କର୍ମ ହିଁ ଭଗବାନ । ଯେତେ ବାଧାବିଘ୍ନ ଆସୁ ପଛେ ଦାୟିତ୍ୱ ଏବଂ ଉତ୍ସର୍ଗୀକୃତ ମନୋଭାବ ଥିଲେ ସବୁ କାମ ସମ୍ଭବ ହୋଇପାରିବ । ଏହାର ଜ୍ୱଳନ୍ତ ଉଦାହରଣ ସୃଷ୍ଟି କରିଛନ୍ତି ଉତ୍ତରପ୍ରଦେଶ କ୍ୟାଡରର ଆଇଏଏସ୍ ଅଧିକାରୀ ସୌମ୍ୟା ପାଣ୍ଡେ । ଗାଜିଆବାଦ ଜିଲ୍ଲାରେ କୋଭିଡ ପରିଚାଳନା ଦାୟିତ୍ୱରେ ଥିବା ମୋଦିନଗର ସବଡିଭିଜିନାଲ୍ ମାଜିଷ୍ଟ୍ରେଟ୍ ସୌମ୍ୟା ମାତ୍ର ୧୪ ଦିନର ପ୍ରସବ ଛୁଟି ପରେ ନିଜ କାର୍ଯ୍ୟକ୍ଷେତ୍ରକୁ ଫେରି ଆସିଛନ୍ତି । ନବଜାତ ଶିଶୁକୁ କୋଳରେ ଧରି ଅଫିସରେ କାମ କରୁଛନ୍ତି ।
ନବଜାତ ଶିଶୁକନ୍ୟାକୁ ଧରି ସୌମ୍ୟା ଅଫିସ୍ ରେ କାମ କରୁଥିବାର ଏକ ଭିଡ଼ିଓ କେହିଜଣେ ଟ୍ୱିଟର୍ ରେ ପୋଷ୍ଟ କଲା ପରେ ଏହା ଭାଇରାଲ୍ ହୋଇଯାଇଛି । ଦେଶବ୍ୟାପୀ ଏହି ମହିଳା ଅଧିକାରୀଙ୍କୁ ପ୍ରଶଂସା କରାଯାଉଛି । କୋଭିଡ ଆଳରେ ଅନେକ ସରକାରୀ ବାବୁ ଓ କର୍ମଚାରୀ ଅଫିସ କାମରୁ ଖସିବାକୁ ଗଳାବାଟ ଖୋଜୁଥିଲା ବେଳେ ଜଣେ ମହିଳା ଆଇଏଏସ୍ ଅଫିସର ପ୍ରସବ ଛୁଟିକୁ ଆଡେଇ ମାଆର ଦାୟିତ୍ୱ ସହ କୋଭିଡ ଯୋଦ୍ଧାର ଦାୟିତ୍ୱରେ ନିମଗ୍ନ ରହିଥିବାରୁ ଅନ୍ୟମାନଙ୍କ ପାଇଁ ପ୍ରେରଣା ପାଲଟିଛନ୍ତି ।
ସୌମ୍ୟା କହିଛନ୍ତି, ମୁଁ ଜଣେ ଆଇଏଏସ୍ ଅଫିସର । ମୋତେ ମୋ ଚାକିରି ଦାୟିତ୍ୱ ଦେଖିବାର ଅଛି । କୋଭିଡ-୧୯ ଯୁଦ୍ଧରେ ଏବେ ସମସ୍ତଙ୍କର ଦାୟିତ୍ୱ ବଢ଼ିଛି । ତେଣୁ ଏଥିରେ ଆଶ୍ଚର୍ଯ୍ୟ ହେବାର ନାହିଁ ।
ନବଜାତ ଶିଶୁକୁ କୋଳରେ ଧରି କିଭଳି କାମ କରିପାରୁଛନ୍ତି ବୋଲି ଗଣମାଧ୍ୟମର ପ୍ରଶ୍ନରେ ସୌମ୍ୟା କହିଛନ୍ତି, ଭଗବାନ ନାରୀକୁ ପ୍ରସବ କରିବାର ଶକ୍ତି ଦେବା ସହ ଛୁଆର ଲାଳନପାଳନର ଦାୟିତ୍ୱ ସମ୍ଭାଳିବାର ଶକ୍ତି ଦେଇଛନ୍ତି । ଗ୍ରାମାଞ୍ଚଳରେ ମହିଳାମାନେ ଗର୍ଭବତୀ ଥିବା ବେଳେ ଘର କାମ ସହିତ ନିଜର ଜୀବିକା ପାଇଁ କାମରେ ଲାଗିଥାନ୍ତି । ପ୍ରସବ ପରେ ମଧ୍ୟ ତାଙ୍କୁ ବିଶ୍ରାମ ପାଇଁ ଫୁରସତ୍ ନ ଥାଏ । ଛୁଆର ଦାୟିତ୍ୱ ସହ ପୂର୍ବ ଦାୟିତ୍ୱକୁ ସୁଚାରୂରୂପେ ତୁଲାଇଥାନ୍ତି । ଠିକ୍ ସେହିଭଳି ଇଶ୍ୱରଙ୍କ ଆଶିର୍ବାଦରେ ମୋର ତିନି ସପ୍ତାହର ଛୁଆକୁ ଧରି ମୁଁ ମୋ ପ୍ରଶାସନିକ କାର୍ଯ୍ୟ ତୁଲାଇବାରେ ସକ୍ଷମ ହୋଇପାରୁଛି । ଏଥିପାଇଁ ମୋ ପରିବାରର ସମର୍ଥନ ରହିଛି । ମୋ କାର୍ଯ୍ୟକ୍ଷେତ୍ର ତହସିଲ ଏବଂ ଗାଜିଆବାଦ ଜିଲ୍ଲା ପ୍ରଶାସନ ମୋର ପରିବାର ଭଳି । ଗର୍ଭବତୀ ସମୟଠାରୁ ଆରମ୍ଭ କରି ପ୍ରସବ ପର ପର୍ଯ୍ୟନ୍ତ ମୋର ସହକର୍ମୀମାନେ ସାହାଯ୍ୟ ସହଯୋଗ ଦେଇଆସିଛନ୍ତି ।
