ଲିକୁ ସାହୁ ମେନ୍ ଲୋକ !

ଭୁବନେଶ୍ୱର: ୧୮ ମାସର ମୋହନ ମାଝୀଙ୍କ ସରକାରରେ ସବୁଠାରୁ ଶକ୍ତିଶାଳୀ ନେତା ଭାବେ ଉଭା ହୋଇଛନ୍ତି ବିଧାୟକ ହିମାଂଶୁ ଶେଖର ଓରଫ୍ ଲିକୁ ସାହୁ । ଧର୍ମଶାଳାର ଏହି ସ୍ୱାଧୀନ ବିଧାୟକଙ୍କ ରାଜ୍ୟ ବିଜେପିରେ କାଟତି ସମସ୍ତଙ୍କୁ କାବା କରିଛି । ଖୁବ୍ କମ ଦିନରେ ମୁଖ୍ୟମନ୍ତ୍ରୀ ମୋହନ ମାଝୀ ଏବଂ ରାଜ୍ୟ ସଭାପତି ମନମୋହନ ସାମଲଙ୍କର ଅତି ନିକଟତର ହୋଇଛନ୍ତି । ଯେଉଁଥିପାଇଁ ଉଭୟ ଦଳ ଓ ସରକାରରେ ତାଙ୍କର ଏବେ ପ୍ରବଳ ଆଧିପତ୍ୟ । ଏଇ ସରକାରରେ ତାଙ୍କ ପାଇଁ ଅସମ୍ଭବ କିଛି ନାହିଁ ବୋଲି ସମସ୍ତଙ୍କ ମନରେ ଧାରଣା ସୃଷ୍ଟି ହୋଇଛି ।

ଗତକାଲି ମୁଖ୍ୟମନ୍ତ୍ରୀ ସଦଳବଳେ ତାଙ୍କ ନିଜ ଜିଲ୍ଲା କେନ୍ଦୁଝର ଗସ୍ତରେ ଯାଇଥିଲେ । ଘଟଗାଁରେ ବହୁ ପ୍ରତୀକ୍ଷିତ ମା’ ତାରିଣୀ ସମନ୍ୱିତ ବିକାଶ ପ୍ରକଳ୍ପର ଭିତ୍ତିପ୍ରସ୍ତର ସ୍ଥାପନ ପାଇଁ ମୁଖ୍ୟମନ୍ତ୍ରୀଙ୍କର ଏହି କାର୍ଯ୍ୟକ୍ରମକୁ ସଫଳ କରିବା ଦାୟିତ୍ୱ ବିଧାୟକ ଲିକୁ ସାହୁଙ୍କ ଉପରେ କୁଆଡ଼େ ପଡ଼ିଥିଲା । ଉପରେ ପଡ଼ି ସେ ଦାୟିତ୍ୱ ନେଇଥିଲେ ନା ଆୟୋଜକବାଲା ତାଙ୍କ ଉପରେ ପଡ଼ିଥିଲେ ତାହା ଯଦିଓ ଜଣାପଡ଼ିନାହିଁ, କିନ୍ତୁ ଲିକୁ ସାହୁ ଯେ ପାରିବାର ସେହି ବିଶ୍ୱାସ ଉପରବାଲାଙ୍କର ଥିଲା । ଗତକାଲି ଲିକୁ ତାହାକୁ ଶତ ପ୍ରତିଶତ ପ୍ରମାଣିତ କରିଛନ୍ତି ।

