ଭୁବନେଶ୍ୱର: ବରିଷ୍ଠ ଆଇଏଏସ୍ ବିଷ୍ଣୁପଦ ସେଠୀଙ୍କ ସରକାରୀ ବାସଭବନରେ ଆଜି ସକାଳୁ ସକାଳୁ ସିବିଆଇ ରେଡ୍ ଜାରି ରହିଛି । ବିନା ମହିଳା ଅଧିକାରୀଙ୍କ ଉପସ୍ଥିତିରେ ସିବିଆଇ ତାଙ୍କ ଘରେ ପଶିବାକୁ ବିରୋଧ କରିବାରୁ ବିଷ୍ଣୁ ସେଠୀଙ୍କ ସହ ସିବିଆଇ ଟିମ୍ ର ଉଚ୍ଚବାଚ ଏବଂ ଯୁକ୍ତିତର୍କ ହୋଇଥିଲା । ପତ୍ନୀଙ୍କ ଉପସ୍ଥିତିରେ ଏବଂ ଗଣମାଧ୍ୟମ କ୍ୟାମେରା ସାମନାରେ ସିବିଆଇର ଦୁଇଜଣ ଅଧିକାରୀ ତାଙ୍କୁ ହଲାପଟା କରିବାକୁ ବି ପଛାଇ ନ ଥିଲେ । ଏହି ମାମଲାକୁ ନେଇ ବିଷ୍ଣୁ ସେଠୀ ଆଜି ଗଣମାଧ୍ୟମ ସାମନାରେ ପ୍ରଥମ ଥର ପାଇଁ ମୁହଁ ଖୋଲିଥିଲେ । କୋହଭରା କଣ୍ଠରେ ତାଙ୍କ ମନର ଯନ୍ତ୍ରଣା କହିଥିଲେ । ସେତିକିବେଳେ ଆଖି ତାଙ୍କର ଛଳ ଛଳ ହୋଇଯାଇଥିଲା ।
ବିଷ୍ଣୁ ସେଠୀ କହିଥିଲେ-
ମୁଁ ନିର୍ଦୋଷ । ନିଃସହାୟ । ମୋର କୌଣସି ରାଜନୈତିକ ଲିଙ୍କ୍ ନାହିଁ । ମୁଁ ଭାବୁଛି କିଛି ଷଡ଼ଯନ୍ତ୍ର ଥିବ । ମୁଁ ଚଞ୍ଚଲ ମୁଖାର୍ଜୀଙ୍କୁ ୪ ବର୍ଷ ପରେ ଦେଖୁଛି । କିଛି ବି ପଇସା କାରବାର କରିନି । ଏହି ମାମଲାରେ ସିବିଆଇ ତଦନ୍ତକୁ ମୁଁ ସହଯୋଗ କରି ଆସୁଛି । ମୁଁ ସିବିଆଇ ସମନକୁ ଏଡ଼ାଇ ଦେଇଛି ବୋଲି ଗଣମାଧ୍ୟମରେ ପ୍ରଚାର ହେଲା । ମାତ୍ର ତାହା ସତ୍ୟ ନୁହେଁ । ଜାନୁଆରୀ ୧୧ ତାରିଖରେ ହାଜର ହେବା ପାଇଁ ମୋତେ ନୋଟିସ୍ ହୋଇଥିଲା । ମୁଁ ତା’ ପୂର୍ବରୁ ୧୦ ତାରିଖରେ ସିବିଆଇ ଅଫିସରେ ହାଜର ହୋଇଥିଲି । ଦ୍ୱିତୀୟ ଥର ବି ହାଜର ହୋଇଥିଲି । ତଦନ୍ତ ବେଳେ ମୁଁ ସମସ୍ତ କାଗଜପତ୍ର ଦେଖାଇ ସହଯୋଗ କରିଛି ।
ମାତ୍ର ଏସବୁ ପରେ ବି ଆଜି ସକାଳୁ ସକାଳୁ ସେମାନେ ବିନା ଲେଡି ପୁଲିସ ଅଫିସର ଓ ସ୍ଥାନୀୟ ପୁଲିସର ବିନା ସହାୟତାରେ ମୋ ଘରେ ଜବରଦସ୍ତ ପହଞ୍ଚିଛନ୍ତି । ମୋ ଗାଁକୁ ବି ଯାଇଛନ୍ତି । ମୁଁ ଜଣେ ବରିଷ୍ଠ ଅଧିକାରୀ ହୋଇଥିଲେ ମଧ୍ୟ ସିବିଆଇ ଅଧିକାରୀମାନେ ମୋତେ କଦର୍ଯ୍ୟ ବ୍ୟବହାର କରିଛନ୍ତି । କାହିଁକି