ଭୁବନେଶ୍ୱର: ବଲାଙ୍ଗୀରରେ ସାହୁ ବ୍ରଦର୍ସଙ୍କ ମଦଭାଟିରୁ ଜବତ କଳାଟଙ୍କାର ଗଣତି ଆଜି ସଂଧ୍ୟାରେ ଶେଷ ହୋଇଛି । ପ୍ରାଥମିକ ସୂଚନା ଅନୁଯାୟୀ, ଗଣତିରୁ ମିଳିଛି ୩୦୫ କୋଟି ଟଙ୍କା । ଆୟକର ବିଭାଗ ୧୭୬ ଟି ବ୍ୟାଗରେ ଏହି ଟଙ୍କା ବ୍ୟାଙ୍କକୁ ଆଣିଥିଲେ । ଲଗାତର ୫ ଦିନ ଧରି ୫୦ କର୍ମଚାରୀ ଦିନରାତି ଟଙ୍କା ଗଣୁଥିଲେ । ୨୫ ମେସିନ୍ ରେ ଟଙ୍କା ଗଣାଯାଉଥିଲା ।
ଗତକାଲି ରାତିରେ ମଦ ବ୍ୟବସାୟୀ ବଳଦେବ ସାହୁ ଆଣ୍ଡ ସନ୍ସର ସମ୍ବଲପୁରସ୍ଥିତ କାର୍ଯ୍ୟାଳୟ ଓ ମଦଭାଟିରେ ଆୟକର ବିଭାଗ ଚଢ଼ାଉ କରି ୩୭.୫୦ କୋଟି ଟଙ୍କା ପାଇଥିଲା । ସେହିଭଳି ଟିଟିଲାଗଡ଼ରେ ରିତେଶ ସାହୁ ପାଖରୁ ପୁଣି ୧୧ କୋଟି ମିଳିଥିବା ବେଳେ ପୂର୍ବଦିନ ସୁନ୍ଦରଗଡ଼ର ରାଜେଶ ଜୟସ୍ୱାଲଙ୍କ ପୈତୃକ ଘରେ ଚଢ଼ଉ ବେଳେ ୩୭ କୋଟି ଟଙ୍କା ମିଳିଥିଲା । ବୌଦ୍ଧ ଡିଷ୍ଟିଲାରି ଓ ରାଣୀସତୀ ରାଇସ୍ ମିଲ୍ ରୁ ମଧ୍ୟ ବିପୁଳ ଟଙ୍କା ଜବତ ହୋଇଥିଲା । ଡିଷ୍ଟିଲାରି ପାଚେରୀ ପଛପଟୁ ବସ୍ତା ବସ୍ତା ୫ ଶହ ଟଙ୍କିଆ ଚିରା ନୋଟ୍ ମିଳିଥିଲା ।
ଝାଡ଼ଖଣ୍ଡର କଂଗ୍ରେସ ରାଜ୍ୟସଭା ସାଂସଦ ତଥା ମଦ ବ୍ୟବସାୟୀ ଧୀରଜ ସାହୁ ଲିଙ୍କ୍ ରେ ଓଡ଼ିଶାରେ ଆୟକର ବିଭାଗର ଏହି ଚଢ଼ଉରୁ ଏମିତି ବସ୍ତା ବସ୍ତା ଟଙ୍କା ମିଳିବା ସାରା ଦେଶରେ ହଇଚଇ ସୃଷ୍ଟି କରିଛି । ସାରା ଭାରତରେ କୌଣସି ଗୋଟିଏ ଚଢ଼ଉରେ ଏତେ ପରିମାଣର ଟଙ୍କା କେବେ ବି ଜବତ ହୋଇ ନ ଥିଲା । ଜାତୀୟ ଗଣମାଧ୍ୟମରେ ଏହା ପ୍ରମୁଖ ଖବର ହୋଇଥିବା ବେଳେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଘଟଣାକୁ ଗୁରୁତ୍ୱର ସହ ନେଇ କଠୋର ଆଭିମୁଖ୍ୟ ପ୍ରକଟ କରିଛନ୍ତି ।
ଓଡ଼ିଶାରେ ଏହାକୁ ନେଇ ରାଜନୈତିକ କାଦୁଅ ଫିଙ୍ଗାଫିଙ୍ଗି ଜାରି ରହିଛି । ଝାଡ଼ଖଣ୍ଡ କଂଗ୍ରେସ ସାଂସଦଙ୍କ ପରିବାରର ମଦ ବେପାର ଚେର ପଶ୍ଚିମ ଓଡ଼ିଶାକୁ ମାଡ଼ି ଯାଇଛି । ସେମାନଙ୍କ ପାଖରୁ ଶହ ଶହ କୋଟିର କଳାଟଙ୍କା ଜବତ ହେବା ଘଟଣା ସମସ୍ତଙ୍କୁ ଆଶ୍ଚର୍ଯ୍ୟ କରିଥିବା ବେଳେ ଏହି ଟଙ୍କା କୁଆଡ଼େ ଯାଇଥାନ୍ତା ତାହା ଆଲୋଚନାର ମୁଖ୍ୟ ବିଷୟବସ୍ତୁ ହୋଇଛି । ବିଜେପି ଜାତୀୟସ୍ତରର ନେତା ଓ ଝାଡ଼ଖଣ୍ଡ ବିଜେପି ନେତାମାନେ ଏହି ଅର୍ଥକୁ କଂଗ୍ରେସର ନିର୍ବାଚନୀ ଚାନ୍ଦା କହି ସମାଲୋଚନା କରିଥିବା ବେଳେ ଓଡ଼ିଶାର ବିଜେପି ନେତାମାନେ ବିଜେଡିକୁ ଟାର୍ଗେଟ୍ କରି ଅନୁରୂପ ଅଭିଯୋଗ ଆଣିଛନ୍ତି ।
ତେବେ ରାଜ୍ୟର ପୂର୍ବତନ ଅବକାରୀ ମନ୍ତ୍ରୀ ତଥା କଂଗ୍ରେସର ବରିଷ୍ଠ ବିଧାୟକ ସୁରେଶ ରାଉତରାୟ ଆଜି ଗଣମାଧ୍ୟମକୁ ଦେଇଥିବା ପ୍ରତିକ୍ରିୟା ଏହି ଚର୍ଚ୍ଚାକୁ ଅଧିକ ରୋଚକ କରିଛି । ସେ କହିଛନ୍ତି, ଝାଡ଼ଖଣ୍ଡର ମଦ ବେପାରୀ ଧୀରଜ ସାହୁ ରାଷ୍ଟ୍ରୀୟସ୍ତରରେ ସବୁ ଦଳକୁ ପଇସା ଦିଅନ୍ତି । ଓଡ଼ିଶାରେ ବିଜେପି, ବିଜେଡି, କଂଗ୍ରେସକୁ ମଧ୍ୟ ପଇସା ଦିଅନ୍ତି । ଆମ ରାଜ୍ୟରେ ବହୁ ନେତା ମଧ୍ୟ ତାଙ୍କଠାରୁ ଟଙ୍କା ନିଅନ୍ତି । ବିଚାର ବିଭାଗୀୟ ତଦନ୍ତ କରି ଏହାର ସତ୍ୟତା ଉନ୍ମୋଚନ କରିବାକୁ ସେ ଦାବି କରିଛନ୍ତି ।