କେନ୍ଦୁଝରର ଘଟଗାଁ ସମାବେଶ ପାଇଁ ଯାଜପୁରର ଧର୍ମଶାଳା ବିଧାୟକ ୨୦ ରୁ ଅଧିକ ବସ୍ ଯୋଗେ ଶହ ଶହ ଲୋକ ପଠାଇଥିବା ଜଣାପଡ଼ିଛି । ଏହାର ପ୍ରମାଣ ଲାଗିଥିଲା ବସ୍ ପଛପଟେ । ଘଟଗାଁ ଯାଉଥିବା ରିଜର୍ଭ ବସ୍ ଗୁଡ଼ିକରେ ମୋହନ ମାଝୀଙ୍କ ସହ ଲିକୁ ସାହୁଙ୍କର ଫଟୋ ଥିଲା । କେନ୍ଦୁଝର ମାଟିକୁ ମୁଖ୍ୟମନ୍ତ୍ରୀଙ୍କୁ ସ୍ୱାଗତମ୍ ଲେଖି ଏହି ବ୍ୟାନର ତିଆରି ହୋଇଥିଲା ।

ଚର୍ଚ୍ଚା ହେଉଛି ଯେ ରାଜ୍ୟ ସଭାପତିଙ୍କ ଉପସ୍ଥିତିରେ ମୁଖ୍ୟମନ୍ତ୍ରୀଙ୍କ କାଲିର ଘଟଗାଁ ରୋଡ୍ ସୋ’ ଓ ସଭା ସଫଳ ହୋଇଥିଲେ ମଧ୍ୟ ସେଥିରେ ମୁଖ୍ୟମନ୍ତ୍ରୀଙ୍କର ବେଶୀ ଶ୍ରେୟ ନାହିଁ । ତାଙ୍କ ଲୋକପ୍ରିୟତାର ଏହା ନିଦର୍ଶନ ନୁହେଁ । ବରଂ ଶ୍ରେୟ ଲିକୁ ସାହୁଙ୍କର । କାରଣ ଗତଥର ମୁଖ୍ୟମନ୍ତ୍ରୀଙ୍କ କେନ୍ଦୁଝର କାର୍ଯ୍ୟକ୍ରମରେ ଲୋକ ମରୁଡ଼ି ପଡ଼ିଥଲେ । ମାତ୍ର ଏଥର ଲିକୁଙ୍କ ଉଦ୍ୟମ ଯୋଗୁଁ ହାଉଜାଉ ଲୋକ ହେଲେ । ଯାହା ବି ହେଉ, କାର୍ଯ୍ୟକ୍ରମ ସଫଳତାରେ ମୁଖ୍ୟମନ୍ତ୍ରୀ ଅତ୍ୟନ୍ତ ଖୁସି ହୋଇଥିବାରୁ ଲିକୁ ସାହୁଙ୍କ ପରିଶ୍ରମ ସାର୍ଥକ ହେଲା ଏବଂ ପଇସା ଉଠିଗଲା ବୋଲି ସ୍ଥାନୀୟ ଅଞ୍ଚଳରେ କୁହାକୁହି ହେଉଛନ୍ତି ।