ନା ମୁଁ ଜଣେ ଦଳିତ ବର୍ଗର । ମୋର କୌଣସି ପଲିଟିକାଲ୍ ସପୋର୍ଟ ନାହିଁ । ତେଣୁ ସେମାନେ ମୋତେ ଶସ୍ତା ଭାବିଛନ୍ତି । ସିବିଆଇର ଦୁଇଜଣ ଅଧିକାରୀଙ୍କ ଆଚାର ବ୍ୟବହାର ଏତେ ଅଭଦ୍ର ଏବଂ ରୁକ୍ଷ ଯେ ସେମାନେ କିଛି ବି କରିପାରିବେ । ମୋ ନାଁରେ ମିଛ ଲେଖିପାରିବେ । ସେମାନେ ଭାବୁଛନ୍ତି ମୁଁ ଗୋଟେ ବଡ଼ ସୈତାନ୍ ।
ଚଞ୍ଚଲ ମୁଖାର୍ଜୀ ନାଲକୋର ଦୁଇଜଣ ଠିକାଦାରଙ୍କଠାରୁ ପଇସା ନେଉଥିଲେ । ମୋର ସେଥିରେ କୌଣସି ସମ୍ପର୍କ ନାହିଁ । ବ୍ରିଜ୍ ଆଣ୍ଡ ରୁଫ୍ କମ୍ପାନୀ ୨୦୧୬ ମସିହାଠାରୁ ଓଡ଼ିଶା ସରକାରଙ୍କ ସହ କାମ କରୁଛନ୍ତି । କେବଳ ଏସି/ଏସଟି ବିଭାଗ ନୁହେଁ, ଅନ୍ୟ ବିଭାଗରେ ମଧ୍ୟ କାମ କରୁଛନ୍ତି । ମାତ୍ର ସେହି ବିଭାଗର ଫାଇଲ୍ କାହିଁକି ଦେଖାଯାଉନି? ୧୦ ଲକ୍ଷ ଟଙ୍କାର ଯେଉଁ ଲାଞ୍ଚ କଥା କୁହାଯାଉଛି ସେମାନେ ଚଞ୍ଚଲ ମୁଖାର୍ଜୀଙ୍କୁ ଦେଇଥାଇପାରନ୍ତି । ମୋର ସେଥିରେ ସମ୍ପର୍କ କ’ଣ?
ବ୍ରିଜ୍ ଆଣ୍ଡ ରୁଫ୍ ସହିତ ଆମର କିଛି ବି ସମ୍ପର୍କ ନାହିଁ । ତାହା ସତ୍ୟ । ମାତ୍ର ଏକଥା କିଏ ଶୁଣିବ? ମୁଁ କେତେଜଣଙ୍କୁ ଏହା କହିସାରିଲିଣି । ମାତ୍ର କିଏ ଶୁଣିବ?
ଆଜି ହୁଏତ ଆମେ ଅସୁବିଧାରେ ପଡ଼ିଛୁ । କାଲି ଯଦି ମୁଁ ସୁଇସାଇଡ୍ କରିଦିଏ? ଯଦି କିଛି ଦୋଷ ନ କରି ମୁଁ ଦଣ୍ଡ ଭୋଗେ, ତେବେ ଆଉ କ’ଣ କରିପାରିବି?
କିଟ୍ ଆତ୍ମହତ୍ୟା ଘଟଣାରୁ ବିଷ୍ନୁପଦ ବାବୁ ବୋଧେ ଉତ୍ସାହିତ ! ମାତ୍ର ଏ ପ୍ରକାର ସ୍ପର୍ଶକାତର ପ୍ରତିକ୍ରିୟା ଦେବା ଅନୁଚିତ ଓ ଏଥିପାଇଁ ସରକାର ପ୍ରଥମେ ତାଂକ ବିରୋଧରେ କାର୍ଯ୍ୟାନୁଷ୍ଠାନ ନେବା ଦରକାର ଓ ତାଂକୁ ପଦରୁ ହଟାଇ ଛୁଟିରେ ରଖିବା ଦରକାର ! ଅତୀତରେ ଅନ୍ୟ ରାଜ୍ୟରେ ଏଭଳି ଚେତାବନୀ ପାଇଁ କାର୍ଯ୍ୟାନୁଷ୍ଠାନ ନିଆଯାଇଛି ।
ସେହିପରି ମହିଳା ପୋଲିସ ନନେଇ ତାଂକ ଘରକୁ ଯାଇ, ଏଭଳି ଅଯଥା ଡ୍ରାମା ପାଇଁ ସିବିଆଇ ଅଫିସରମାନେ ମଧ୍ୟ ଛାଡ଼ ପାଇବା ଉଚିତ ନୁହେଁ !