୨୦୧୭ ବ୍ୟାଚ୍ ର ଆଇଏଏସ୍ ଅଧିକାରୀ ସୌମ୍ୟା । ପ୍ରଥମ ଥରରେ ସିଭିଲ୍ ସର୍ଭିସ୍ ପରୀକ୍ଷାରେ ଚତୁର୍ଥ ସ୍ଥାନ ଅଧିକାର କରିଥିଲେ । ମସୌରୀରୁ ଟ୍ରେନିଂ ପରେ ଗତବର୍ଷ ମୋଦିନଗର ସବଡିଭିଜିନାଲ୍ ମାଜିଷ୍ଟ୍ରେଟ୍ ଭାବେ ପୋଷ୍ଟିଂ ପାଇଥିଲେ । ଗତ ଜୁଲାଇ ମାସରୁ ଗାଜିଆବାଦ ଜିଲ୍ଲା ପ୍ରଶାସନରେ କୋଭିଡ ପରିଚାଳନାର ନୋଡାଲ୍ ଅଫିସର ଭାବେ କାର୍ଯ୍ୟ କରୁଛନ୍ତି ସୌମ୍ୟା । ସେପ୍ଟେମ୍ବରରେ ତାଙ୍କର ପ୍ରସବ ଅପରେସନ୍ ପାଇଁ ୨୨ ଦିନ ପାଇଁ ଛୁଟିରେ ଯାଇଥିଲେ । ମାତ୍ର ଦୁଇସପ୍ତାହ ପରେ ସେ କାର୍ଯ୍ୟକ୍ଷେତ୍ରକୁ ଫେରିଆସିଛନ୍ତି । ତେବେ କୋଭିଡ ପାଇଁ ଗର୍ଭବତୀ ମହିଳାମାନେ ସାବଧାନତାର ସହ କାର୍ଯ୍ୟ କରିବାକୁ ସୌମ୍ୟା ପରାମର୍ଶ ଦେଇଛନ୍ତି ।
ସୌମ୍ୟାଙ୍କ କ୍ୟାରିୟର୍
ଉତ୍ତରପ୍ରଦେଶରେ ଜନ୍ମିତ ସୌମ୍ୟା ପାଣ୍ଡେ ୨୦୧୭ ବ୍ୟାଚ୍ ର ଆଇଏଏସ୍ ଅଧିକାରୀ । ପ୍ରଥମ ଉଦ୍ୟମରେ ସେ କେବଳ ସଫଳତା ପାଇ ନ ଥିଲେ ବରଂ ଚତୁର୍ଥ ରାଙ୍କ୍ ରେ ଥିଲେ । ଆଲ୍ଲାହାବାଦର ପ୍ରସିଦ୍ଧ ମୋତିଲାଲ ନେହେରୁ ନ୍ୟାସନାଲ୍ ଇନଷ୍ଟିଚ୍ୟୁଟ୍ ଅଫ ଟେକନୋଲୋଜିରୁ ୨୦୧୫ ରେ ଇଲେକଟ୍ରିକାଲ୍ ଇଂଜିନିୟରିଂରେ ଗୋଲଡ ମେଡାଲିଷ୍ଟ । ସିବିଏସଇ ଦଶମ ପରୀକ୍ଷାରେ ୯୮% ନମ୍ବର ରଖି ଜିଲ୍ଲା ଟପ୍ପର ହୋଇଥିଲା ବେଳେ ଦ୍ୱାଦଶ ପରୀକ୍ଷାରେ ୯୭.୮% ନମ୍ବର ରଖିଥିଲେ ।
ଖାଲି ପାଠରେ ନୁହେଁ, ସ୍କୁଲରେ ପଢ଼ିଲା ବେଳୁ ନାଚ ଓ ଖେଳରେ ମଧ୍ୟ ପାରଙ୍ଗମ । ସେ ଜଣେ ଟ୍ରେନଡ କ୍ଲାସିକାଲ୍ ଡ୍ୟାନସର । ପ୍ରୟାଗ ସଙ୍ଗୀତ ସମିତିରୁ କଥକ ନୃତ୍ୟ ପ୍ରଶିକ୍ଷଣ ପାଇଛନ୍ତି । ସ୍କୁଲରେ ବାସ୍କେଟବଲ୍ ଦଳର କ୍ୟାପଟେନ୍ ଥିଲେ ।
ବାପାମାଆଙ୍କର ଏକମାତ୍ର ସନ୍ତାନ ହେଉଛନ୍ତି ସୌମ୍ୟା । ତାଙ୍କା ବାପା ଡ. ରବି ପାଣ୍ଡେ ଏକ କମ୍ପ୍ୟୁଟର ସଂସ୍ଥା କରିଥିବା ବେଳେ ମାଆ ଡ. ସାଧନା ପାଣ୍ଡେ ଜଣେ ଗାଇନୋକୋଲୋଜିଷ୍ଟ୍ । ସୌମ୍ୟାଙ୍କ ସ୍ୱାମୀ ଡ. ନୀତିନ୍ ଗୌର ୨୦୧୬ ବ୍ୟାଚର୍ ଆଇଏଏସ୍ ଅଫିସର ।