ପୂର୍ବରୁ ନୂଆପଡ଼ା ଉପନିର୍ବାଚନରେ ଶକ୍ତି ପ୍ରଦର୍ଶନ ପାଇଁ ଲିକୁଙ୍କୁ ସୁଯୋଗ ମିଳିଥିଲା । ମନ୍ତ୍ରୀ ସୁରେଶ ପୂଜାରୀ, ବିଧାୟକ ଜୟନାରାୟଣ ମିଶ୍ରଙ୍କ ଭଳି ପଶ୍ଚିମ ଓଡ଼ିଶାର ଟାଣୁଆ ବରିଷ୍ଠ ନେତା ଏବଂ ଇରାଶିଷ ଆଚାର୍ଯ୍ୟ ଓ ଟଙ୍କଧର ତ୍ରିପାଠୀଙ୍କ ଭଳି ଟାଣୁଆ ଯୁବ ସଂଗଠକ ତଥା ବିଧାୟକ ଥାଉ ଥାଉ ଉପକୂଳ ଓଡ଼ିଶାର ଲିକୁଙ୍କୁ ନୂଆପଡ଼ା ଉପନିର୍ବାଚନ ପରିଚାଳନାମଣ୍ଡଳୀରେ ଗୁରୁତ୍ୱ ଦିଆଗଲା । ସେଠି ସମସ୍ତେ ନିଜର ବୁଦ୍ଧି ଖଟାଇ ଅକ୍ଲାନ୍ତ ପରିଶ୍ରମ କରିଥିଲେ ମଧ୍ୟ ସଫଳତାର ଶ୍ରେୟ ଗଲା ଲିକୁଙ୍କୁ । ମନ୍ତ୍ରୀ ନିତ୍ୟାନନ୍ଦ ଗଣ୍ଡଙ୍କଠାରୁ ଆରମ୍ଭ କରି ମୁଖପାତ୍ର ମନୋଜ ମହାପାତ୍ରଙ୍କ ପର୍ଯ୍ୟନ୍ତ ନେତା ଝାଳନାଳ ବୁହାଇଥିଲେ । ହେଲେ ଶ୍ରେୟର ଛିଟା ବି ପାଇଲେନି । ଖୋଦ୍ ରାଜ୍ୟ ସଭାପତି ମନମୋହନ ସାମଲ ଗଣମାଧ୍ୟମରେ ଲିକୁ ସାହୁଙ୍କ ନାଁ ନେଇ ନୂଆପଡ଼ା ଉପନିର୍ବାଚନର ଶ୍ରେୟ ଦେଲେ । ଏହାକୁ ନେଇ ଦଳରେ ଅସନ୍ତୋଷ ସୃଷ୍ଟି ହୋଇଥିଲେ ମଧ୍ୟ ଖାତିର କଲେ ନାହିଁ ମନମୋହନ ।

କେବଳ ନୂଆପଡ଼ା କି କେନ୍ଦୁଝର ନୁହେଁ, ଆଜିକାଲି ରାଜ୍ୟ ବିଜେପିର ଯେଉଁଠି ବଡ଼ ବଡ଼ କାର୍ଯ୍ୟକ୍ରମ ତାହାକୁ ସଫଳ କରିବା ଦାୟିତ୍ୱ ଲିକୁ ସାହୁଙ୍କୁ ଦିଆଯାଉଛି । ତାଙ୍କର ସାମର୍ଥକୁ ହୁଏତ ରାଜ୍ୟର ଦୁଇ ଶୀର୍ଷ ନେତୃତ୍ୱ ବୁଝିପାରିଛନ୍ତି । କୁହାଯାଉଛି, ମୁଖ୍ୟମନ୍ତ୍ରୀଙ୍କ ବାସଭବନ ଓ ତୃତୀୟ ମହଲା ଲିକୁ ସାହୁଙ୍କ ପାଇଁ ସବୁବେଳେ ଖୋଲା । ରାଜ୍ୟ ସଭାପତିଙ୍କର ମଧ୍ୟ ସେ ଖାସ୍ ବିଶ୍ୱସ୍ତ ଲୋକ । ମୁଖ୍ୟମନ୍ତ୍ରୀ ଓ ରାଜ୍ୟ ସଭାପତିଙ୍କ ପରେ ତାଙ୍କର ନାଁ ଏବେ ପାୱାର୍ କରିଡରରେ ବେଶୀ ଚର୍ଚ୍ଚା ।

