ଭୁବନେଶ୍ୱର: ଯୁଆଡ଼େ ଦରାଣ୍ଡିଲେ ସିଆଡୁ ବାହାରୁଛି । ଘର ଓ ଅଫିସରୁ ମିଳୁଛି ପୁଳା ପୁଳା ଟଙ୍କା ବିଡ଼ା । ଥାକ ମରା ହୋଇ ରହିଛି ୫୦୦ ଟଙ୍କିଆ, ୨୦୦ ଟଙ୍କିଆ ଆଉ ୧୦୦ ଟଙ୍କିଆ ବଣ୍ଡଲ୍ । ଟଙ୍କା ଗଣି ଗଣି ମେସିନ୍ ବି ଅଚଳ ହୋଇଯାଉଛି । ବାହାରୁ ନୂଆ ଟଙ୍କାଗଣା ମେସିନ୍ ମଗେଇବାକୁ ପଡୁଛି । ୩ ଦିନ ହେଲା ପ୍ରାୟ ୫୦ ଜଣ କର୍ମଚାରୀ ଦିନରାତି ଟଙ୍କା ଗଣୁଥିଲେ ବି ଅଧା ଟଙ୍କା ଗଣା ସରିନି । ଓଲଟି ଆଜି ପୁଣି ଟଙ୍କା ଗଦେଇ ହେଲାଣି ।
ପଶ୍ଚିମ ଓଡ଼ିଶାରେ ଦେଶୀ ମଦ ସାମ୍ରାଜ୍ୟ ଗଢ଼ିଥିବା ବଳଦେବ ସାହୁ ଆଣ୍ଡ ବ୍ରଦର୍ସ ଓ ସହଯୋଗୀଙ୍କ ଉପରେ ଆୟକର ବିଭାଗର ଚଢ଼ଉ ବେଳେ ଏହି ଟଙ୍କାର ପାହାଡ଼ ଠାବ ହୋଇଛି । ଝାଡ଼ଖଣ୍ଡର କଂଗ୍ରେସ ରାଜ୍ୟସଭା ସାଂସଦ ଧୀରଜ ସାହୁଙ୍କ ମଦ ପ୍ରସ୍ତୁତି ସଂସ୍ଥା ଶିବଗଙ୍ଗା ଆଣ୍ଡ କମ୍ପାନିଜ୍ ର ଏହା ସହଯୋଗୀ ସଂସ୍ଥା ବୋଲି କୁହାଯାଉଛି । ଧୀରଜ ସାହୁଙ୍କ ସଂସ୍ଥାର ବିଭିନ୍ନ ଶାଖା ଓ ସହଯୋଗୀ ସଂସ୍ଥା ଉପରେ ଆୟକର ବିଭାଗ ଚଢ଼ଉ ବେଳେ ଏମିତି ପୁଳା ପୁଳା ଟଙ୍କା ମିଳିବା ଘଟଣା ସମଗ୍ର ଦେଶବାସୀଙ୍କୁ ଚକିତ କରିଦେଇଛି ।
ଆଳୁ ଖୋଳୁ ଖୋଳୁ ମହାଦେବ ବାହାରିଲା ଭଳି ଟିକସ ଫାଙ୍କି ଅଭିଯୋଗରେ ଆୟକର ବିଭାଗର ଚଢ଼ଉରୁ ଶହ ଶହ କୋଟି ନଗଦ ଟଙ୍କା ଠାବ ହେବା ସମସ୍ତଙ୍କୁ ଆଶ୍ଚର୍ଯ୍ୟ କରିଛି । ଏହି ବିପୁଳ ଟଙ୍କାର ଉତ୍ସ କ’ଣ ଏବଂ କେଉଁ ଉଦ୍ଦେଶ୍ୟରେ ଗଚ୍ଛିତ ଥିଲା ତାହା ଜାଣିବା ପାଇଁ ସମସ୍ତଙ୍କର ବ୍ୟଗ୍ରତା ବଢ଼ିଛି । ଖୋଦ୍ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏହି ଘଟଣାକୁ ଗମ୍ଭୀରତାର ସହ ନେଇଥିବା ବେଳେ ଓଡ଼ିଶାରେ ରାଜନୈତିକ ବୟାନବାଜି ଆରମ୍ଭ ହୋଇଛି ।
