ଭୁବନେଶ୍ୱର: ଗତ ସରକାରରେ ତୃତୀୟ ମହଲାର ଆଶୀର୍ବାଦ ଥିବା ଅଧିକାରୀଙ୍କୁ ଅବସର ପରେ ପୁନଃ ନିଯୁକ୍ତି(ରି-ଏନଗେଜମେଣ୍ଟ) ମିଳିବା ଏକ ସାଧାରଣ ଘଟଣା ହୋଇଥିଲା । ଯୋଗ୍ୟ ଅଧିକାରୀଙ୍କ ଅଭାବ ନ ଥିଲେ ମଧ୍ୟ ସରକାର ଅବସରପ୍ରାପ୍ତ ଅଧିକାରୀଙ୍କ ଥଇଥାନଙ୍କ ଚିନ୍ତାରେ ବେଶୀ ଥିଲେ । ଏହି ଧଳାହାତୀମାନେ କ୍ଷମତାକେନ୍ଦ୍ରର ବୋଲକରା ହୋଇ ଯାବତୀୟ କାରନାମାରେ ସଂପୃକ୍ତ ରହୁଥିବା ଅଭିଯୋଗ ହେଉଥିଲା । ନିର୍ବାଚନ ବେଳେ ବିଜେପି ଏହାକୁ ଅନ୍ୟତମ ପ୍ରସଙ୍ଗ କରି ବିଜେଡି ସରକାରଙ୍କ ବିରୋଧରେ କମ୍ପମାନ କରିଥିଲା । ଏବେ ବିଜେପି କ୍ଷମତାକୁ ଆସିଲା ପରେ ବ୍ୟବସ୍ଥାରେ ପୂର୍ଣ୍ଣଚ୍ଛେଦ ପଡ଼ିବା ଆଶା କରାଯାଉଥିଲା । ମାତ୍ର ସେଭଳି ମନେ ହେଉନାହିଁ । ପୁନଃନିଯୁକ୍ତି ପାଇଥିବା ହାତଗଣତି ଅବସରପ୍ରାପ୍ତ ପ୍ରଶାସନିକ ଅଧିକାରୀଙ୍କୁ ଇତିମଧ୍ୟରେ ବିଦା କରାଯାଇଛି ସତ, ହେଲେ ଏବେ ବି ବିଭିନ୍ନ ବିଭାଗରେ ଏଭଳି ବାବୁଙ୍କ ରାଜୁତି ଚାଲିଛି । ଖାଲି ସେତିକି ନୁହେଁ, ନଗଦରେ କାର୍ଯ୍ୟକାଳ ସରିଥିବା ଥଇଥାନୀ ବାବୁଙ୍କର କାର୍ଯ୍ୟକାଳ ବୃଦ୍ଧି ପାଇବା ସବୁ ମହଲରେ ଚର୍ଚ୍ଚାର ବିଷୟ ହୋଇଛି ।
ଗୃହ ନିର୍ମାଣ ଓ ନଗର ଉନ୍ନୟନ ବିଭାଗ ଅଧୀନସ୍ଥ ୱାଟକୋରେ ସିଓଓ(ସେଣ୍ଟ୍ରାଲ୍) ପଦବୀରେ କାର୍ଯ୍ୟ କରୁଛନ୍ତି ପବ୍ଲିକ୍ ହେଲଥ୍ ଇଞ୍ଜିନିୟରିଂ ଅର୍ଗାନାଇଜେସନ୍(ପିଏଚଇଓ) ଅବସରପ୍ରାପ୍ତ ସୁପରିଟେଣ୍ଡିଂ ଇଞ୍ଜିନିୟର ଶରତ ଚନ୍ଦ୍ର ମିଶ୍ର । ସରକାରୀ ଚାକିରିରୁ ଅବସର ନେବା ପରେ ରାଜ୍ୟ ସରକାର ତାଙ୍କୁ ଏହି ପଦବୀରେ ରି-ଏନଗେଜ୍ କରିଥିଲେ । ନଗର ଉନ୍ନୟନ ବିଭାଗରେ ଦଶନ୍ଧି ଧରି ଗାଦି ମାଡ଼ି ବସିଥିବା ପ୍ରମୁଖ ସଚିବ ଜି. ମାଥିଭାଥନନଙ୍କର ସେ କୁଆଡ଼େ ନିକଟତମ ଲୋକ ଥିଲେ । ଯାହା ବି ହେଉ, ୱାଟକୋ ସିଓଓ(ସେଣ୍ଟ୍ରାଲ୍) ଭାେବେ ଶ୍ରୀ ମିଶ୍ରଙ୍କର କାର୍ଯ୍ୟକାଳ ଜୁଲାଇ୧୫ ତାରିଖରେ ସରୁଥିଲା । ମାତ୍ର ତାଙ୍କର ଚାକିରିକୁ ଆଉ ୬ ମାସ ବୃଦ୍ଧି କରାଯାଇଛି । ଆସନ୍ତା ଜାନୁଆରୀ ୧୪ ତାରିଖ ପର୍ଯ୍ୟନ୍ତ ସେ କାର୍ଯ୍ୟ କରିବେ । ନଗର ଉନ୍ନୟନ ବିଭାଗର ନିଷ୍ପତ୍ତି ଆଧାରରେ ୱାଟକୋ ଗତ ୧୫ ତାରିଖରେ ଏହାର ଅଫିସ୍ ଅର୍ଡର ବାହାର କରିଛି ।
