ଭୁବନେଶ୍ୱର: ଓଡ଼ିଶାକୁ କିଏ ଚଳୋଉଛି ତାହା ବିଜେପି ରାଷ୍ଟ୍ରୀୟ ସଭାପତି ଜେ.ପି. ନଡ୍ଡା ଜାଣିନାହାନ୍ତି । ଆଜି ଭବାନୀପାଟଣାରେ ଏକ ଜନସଭାକୁ ସମ୍ବୋଧିତ କଲାବେଳେ ସେ ପୁନର୍ବାର ଏହି ପ୍ରଶ୍ନ କରିଛନ୍ତି । ଗତଥର ଓଡ଼ିଶା ଗସ୍ତ କାଳରେ ସେ ସମାନ ପ୍ରଶ୍ନ ଉଠାଇଥିଲେ । ଇତିମଧ୍ୟରେ ତାଙ୍କ ଦଳର ସାଂସଦ ଅପରାଜିତା ଷଡ଼ଙ୍ଗୀ ଓ ଅନ୍ୟମାନେ ଗଣମାଧ୍ୟମରେ ତମ୍ବିତୋଫାନ କରିଥିବାରୁ ଭବାନୀପାଟଣାରେ ରାଷ୍ଟ୍ରୀୟ ସଭାପତିଙ୍କ ଭାଷଣ ଜମିଯିବ ବୋଲି କର୍ମୀମହଲ ଚାହିଁ ରହିଥିଲେ । ମାତ୍ର ନଡ୍ଡା ସେଇ ପୁରୁଣା ପାଠର ଆଲୋଚନା କରିଛନ୍ତି । ଓଡ଼ିଶାକୁ ନେତା ନା ଅଫିସର ଚଲାଉଛନ୍ତି ବୋଲି ପ୍ରଶ୍ନ କରି ଅଫିସରଙ୍କ ଉପରକୁ ଠାର ମାରିଛନ୍ତି । ମାତ୍ର କାହାରି ନାଁ ନେଇନାହାନ୍ତି ।
ଶ୍ରୀ ନଡ୍ଡା ପଚାରିଥିଲେ ଓଡ଼ିଶାକୁ ନେତା ନା ଅଫିସର ଚଳାଉଛନ୍ତି? କିଏ ଶାସନ ଚଳାଉଛି ଆପଣ ଜାଣିଛନ୍ତି, ମୁଁ ବି ଜାଣିଛି । ମାତ୍ର ମୁଁ ନାଁ ନେବାକୁ ଚାହୁଁନାହିଁ । ନବୀନ ବାବୁ ଅଧିକାରୀଙ୍କ ହାତରେ ପୂରା ଶାସନକୁ ଟେକି ଦେଇଛନ୍ତି । ଆପଣ ଭୋଟ ଜଣଙ୍କୁ ଦେବେ, ମାତ୍ର ଶାସନ ଆଉ ଜଣେ କରିବେ? ଏଭଳି ସରକାର ଆମର ଦରକାର କି? ସମୟ ଆସିଛି, ଆମେ ଓଡ଼ିଶାରେ ସରକାର ଗଢ଼ିବା ବୋଲି ସେ ଉପସ୍ଥିତ କର୍ମୀମାନଙ୍କୁ ଆହ୍ୱାନ ଦେଇଥିଲେ ।
ନଡ୍ଡା ତାଙ୍କ ଭାଷଣରେ ମୋଦି ସରକାରଙ୍କ ୯ ବର୍ଷର ସଫଳତାର ଲମ୍ବା ହିସାବ ରଖିଥିବା ବେଳେ ୨୩ ବର୍ଷର ବିଜେଡି ସରକାରଙ୍କ ବିଫଳତା ସମ୍ପର୍କରେ ଆଲୋଚନା କରିଥିଲେ । ସେ କହିଥିଲେ, ମୁଣ୍ଡପିଛା ଆୟରେ ଓଡ଼ିଶା ତଳେ ଥିବା ବେଳେ ମହିଳା ନିର୍ଯ୍ୟାତନାରେ ଆଗରେ ରହିଛି । ଓଡ଼ିଶା ସରକାର ଭ୍ରଷ୍ଟାଚାର, ଦୁର୍ନୀତିରେ ବୁଡ଼ିଛନ୍ତି । ସବୁ କାର୍ଯ୍ୟରେ ୫୦% ପିସି କାରବାର ଚାଲିଛି । କେନ୍ଦ୍ର ଯୋଜନାକୁ ନାଁ ବଦଳେଇ ହଡ଼ପ କରାଯାଉଛି । ପ୍ରଧାନମନ୍ତ୍ରୀ ଆବାସ ଯୋଜନାରେ ପ୍ରକୃତ ହିତାଧିକାରୀ ଘର ପାଉନାହାନ୍ତି । ଅଯୋଗ୍ୟ ଲୋକଙ୍କୁ ଘର ଦିଆଯାଉଛି । ଏହାର ତଦନ୍ତ ପାଇଁ ସେ ବିଭାଗୀୟ ମନ୍ତ୍ରୀଙ୍କୁ କହିବେ ବୋଲି ନଡ୍ଡା କହିଥିଲେ ।
