ଭୁବନେଶ୍ୱର: ମଦନ ମୋହନ ଦାଶ । ବୟସ ୮୦ ବର୍ଷ । ଜୀବନ ତମାମ ନିଜର କଷ୍ଟଲବ୍ଧ ଅର୍ଥରେ ଭୁବନେଶ୍ୱରର ସୁନ୍ଦରପଦାରେ ଜାଗାଟିଏ କିଣିଛନ୍ତି । ନିଜ ଜୀବଦଶାରେ ଘର ଖଣ୍ଡେ ତୋଳିବା ପାଇଁ ସ୍ୱପ୍ନ ରଖିଛନ୍ତି । ସେହି ସ୍ୱପ୍ନ ସାକାର କରିବାକୁ ବାହାରିଲା ବେଳେ ତାଙ୍କ ଉପରେ ପଡ଼ିଛି ଚଡ଼କ । କୌଣସି ପ୍ରାକୃତିକ ଦୁର୍ବିପାକ ନୁହେଁ, ସରକାରୀ ଦୁର୍ବିପାକର ସେ ଶିକାର ହୋଇଛନ୍ତି । ଯାହା ତାଙ୍କର ସ୍ୱପ୍ନକୁ ଧୂଳିସାତ କରିବାକୁ ବସିଛି । ନ୍ୟାୟ ପାଇଁ ବାରଦ୍ୱାର ବୁଲି ଶେଷରେ ମୁଖ୍ୟମନ୍ତ୍ରୀଙ୍କ ଅଫିସ ଯାଇଥିଲେ ମଧ୍ୟ ନିରାଶ ହୋଇଛନ୍ତି । ଆର୍ଥିକ ଏବଂ ମାନସିକ ଯନ୍ତ୍ରଣାରେ ଜୀବନ କାଟୁଛନ୍ତି ବୃଦ୍ଧ ମଦନ ମୋହନ ଏବଂ ତାଙ୍କ ପରିବାର ।
ସୁନ୍ଦରପଦା ପେଟ୍ରୋଲ୍ ଟାଙ୍କି ପାଖରେ ମଦନ ମୋହନ ଦାଶଙ୍କର ପ୍ଲଟ୍(ନଂ ୩୮୧, ଖାତା ନଂ ୩୪୫/୩୫୫୫) । ଘର ତିଆରି ପାଇଁ ପ୍ରସ୍ତୁତି ସାରିଥିଲେ । ବିଏମସି/ବିଡିଏ ଏବଂ ବିମାନ ବନ୍ଦର କର୍ତ୍ତୃପକ୍ଷଙ୍କଠାରୁ ଆବଶ୍ୟକୀୟ ଅନୁମୋଦନ ପାଇସାରିଛନ୍ତି । ଖାଲୁଆ ଜାଗା ହୋଇଥିବାରୁ ତାହାକୁ ପୋତିବା ପାଇଁ ୫ ଲକ୍ଷ ଟଙ୍କାର ବାଲି କିଣି ରଖିଥିଲେ । ୧୫ ଲକ୍ଷ ଟଙ୍କାର ନିର୍ମାଣ ସାମଗ୍ରୀ ମଧ୍ୟ ମହଜୁଦ ରଖିଥିଲେ ।
ଗତ ଜୁନ୍ ୧୪ ତାରିଖ ସକାଳୁ ସକାଳୁ ଅଚାନକ ସେହି ପ୍ଲଟ୍ ସମ୍ମୁଖରେ ଆରମ୍ଭ ହୋଇଗଲା ରାସ୍ତା ମରାମତି କାର୍ଯ୍ୟ । ପୂର୍ତ୍ତ ବିଭାଗ ଅଧୀନସ୍ଥ ଭୁବନେଶ୍ୱର ଆର ଆଣ୍ଡ ବି ଡିଭିଜନ୍-୨ ଏବଂ ବିଏମସି ମିଳିତ ଭାବେ ଆରମ୍ଭ କରିଥିଲେ ରୋଡ୍ କଟିଂ କାର୍ଯ୍ୟ । ସେଠାରେ ରାସ୍ତା ଭାଙ୍ଗି ଏକ ନାଳ ଖୋଳାଗଲା ଏବଂ ବସ୍ତିର ଆବର୍ଜନା ପାଣିକୁ ସେଇ ନାଳ ବାଟେ ଶ୍ରୀ ଦାସଙ୍କ ପ୍ଲଟ ଉପରକୁ ଛଡ଼ାଗଲା । ଏଥିଯୋଗୁଁ ସ୍ୱେରେଜ୍ ଏବଂ ଡ୍ରେନେଜ୍ ପାଣିର ସୁଅ ଛୁଟିଲା । ପ୍ରତିବାଦ ସତ୍ତ୍ୱେ ଏବେ ବି ମରାମତି କାର୍ଯ୍ୟ ଜାରି ରହିଛି ଏବଂ ମଇଳା ପାଣିରେ ଭାସୁଛି ସଂପୃକ୍ତ ପ୍ଲଟ୍ । ବିନା ନୋଟିସ୍ ଏବଂ ଶ୍ରୀ ଦାସଙ୍କ ବିନା ସ୍ୱୀକୃତିରେ ଆର ଆଣ୍ଡ ବି ଡିଭିଜନ୍-୨ ଅଧୀକ୍ଷଣ ଯନ୍ତ୍ରୀ ଏବଂ ବିଏମସି କର୍ତ୍ତୃପକ୍ଷ ସେଇ ଘରୋଇ ପ୍ଲଟ୍ କୁ କ୍ଷତି କରି କାମ ଚଲେଇଛନ୍ତି ।
ଆର ଆଣ୍ଡ ବି ଡିଭିଜନ୍-୨ ଏବଂ ବିଏମସିର ଏହି ଔଦ୍ଧତ୍ୟ ପଣିଆ ଯୋଗୁଁ ଶ୍ରୀ ଦାସଙ୍କର ୨୦ ଲକ୍ଷ ଟଙ୍କାରୁ ଅଧିକ ମୂଲ୍ୟର ନିର୍ମାଣ ସାମଗ୍ରୀ ଧୂଳିସାତ୍ ହୋଇଯାଇଛି । ମଇଳା, ଆବର୍ଜନା ପାଣିରେ ପ୍ଲଟ ବୁଡ଼ି ରହି ପୁତ୍ତି ଗନ୍ଧମୟ ପରିବେଶ ସୃଷ୍ଟି ହୋଇଛି । ସେହି ଜାଗାର ଭୂଗୋଳ ବଦଳିଯାଇ ବିପଦ ଶଙ୍କୁଳ ଅବସ୍ଥାକୁ ଚାଲିଆସିଛି ଭୂତଳ ଜଳର ଗୁଣବତ୍ତା ।
