ଓଡ଼ିଶାରେ ୫-ଜି ଟେଲିକମ୍ ସେବା ଆରମ୍ଭ

ଭୁବନେଶ୍ୱର: ଓଡ଼ିଶାରେ ୫-ଜି ଟେଲିକମ୍ ସେବା ଆରମ୍ଭ ହୋଇଛି । ଭୁବନେଶ୍ୱରରେ ଆୟୋଜିତ ସ୍ୱତନ୍ତ୍ର କାର୍ଯ୍ୟକ୍ରମରେ କେନ୍ଦ୍ର ରେଳ ଏବଂ ଦୂରସଞ୍ଚାର ମନ୍ତ୍ରୀ ଅଶ୍ୱିନୀ ବୈଷ୍ଣବ ଏବଂ ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏହାର ଶୁଭାରମ୍ଭ କରିଛନ୍ତି । ପ୍ରାରମ୍ଭିକ ପର୍ଯ୍ୟାୟରେ ଏୟାରଟେଲ୍ ଓ ଜିଓ ପକ୍ଷରୁ ଭୁବନେଶ୍ୱର ଏବଂ କଟକରେ ଏହି ସେବା ଆରମ୍ଭ ହୋଇଛି । ଦୁଇବର୍ଷ ଭିତରେ ରାଜ୍ୟର କୋଣ ଅନୁକୋଣରେ ୫-ଜି ସେବା ପହଞ୍ଚାଇବାକୁ ଲକ୍ଷ୍ୟ ରଖାଯାଇଛି । ଆସନ୍ତାବର୍ଷ ବିଏସଏନଏଲର ୫ଜି ସେବା ଆରମ୍ଭ ହେବ ।

୫-ଜି ଶୁଭାରମ୍ଭ ଅବସରରେ କେନ୍ଦ୍ରମନ୍ତ୍ରୀ ଶ୍ରୀ ବୈଷ୍ଣବ କହିଛନ୍ତି, ପ୍ରାଥମିକ ପର୍ଯ୍ୟାୟରେ ଟୁଇନ୍ ସିଟି ଭୁବନେଶ୍ୱର ଓ କଟକରେ ସେବା ଆରମ୍ଭ ହୋଇଛି । ୨୦୨୪ ଡିସେମ୍ବର ୩୧ ସୁଦ୍ଧା ସାରା ରାଜ୍ୟରେ ମିଳିବ । ପ୍ରତି ଗାଁ ଓ ସ୍କୁଲକୁ ହାଇସ୍ପିଟ୍ କେବୁଲ୍ ସଂଯୋଗ ହେବ । ୨୦୨୪ ଅଗଷ୍ଟ ୧୫ ସୁଦ୍ଧା ରାଜ୍ୟର ସବୁ ଜାଗାରେ ଟାୱାର ଲାଗିବ । ଆଗାମୀ ଦୁଇବର୍ଷ ଭିତରେ ଓଡ଼ିଶାର ସବୁ ଜାଗାରେ ୫-ଜି ସେବା ଉପଲବ୍ଧ ହୋଇଯିବ ବୋଲି ସେ କହିଥିଲେ । ଚଳିତବର୍ଷ ଡିସେମ୍ବର ସୁଦ୍ଧା ରାଜ୍ୟର ୮ଟି ଜାଗାରେ ଟେକ୍ନୋଲୋଜି ପାର୍କ କାର୍ଯ୍ୟକ୍ଷମ ହେବ ବୋଲି ମଧ୍ୟ ସୂଚନା ଦେଇଥିଲେ ।

