ଭୁବନେଶ୍ୱର: ଆସନ୍ତାକାଲି ପବିତ୍ର କାର୍ତ୍ତିକ ପୂର୍ଣ୍ଣିମା । ଏହି ଶୁଭ ମୁହୂର୍ତ୍ତରେ ବିଜେଡିରୁ କ’ଣ ଗୋଟେ ବଡ଼ ଖବର ଆସିପାରେ! ଓଡ଼ିଶାର କ୍ଷମତା କରିଡୋରିରେ ବର୍ତ୍ତମାନର ସବୁଠାରୁ ଚର୍ଚ୍ଚିତ ବ୍ୟକ୍ତିତ୍ୱ ଭି.କେ.ପାଣ୍ଡିଆନ ଆନୁଷ୍ଠାନିକ ଭାବେ ବିଜେଡିରେ ଯୋଗଦେଇପାରନ୍ତି!! ଆଜି ସଂଧ୍ୟା ପରରୁ ଏହି ଚର୍ଚ୍ଚା ଖୁବ୍ ଜୋରରେ ବ୍ୟାପିଯାଇଛି । ବିଜେଡି ଉପର ମହଲ ସହ ଘନିଷ୍ଠ ସମ୍ପର୍କରେ ରହୁଥିବା ଗଣମାଧ୍ୟମ ପ୍ରତିନିଧି ମଧ୍ୟ ସୋସିଆଲ୍ ମିଡିଆ ଆକାଉଣ୍ଟରେ ଏହି ସୂଚନା ଦେଇଛନ୍ତି । ତେବେ ଏହାର ସତ୍ୟାସତ୍ୟ ଜଣାପଡ଼ିନାହିଁ ।
ସୂଚନା ଅନୁଯାୟୀ, ଆସନ୍ତାକାଲି ବିଜେଡି ପକ୍ଷରୁ ଶଙ୍ଖ ଭବନରେ ଏକ ମେଗା ରକ୍ତଦାନ ଶିବିରର ଆୟୋଜନ କରାଯାଇଛି । ଦଳର ସଭାପତି ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସେଥିରେ ଯୋଗଦେବେ । ବିଜେଡିର ବରିଷ୍ଠ ନେତାମାନେ ସେଠାରେ ଉପସ୍ଥିତ ରହିବାକୁ କୁହାଯାଇଛି । ସେଠାରେ ଏକ ଗୁରୁତ୍ୱପୂର୍ଣ୍ଣ ଘୋଷଣା କରିବେ ମୁଖ୍ୟମନ୍ତ୍ରୀ ।
ଯଦି ଅନୁମାନ ସତ୍ୟ ହୁଏ, ତେବେ ଶ୍ରୀ ପାଣ୍ଡିଆନ ହୁଏତ ବିଜେଡିରେ ସାମିଲ ହେବେ ଏବଂ ତାଙ୍କୁ ଗୁରୁତ୍ୱପୂର୍ଣ୍ଣ ଦାୟିତ୍ୱ ଦିଆଯାଇପାରେ । ତେବେ ଏହାକୁ ନେଇ ବିଜେଡି ପକ୍ଷରୁ କୌଣସି ଆନୁଷ୍ଠାନିକ ସୂଚନା ଆସିନାହିଁ । ରାଜଧାନୀରେ ଅନେକ ବିଜେଡି ନେତାଙ୍କ ପାଖରେ ଏହାର ସମ୍ୟକ ସୂଚନା ମଧ୍ୟ ନାହିଁ ।
ସୂଚନାଥାଉକି, ୨୦୦୦ ବ୍ୟାଚ୍ ର ଆଇଏଏସ୍ ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଅତି ବିଶ୍ୱସ୍ତ ଭି.କେ. ପାଣ୍ଡିଆନ୍ ଗତ ଅକ୍ଟୋବର ୨୩ ତାରିଖରେ ସରକାରୀ ଚାକିରିରୁ ସ୍ୱେଚ୍ଛାକୃତ ଅବସର ନେଇଥିଲେ । ତା’ ପରଦିନ ପବିତ୍ର ଦୁର୍ଗାପୂଜାରେ ମୁଖ୍ୟମନ୍ତ୍ରୀ ତାଙ୍କୁ ‘୫-ଟି’ ଏବଂ ‘ନବୀନ ଓଡ଼ିଶା’ ର ଅଧ୍ୟକ୍ଷ ଭାବେ ନିଯୁକ୍ତି ଦେଇଥିଲେ । ଏହି ଦୁଇଟି କାର୍ଯ୍ୟକ୍ରମ ମାଧ୍ୟମରେ ମୁଖ୍ୟମନ୍ତ୍ରୀ ନୂଆ ଓଡ଼ିଶା ଗଠନର ସଂକଳ୍ପ ନେଇ ଶ୍ରୀ ପାଣ୍ଡିଆନଙ୍କ ଦାୟିତ୍ୱରେ ଛାଡ଼ିଛନ୍ତି । ତାଙ୍କୁ ଏବେ ଓଡ଼ିଶା ରୂପାନ୍ତରଣର ମଙ୍ଗୁଆଳ କୁହାଯାଉଛି । ବିଜେଡିରେ ସେ ଖୁବ୍ ଶୀଘ୍ର ଯୋଗଦେଇ ଦଳର ପ୍ରମୁଖ ଦାୟିତ୍ୱ ପାଇପାରନ୍ତି ବୋଲି ବହୁ ଦିନୁ ଚର୍ଚ୍ଚା ହେଉଛି ।