ଆୟକର ବିଭାଗ ଚଢ଼ଉର ଆଜି ଚତୁର୍ଥ ଦିନରେ ବି ବିପୁଳ ଟଙ୍କା ଏବଂ ଗୁରୁତ୍ୱପୂର୍ଣ୍ଣ କାଗଜପତ୍ର ଜବତ ହୋଇଛି । ବଲାଙ୍ଗୀରରେ ଥିବା ବଳଦେବ ସାହୁ ଏବଂ ସନ୍ସର ସୁଦପଡ଼ା ମଦଭାଟି ଆଇରନ୍ ଲକରରୁ ପୁଣି ବାହାରିଥିଲା ପୁଳା ପୁଳା ଟଙ୍କା । ଆୟକର ବିଭାଗର କର୍ମଚାରୀମାନେ କଟର ସାହାଯ୍ୟରେ ଲକର ଭାଙ୍ଗି ଟଙ୍କାବଣ୍ଡଲି ଗୁଡ଼ିକୁ ବାହାର କରିଥିଲେ । ବଲାଙ୍ଗୀର ଷ୍ଟେଟବ୍ୟାଙ୍କର ମୁଖ୍ୟ ଶାଖାରେ ଆଉ ଜାଗା ନ ଥିବାରୁ ସେହି ଟଙ୍କାକୁ ସେହିଠାରେ ହିଁ ଗଣତି କରାଯିବାର ବ୍ୟବସ୍ଥା କରାଯାଇଛି । ସେପଟେ ଟିଟିଲାଗଡ଼ରେ ରିତେଶ ସାହୁ ପାଖରୁ ଆଜି ପୁଣି ମିଳିଛି ୧୧ କୋଟି ଟଙ୍କା । ଗତକାଲି ସୁନ୍ଦରଗଡ଼ର ରାଜେଶ ଜୟସ୍ୱାଲଙ୍କ ପୈତୃକ ଘରେ ଚଢ଼ଉ ବେଳେ ୩୭ କୋଟି ଟଙ୍କା ମିଳିଥିଲା ।
ସୂଚନାଥାଉକି, ବଲାଙ୍ଗୀର ସୁଦପଡ଼ା ମଦଭାଟିରୁ ପୂର୍ବରୁ ୧୫୬ ଟି ଟଙ୍କା ଭର୍ତ୍ତି ବ୍ୟାଗ୍ ମିଳିଥିଲା । ସେଗୁଡ଼ିକୁ ଏକ ଟ୍ରକ୍ ରେ ଲଦି ବଲାଙ୍ଗୀର ଷ୍ଟେଟବ୍ୟାଙ୍କର ମୁଖ୍ୟ ଶାଖାକୁ ନିଆଯାଇଥିଲା ଏବଂ ୩ ଦିନ ହେଲା ଗଣତି ଜାରି ରହିଛି । ବ୍ୟାଙ୍କ ପକ୍ଷରୁ ମିଳିଥିବା ସୂଚନା ଅନୁଯାୟୀ ବର୍ତ୍ତମାନ ସୁଦ୍ଧା ୧୦୨ ଟି ବ୍ୟାଗ୍ ର ଟଙ୍କା ଗଣତି ସରିଛି । ଆହୁରି ୭୪ ବ୍ୟାଗ୍ ଟଙ୍କା ଗଣତି ବାକି ଥିବା ବେଳେ ଗତକାଲି ଭାଟିର ମ୍ୟାନେଜର ବଣ୍ଟି ସାହୁ ଘରୁ ୨୦ ପେଟି ଟଙ୍କା ଜବତ କରିଥିଲା ଆୟକର ବିଭାଗର ସ୍ୱତନ୍ତ୍ର ଟିମ୍ । ଏହି ସବୁ ଟଙ୍କା ଗଣତିରେ ୧୦ରୁ ଅଧିକ ମେସିନ୍ ଲାଗିଛି । ଟଙ୍କା ଗଣି ଗଣି କିଛି ମେସିନ୍ ଅଚଳ ହୋଇଯିବାରୁ ଆଜି ଆଉ ୧୫ ଟି ନୂଆ ମେସିନ୍ କୁ ଟଙ୍କା ଗଣତିରେ ଲଗାଯାଇଛି । ସମୁଦାୟ ୫୦ ଜଣ କର୍ମଚାରୀ ଗଣତିରେ ଲାଗିଛନ୍ତି ।
ଏ ପର୍ଯ୍ୟନ୍ତ ଜବତ ହୋଇଥିବା ଟଙ୍କା ୩୦୦ କୋଟି ଟପିଯିବ ବୋଲି ଅନୁମାନ କରାଯାଉଛି ।
