ଭୁବନେଶ୍ୱର: ଆଶିଷ ସିଂଙ୍କ ପରି ଆଇପିଏସ୍ ଡି.ଏସ୍.କୁଟ୍ଟେ ଯିବେ କେନ୍ଦ୍ରୀୟ ଡେପୁଟେସନରେ । ତାଙ୍କର ଆଗ୍ରହକୁ କେନ୍ଦ୍ର ସରକାର ଗ୍ରହଣ କରିବା ସହ ବର୍ଡର ସିକ୍ୟୁରିଟି ଫୋର୍ସ(ବିଏସଏଫ) ଆଇଜି ଭାବେ ନିଯୁକ୍ତି ଦେଇଛନ୍ତି । ଏ ନେଇ କେନ୍ଦ୍ର ସରକାରଙ୍କ ବିଜ୍ଞପ୍ତି ପ୍ରକାଶ ପାଇଛି । ତାଙ୍କୁ ତୁରନ୍ତ ରିଲିଭ୍ କରିବା ପାଇଁ ଗୃହ ମନ୍ତ୍ରଣାଳୟ ପକ୍ଷରୁ ରାଜ୍ୟ ମୁଖ୍ୟ ଶାସନ ସଚିବଙ୍କୁ ଚିଠି କରାଯାଇଛି । ଶ୍ରୀ କୁଟ୍ଟେ ରାଜ୍ୟ ସରକାରଙ୍କ ଗୃହ ବିଭାଗରେ ଓଏସଡି ଭାବେ ବର୍ତ୍ତମାନ କାର୍ଯ୍ୟ କରୁଛନ୍ତି ।
୧୯୯୭ ବ୍ୟାଚ୍ ଆଇପିଏସ୍ ଶ୍ରୀ କୁଟ୍ଟେ ବିଜେଡି ସରକାରରେ ଅତ୍ୟନ୍ତ ପ୍ରଭାବଶାଳୀ ଥିଲେ । ପୂର୍ବ ସରକାରରେ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟରେ ସ୍ୱତନ୍ତ୍ର ସଚିବ ଥିଲେ । ସେ ବିଜେଡି ପାଇଁ କାର୍ଯ୍ୟ କରୁଥିବା ବିଜେପି ପକ୍ଷରୁ ବାରମ୍ବାର ଅଭିଯୋଗ ହୋଇ ଆସୁଥିଲା । ତେବେ ଶେଷ ପର୍ଯ୍ୟାୟ ନିର୍ବାଚନର ତିନି ଦିନ ପୂର୍ବରୁ ମୁଖ୍ୟ ନିର୍ବାଚନ ଅଧିକାରୀ ନିକୁଞ୍ଜ ବିହାରୀ ଧଳଙ୍କ ସୁପାରିଶକ୍ରମେ ତାଙ୍କ ଉପରେ ନିର୍ବାଚନ କମିସନଙ୍କ ଛାଟ ବାଜିଥିଲା । ନିର୍ବାଚନ କାର୍ଯ୍ୟରେ ଅହେତୁକ ହସ୍ତକ୍ଷେପ ପାଇଁ ଗତ ମେ’ ୨୮ ତାରିଖରେ ନିର୍ବାଚନ କମିସନ ତାଙ୍କୁ କାର୍ଯ୍ୟରୁ ନିଲମ୍ବିତ କରିଥିଲେ । ନୂଆଦିଲ୍ଲୀସ୍ଥିତ ଓଡ଼ିଶା ଆବାସିକ କମିସନରଙ୍କ କାର୍ଯ୍ୟାଳୟ ତାଙ୍କ ପାଇଁ ହେଡକ୍ୱାଟର୍ ହୋଇଥିଲା ।
ଜୁଲାଇ ୧୬ରେ ରାଜ୍ୟର ବିଜେପି ସରକାର ଶ୍ରୀ କୁଟ୍ଟେଙ୍କ ଉପରୁ ନିଲମ୍ବନ ଆଦେଶ ପ୍ରତ୍ୟାହାର କରି ଗୃହ ବିଭାଗରେ ଓଏସଡି ଭାବେ ନିଯୁକ୍ତି ଦେଇଥିଲେ । ଅନ୍ୟଦୁଇ ବିବାଦୀୟ ଆଇପିଏସ୍ ଆଶିଷ ସିଂ ଏବଂ ରବିକାନ୍ତଙ୍କୁ ମଧ୍ୟ ଗୃହ ବିଭାଗର ଓଏସଡି ନିଯୁକ୍ତି ମିଳିଥିଲା ।
ଅଗଷ୍ଟ ୨୪ରେ ଓଡ଼ିଶାର ଶ୍ରୀ କୁଟ୍ଟେ ଏବଂ ଶ୍ରୀ ସିଂଙ୍କ ବିରୋଧରେ ବିଭାଗୀୟ ପ୍ରୋସିଡିଂ ଆରମ୍ଭ କରିଥିଲେ ରାଜ୍ୟ ସରକାର । ଜବାବ ରଖିବାକୁ ଉଭୟଙ୍କୁ ୩୦ ଦିନ ସମୟ ଦିଆଯାଇଥିଲା । ମାତ୍ର ଉଭୟ କ’ଣ ଜବାବ ଦେଲେ ତାହା ଏ ପର୍ଯ୍ୟନ୍ତ ସାମନାକୁ ଆସିନାହିଁ ।
ବିଜେଡି ସରକାରରେ ପ୍ରଭାବଶାଳୀ ଥିବା ଏହି ଦୁଇ ବିବାଦୀୟ ଆଇପିଏସଙ୍କ ବିରୋଧରେ ରାଜ୍ୟ ସରକାର କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବେ ବୋଲି ବିଜେପିପ୍ରେମୀ ମାନେ ଚାହିଁ ବସିଥିଲା ବେଳେ ଉଭୟଙ୍କୁ କେନ୍ଦ୍ରର ମୋଦୀ ସରକାର କୋଳେଇ ନେବା ଚର୍ଚ୍ଚାର ବିଷୟ ହୋଇଛି । ଦୁଇଦିନ ତଳେ ଆଶିଷ ସିଂଙ୍କୁ ଅର୍ଦ୍ଧ ସାମରିକ ବାହିନୀ ଇଣ୍ଡୋ-ତିବ୍ଦତ ବର୍ଡର ପୁଲିସ(ଆଇଟିବିପି)ରେ ଆଇଜି ଭାବେ ନିଯୁକ୍ତି ମିଳିଥିଲା । ଆଜି ଶ୍ରୀ କୁଟ୍ଟେଙ୍କୁ ବିଏସଏଫ ଆଇଜି ଭାବେ ନିଯୁକ୍ତି ମିଳିଲା ।
