିଥିଲେ । ମାତ୍ର ନିଜ ପ୍ରାର୍ଥୀଙ୍କୁ ସେ ଗୋଟିଏ ଜାଗାରେ ବି ଜିତାଇ ପାରିନାହାନ୍ତି । ତାଙ୍କ ମୁହଁ ଦେଖି କିମ୍ବା ତାଙ୍କ ବ୍ୟକ୍ତିତ୍ୱରେ ଆକର୍ଷିତ ହୋଇ ଲୋକେ ବିଜେପିକୁ ଭୋଟ ଦେଇନାହାନ୍ତି । ରାଜ୍ୟ ବିଜେପିରେ ଅପରାଜିତା, ନବୀନ ପଟ୍ଟନାୟକଙ୍କ ଉପଯୁକ୍ତ ବିକଳ୍ପ ବୋଲି ତାଙ୍କର ସମର୍ଥକମାନଙ୍କ ପ୍ରଚାର ଯେ ଡାମ୍ଫା ଏବଂ ସେଥିରେ ବାସ୍ତବତା ନାହିଁ ଏହା ଗ୍ରାମାଞ୍ଚଳ ଭୋଟର ପ୍ରମାଣିତ କରିଥିବା ରାଜନୈତିକ ସମୀକ୍ଷକମାନେ ମତ ଦେଇଛନ୍ତି ।

ଆହୁରି ରୋଚକ ଚର୍ଚ୍ଚା ଶୁଣିବାକୁ ମିଳିଛି ତାଙ୍କ ଲୋକସଭା ସଂସଦୀୟ କ୍ଷେତ୍ରରୁ । ଗତ ସାଧାରଣ ନିର୍ବାଚନ ବେଳେ ଅପରାଜିତାଙ୍କ ପ୍ରତି ଭୋଟରଙ୍କର ଯେଉଁ ସମର୍ଥନ ଥିଲା ତାହା ଆଉ ନାହିଁ ବୋଲି ଜଟଣୀ, ବେଗୁନିଆ, ବୋଲଗଡ଼ ସବୁଠି ଚର୍ଚ୍ଚା । ଆଇଏଏସ୍ ଚାକିରିରୁ ଆସିଥିବା ମ୍ୟାଡାମ୍ ଙ୍କ ଉପରେ ଲୋକଙ୍କ ବହୁତ ଭରସା ଥିଲା । ମାତ୍ର ନିର୍ବାଚନ ବେଳେ ଦେଇଥିବା ପ୍ରତିଶ୍ରୁତି କିଛି ବି ପୂରଣ କରିନାହାନ୍ତି । ବିନମ୍ରତାର ଭାଷଣ ମାରୁଥିଲେ ମଧ୍ୟ କର୍ମୀ ଓ ସାଧାରଣ ଭୋଟରଙ୍କ ପ୍ରତି ତାଙ୍କ ମନରେ ପ୍ରବଳ ଅସୂୟା ଭାବ ଦେଖିବାକୁ ମିଳୁଛି । ସାଧାରଣ ନେତାଙ୍କଠାରୁ ସେ ଯେ ଭିନ୍ନ ନୁହଁନ୍ତି ଏଇ ତିନିବର୍ଷରେ ଅଞ୍ଚଳବାସୀ ବୁଝିଯାଇଥିବା ବିଭିନ୍ନ ମହଲରେ ଆଲୋଚନା ହେଉଛି ।

ଅନ୍ୟପକ୍ଷରେ, ଦଳୀୟ ଭିତ୍ତିରେ ଅପରାଜିତାଙ୍କର କୌଣସି କାର୍ଯ୍ୟକ୍ରମ ନ ଥିବାରୁ ସେ ବିଜେପି ପାଇଁ ଆସେଟ୍ ନୁହଁନ୍ତି ବୋଲି ବିଚାର କରାଯାଉଛି । ନିଜର ବ୍ୟକ୍ତିଗତ ଏଜେଣ୍ଡାକୁ ପ୍ରାଥମିକତା ଦେଇ ଦଳରେ ସମାନ୍ତରାଳ ସଂଗଠନ ଛିଡ଼ା କରାଉଥିବାରୁ ଅଧିକାଂଶ ନେତା ତାଙ୍କ ଉପରେ କ୍ଷୁବ୍ଧ ଅଛନ୍ତି ।

ସର୍ବୋପରି ରାଜ୍ୟ ବିଜେପି ରାଜନୀତିରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଓ ସାଂସଦ ଅପରାଜିତା ଷଡ଼ଙ୍ଗୀଙ୍କ ମଧ୍ୟରେ ସମ୍ପର୍କ ଭଲ ନ ଥିବା ସମସ୍ତେ ଜାଣନ୍ତି । ଦୁଇ ଗୋଷ୍ଠୀ କେହି କାହାରି ଛିଦ୍ର ଦେଖିପାରୁନାହାନ୍ତି । ରାଜନୈତିକ ସମୀକ୍ଷକଙ୍କ ମତରେ, ଉତ୍ତର ପ୍ରଦେଶ ନିର୍ବାଚନ ଦାୟିତ୍ୱ ପାଇଥିବା ଧର୍ମେନ୍ଦ୍ର ଏଥର ଓଡ଼ିଶା ପଞ୍ଚାୟତ ନିର୍ବାଚନରୁ ଦୂରେଇ ରହିଥିବା ବେଳେ ଅପରାଜିତାଙ୍କ ପାଇଁ ବଡ଼ ସୁଯୋଗ ସୃଷ୍ଟି କରିଥିଲା । ମାତ୍ର ସେହି ସୁଯୋଗରୁ ଅପରାଜିତା ଫାଇଦା ଉଠାଇବାରେ ସଫଳ ହୋଇନାହାନ୍ତି । ଏଠି ନେତୃତ୍ୱର ଅଭାବ ବୋଲି ସେ ଗଣମାଧ୍ୟମରେ ସ୍ୱୀକାର କରି ପରୋକ୍ଷରେ ନିଜ ନେତୃତ୍ୱ ଉପରୁ ଆସ୍ଥା ହରାଇଛନ୍ତି ।

ତେବେ ସେ ଯାହା ହେଉ, ଅପରାଜିତାଙ୍କ ପାଇଁ ଦ୍ୱିତୀୟ ଅଗ୍ନିପରୀକ୍ଷା ଭାବେ ଛିଡ଼ା ହୋଇଛି ପୌର ନିର୍ବାଚନ । ଖାସ୍ କରି ଭୁବନେଶ୍ୱର ମହାନଗର ନିଗମ ନିର୍ବାଚନ ତାଙ୍କ ନେତୃତ୍ୱରେ ବିଜେପି ଲଢ଼ିବାକୁ ଯାଉଥିବାରୁ ଅପରାଜିତା ନେତୃତ୍ୱ ପ୍ରତିପାଦନର ପୂର୍ଣ୍ଣ ସୁଯୋଗ ପାଇଛନ୍ତି । ଏହା ତାଙ୍କ ପାଇଁ କରବ । ମର ପରିସ୍ଥିତି ଆଣିଛି ।