ଏହି ଘଟଣାକୁ ନେଇ ଓଡ଼ିଶା ରାଜନୀତିରେ ହଲଚଲ ସୃଷ୍ଟି ହୋଇଛି । ବିଜେପି ରାଜ୍ୟ ସଭାପତି ମନମୋହନ ସାମଲ ଆଜି ଏକ ସାମ୍ବାଦିକ ସମ୍ମିଳନୀ କରି ସିଧାସଳଖ ଭାବେ ମୁଖ୍ୟମନ୍ତ୍ରୀଙ୍କୁ ଚାଲେଞ୍ଜ କରିଛନ୍ତି । ରାଜ୍ୟର ମଦଭାଟିରେ ବର୍ଷ ବର୍ଷ ଧରି ଏତେ ପରିମାଣର କଳା କାରବାର କେମିତି ଚାଲିଥିଲା ଏବଂ ରାଜ୍ୟ ପୁଲିସ, ଅବକାରୀ ବିଭାଗ ଓ ଗୃହ ବିଭାଗ କ’ଣ କରୁଥିଲେ ବୋଲି ପ୍ରଶ୍ନ କରିଛନ୍ତି । ଏଥିସହ ୨୫ ବର୍ଷ ଧରି ଦେଶୀ ମଦ ଭାଟିଗୁଡ଼ିକ କାହିଁକି ଅକ୍ସନ୍ ହୋଇନାହିଁ ବୋଲି ମୁଖ୍ୟମନ୍ତ୍ରୀଙ୍କୁ ପ୍ରଶ୍ନ କରିଛନ୍ତି । ମଦ ବେପାରୀ ସାହୁ ବ୍ରଦର୍ସଙ୍କ ସହ ବିଜେଡି ନେତା ଓ ମନ୍ତ୍ରୀଙ୍କ ଲିଙ୍କ୍ ଅଭିଯୋଗ ଆଣି ମୁଖ୍ୟମନ୍ତ୍ରୀଙ୍କର ସତସାହାସ ଥିଲେ ଘଟଣାର ସିବିଆଇ ତଦନ୍ତ ପାଇଁ ଆହ୍ୱାନ ଦେଇଛନ୍ତି ।
ତେବେ ବିଜେଡି ଏହାର କଡ଼ା ଜବାବ ଦେଇଛି । ଆୟକର ଚଢ଼ଉକୁ ନେଇ ବିଜେପି ହୀନ ରାଜନୀତି କରୁଛି ବୋଲି ବିଜେଡି ମୁଖପାତ୍ର ଇପସିତା ସାହୁ କହିଛନ୍ତି । ସେ କହିଛନ୍ତି, ବିଜେପିର ରାଷ୍ଟ୍ରୀୟ ସ୍ତରର ନେତା ଓ ଝାଡଖଣ୍ଡର ବିଜେପି ୟୁନିଟ୍ର ନେତାମାନେ, କଂଗ୍ରେସକୁ ସମାଲୋଚନା କରିବା ସହ ମିଳିଥିବା ଅର୍ଥ କଂଗ୍ରେସର ବୋଲି ସ୍ପଷ୍ଟ ଭାବେ ଗଣମାଧ୍ୟମକୁ ପ୍ରତିକ୍ରିୟା ଦେଇ କହିଛନ୍ତି । ଝାଡଖଣ୍ଡ କଂଗ୍ରେସ କହୁଛି, ମିଳିଥିବା ବିପୁଳ ପରିମାଣର ନଗଦ ଅର୍ଥ ସହ ବିଜେପି ନେତାଙ୍କର ସମ୍ପର୍କ ରହିଛି । ହେଲେ ଓଡିଶା ବିଜେପିର ଅବସ୍ଥା କିନ୍ତୁ କାଳି ଗାଈର ଭିନ୍ନ ଗୋଠ ପରି । ମିଡିଆରେ ମୁହଁ ଦେଖାଇବାକୁ ରାଜ୍ୟ ବିଜେପି ନେତାଙ୍କ ମଧ୍ୟରେ ଚାଲିଥିବା ପ୍ରତିଯୋଗିତା ପାଇଁ ଅନେକବାର ସେମାନେ ମିଛ ଖବରର ସାହାରା ନିଅନ୍ତି । ଏଭଳି ହୀନ ରାଜନୀତି ପାଇଁ ବିଜେପିକୁ ଓଡିଶାବାସୀ ବାରମ୍ବାର ପ୍ରତ୍ୟାଖାନ କରିଛନ୍ତି ଏବଂ ଆଗକୁ ମଧ୍ୟ ପ୍ରତ୍ୟାଖାନ କରିବେ ବୋଲି ଶ୍ରୀମତୀ ସାହୁ କହିଛନ୍ତି ।