ଭାଗ୍ୟ କେଉଁ ଜାଗାରେ ମଣିଷକୁ ପହଞ୍ଚାଏ ତାହାର ସଦ୍ୟତମ ଉଦାହରଣ ହୋଇଛନ୍ତି ଏହି ୪୦ ବର୍ଷୀୟ ବିଧାୟକ । ପୂର୍ବରୁ ତାଙ୍କର ବିଜେପିରେ କୌଣସି ଭୂମିକା କି ଅବଦାନ ନ ଥିଲା । ଏବେ ମଧ୍ୟ ତାଙ୍କଠାରେ ବିଜେପି ଅଫିସିଆଲ୍ ଷ୍ଟାମ୍ପ୍ ବାଜି ନାହିଁ । ବିଜେଡି ସରକାର ଅମଳରେ ସେ ଧର୍ମଶାଳା ବିଧାୟକ ପ୍ରଣବ ଓରଫ୍ ଜିତୁ ବଳବନ୍ତରାୟଙ୍କର ବ୍ୟବସାୟିକ ସହଯୋଗୀ ଥିଲେ । ପରବର୍ତ୍ତୀ ସମୟରେ ତାଙ୍କର ରାଜନୈତିକ ପ୍ରତିଦ୍ୱନ୍ଦୀ ହୋଇ ବିଜେପି ଆଡକୁ ଢ଼ଳିଥିଲେ । ଗତ ନିର୍ବାଚନରେ ଧର୍ମଶାଳାରୁ ବିଜେପି ଟିକେଟ୍ ରେ ଲଢ଼ିବାକୁ ସେ ଆଶାୟୀ ଥିଲେ ମଧ୍ୟ ସ୍ମୃତିରେଖା ପହିଙ୍କୁ ଦଳ ଟିକେଟ୍ ଦେଇଥିଲା । ଲିକୁ ସ୍ୱାଧୀନ ପ୍ରାର୍ଥୀ ଭାବେ ଲଢ଼ି ୪୧୫୦ ଭୋଟ ବ୍ୟବଧାନରେ ବିଜେଡି ପ୍ରାର୍ଥୀ ଜିତୁ ବଳବନ୍ତରାୟଙ୍କୁ ପରାସ୍ତ କରିଥିଲେ । ବିଜେପି ପ୍ରାର୍ଥୀ ସ୍ମୃତିରେଖା ପହିଙ୍କୁ ମିଳିଥିଲା ମାତ୍ର ୧୫,୯୨୬ ଭୋଟ ।

ମୋଟାମୋଟି କହିଲେ, ୨୦୨୪ ନିର୍ବାଚନରେ ଲିକୁ ବିଜେପି ପ୍ରାର୍ଥୀ ଚୟନକୁ ଚାଲେଂଜ କରି ବିଭୀଷଣ ଭୂମିକାରେ ଅବତୀର୍ଣ୍ଣ ହୋଇଥିଲେ । ବିଡ଼ମ୍ବନା ଯେ ଆଜି ସେହି ଦଳ ଓ ସରକାରରେ ସେ ତୃତୀୟ କ୍ଷମତାଶାଳୀ ବ୍ୟକ୍ତି ଭାବେ ଉଭା ହୋଇଛନ୍ତି । ଠିକ୍ ବିଜେଡିରେ ବବି ଦାସଙ୍କ ଭୂମିକା ଭଳି । ଏହା ପଛର ରହସ୍ୟକୁ ନେଇ ବହୁତ ରୋଚକ ଆଲୋଚନା ଚାଲିଛି । ତାଙ୍କର ଅଭ୍ୟୁଦୟକୁ ନେଇ ଦଳରେ ତୀବ୍ର ଅସନ୍ତୋଷ ବଢ଼ିବାରେ ଲାଗିଛି । ମାତ୍ର ଭୟରେ କେହି ମୁହଁ ଖୋଲିନାହାନ୍ତି । ସମୟକୁ ସେମାନେ ଅପେକ୍ଷା କରିଛନ୍ତି । ‘ସମସ୍ତଙ୍କର ଦିନ ଆସିବ, ଯିବ । କ୍ଷମତା ଓ ଅହଂକାର କେମିତି ଚୁରମାର୍ ହୁଏ ତାହାର ବଡ଼ ଉଦାହରଣ ବବି ଓ ପାଣ୍ଡିଆନ ବୋଲି ଦଳର ଜଣେ ବରିଷ୍ଠ ନେତା ଗୋଟିଏ ପଦରେ ଆମ ପ୍ରଶ୍ନର ଉତ୍ତର ଦେଇଛନ୍ତି ।