୫ଜି ଟେଲିକମ୍ ସେବା ରାଜ୍ୟ ପାଇଁ ଗେମଚେଞ୍ଜର ହେବ ଏବଂ ଓଡ଼ିଶାର ଦୂରସଂଚାର ବ୍ୟବସ୍ଥାରେ ଏକ ଯୁଗାନ୍ତକାରୀ ପରିବର୍ତ୍ତନ ଆସିପାରିବ ବୋଲି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ କହିଛନ୍ତି । ସେ କହିଛନ୍ତି ପୂର୍ବରୁ ରାଜ୍ୟରେ ମୋବାଇଲ କନେକ୍ଟିଭିଟିର ସମସ୍ୟା ଥିଲା । ଏବେ ମୋଦି ସରକାରଙ୍କ ଅମଳରେ ସବୁ ପଞ୍ଚାୟତରେ ୫,୦୦୦ ରୁ ଉର୍ଦ୍ଧ୍ୱ କୋଟି ଟଙ୍କା ପୁଞ୍ଜିନିବେଶ କରାଯାଇ ଟେଲିକମ ଭିତ୍ତିଭୂମିକୁ ସୁଦୃଢ଼ କରାଯାଉଛି । ରାଜ୍ୟରେ ୫,୦୦୦ ଟାଓ୍ୱାର ମୋବାଇଲ ସେବା ସଂଯୋଗ କରାଯିବା ନେଇ ଯୋଜନା ହୋଇଛି । ଭାରତ ନେଟ୍ ଦ୍ୱାରା ପ୍ରାୟ ଅଧିକାଂଶ ଗ୍ରାମକୁ  ଉଚ୍ଚ କ୍ଷମତା ବିଶିଷ୍ଟ ଅପ୍ଟିକାଲ ଫାଇଭର ସଂଯୋଗ କରାଯାଉଛି । ଆଜିର ପଦକ୍ଷେପ ଦ୍ୱାରା ରାଜ୍ୟରେ ଅନେକ ସମ୍ଭାବନା ତିଆରି ହୋଇଛି । ଏକବିଂଶ ଶତାବ୍ଦୀର ଓଡ଼ିଶାର ବୈଷୟିକ ପ୍ରଗତି ଦିଗରେ ଆଜିର ଦିନ ଓଡ଼ିଶାବାସୀଙ୍କ ପାଇଁ ସ୍ମରଣୀୟ ହୋଇ ରହିବ ।

କେନ୍ଦ୍ରମନ୍ତ୍ରୀ କହିଛନ୍ତି ଯେ ସମାଜର ନିମ୍ନ ଶ୍ରେଣୀରେ ଥିବା ଲୋକଙ୍କ ମଧ୍ୟରେ ଯୋଗାଯୋଗ ସ୍ଥାପନକୁ ସୁଦୃଢ଼ ଓ ଡିଜିଟାଲ ଦୂରତ୍ୱକୁ ହ୍ରାସ କରିବାରେ ପ୍ରଧାନମନ୍ତ୍ରୀ ପ୍ରତିଶ୍ରୁତିବଦ୍ଧ । ପୂର୍ବରୁ ଲୋକଙ୍କୁ କଲ୍ ଡ୍ରପର ସମ୍ମୁଖୀନ ହେବାକୁ ପଡୁଥିଲା । ଏବେ ମୋଦି ସରକାରରେ ସେକ୍ଟ୍ରମ ବିକ୍ରି ହୋଇ ପ୍ରବଳ ରାଜସ୍ୱ ଆସୁଛି । ବିଏସଏନଏଲ ପାଇଁ ୧ ଲକ୍ଷ ୬୪ ହଜାର କୋଟି ଟଙ୍କା ଖର୍ଚ୍ଚ କରାଯାଇ ଭିତ୍ତିଭୂମିକୁ ସଜଡା ଯାଇଛି । ଏବେ ରାଜ୍ୟରେ ୫ଜି ସେବା ଦ୍ୱାରା ଟେଲିକମ୍ ଏବଂ ଇଣ୍ଟରନେଟ୍ ଗ୍ରାହକମାନେ ଅତି ଉନ୍ନତମାନର ସେବା ପାଇବେ । ଆମର ଅର୍ଥନୀତି ସୁଦୃଢ଼ ହେବ । ଡାକ୍ତର ମାନେ ଭୁବନେଶ୍ୱରରେ ରହି ମଧ୍ୟ ମାଲକାନଗିରି, ମୟୂରଭଞ୍ଜ ଭଳି ଦୁର୍ଗମ ଅଞ୍ଚଳରେ ଚିକିତ୍ସା ସେବା କରିପାରିବେ । ୫ଜି ଦ୍ୱାରା ଓଡ଼ିଶା ଭଳି ରାଜ୍ୟ ଶିକ୍ଷା ଓ ସ୍ୱାସ୍ଥ୍ୟସେବାର ବଡ ଲାଭ ପାଇବ ବୋଲି ଧର୍ମେନ୍ଦ୍ର କହିଛନ୍ତି  ।