ସେହିଭଳି ଆୟୁଷ୍ମାନ ଭାରତ ଯୋଜନାରେ ୧୧ କୋଟି ଲୋକ ଉପକୃତ ହୋଇଥିବା ବେଳେ ଓଡ଼ିଶା ଲୋକଙ୍କୁ ରାଜ୍ୟ ସରକାର ଏହି ଯୋଜନାରୁ ବଞ୍ଚିତ କରିବା ଦୁର୍ଭାଗ୍ୟଜନକ ବୋଲି କହିଥିଲେ ।
ଭବାନୀପାଟଣା ଲାଲ ବାହାଦୂର ଶାସ୍ତ୍ରୀ ଷ୍ଟାଡିୟମଠାରେ ଆୟୋଜିତ ବିଜେପିର ଏହି ସମାବେଶରେ ରାଷ୍ଟ୍ରୀୟ ସଭାପତିଙ୍କ ପୂର୍ବରୁ ରାଜ୍ୟର ତୁଙ୍ଗ ନେତାମାନେ ଭାଷଣ ଦେଇଥିଲେ । ସେମାନଙ୍କ ମଧ୍ୟରେ ଥିଲେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ରାଜ୍ୟ ସଭାପତି ମନମୋହନ ସାମଲ, ରାଷ୍ଟ୍ରୀୟ ଉପାଧ୍ୟାକ୍ଷ ବୈଜୟନ୍ତ ପଣ୍ଡା, ସାଂସଦ ଜୁଏଲ୍ ଓରାମ୍, ବସନ୍ତ ପଣ୍ଡା ଏବଂ ଅନ୍ୟମାନେ । ରାଜ୍ୟ ସରକାରଙ୍କ ବିରୋଧରେ କଟୁକଥା ନ କହି ଡବଲ୍ ଇଞ୍ଜିନ ସରକାର ପାଇଁ କାମରେ ଲାଗିବାକୁ କର୍ମୀମାନଙ୍କୁ ଉତ୍ସାହିତ କରିଥିଲେ । ସାରା ରାଜ୍ୟ ବୁଲୁଥିବା ଭୁବନେଶ୍ୱର ସାଂସଦ ଅପରାଜିତା ଷଡ଼ଙ୍ଗୀଙ୍କୁ କିନ୍ତୁ ଏହି ସଭାରେ ଦେଖିବାକୁ ମିଳି ନ ଥିଲା ।
ଭବାନୀପାଟଣା ଜନସଭାରେ ଯୋଗଦେବା ପୂର୍ବରୁ ଶ୍ରୀ ନଡ୍ଡା ମା ମାଣିକେଶ୍ୱରୀ ମନ୍ଦିର ଯାଇ ମା’ଙ୍କର ଆଶୀର୍ବାଦ ନେଇଥିଲେ । ସଭା ପରେ କଳାହାଣ୍ଡି ଲୋକସଭା କ୍ଷେତ୍ରର କର୍ମକର୍ତ୍ତା ଓ ବରିଷ୍ଠ ନାଗରିକଙ୍କ ସହିତ ଆଲୋଚନା କରିଥିଲେ । ଗତକାଲି ଝାରସୁଗୁଡ଼ାରେ ସେ ଦଳୀୟ କର୍ମକର୍ତ୍ତାଙ୍କ ସହ ସାଂଗଠନିକ ବ୍ୟାପାର ଉପରେ ବ୍ୟାପକ ଆଲୋଚନା କରିଥିଲେ ।
ସୂଚନାଯୋଗ୍ୟ, ୨୪ ନିର୍ବାଚନ ପାଇଁ ପଶ୍ଚିମ ଓଡ଼ିଶା ଉପରେ ବିଜେପି ଫୋକସ୍ କରିଛି । ଗତଥର ପଶ୍ଚିମ ଓଡ଼ିଶାର ୩୫ ଟି ବିଧାନସଭା ଆସନରୁ ବିଜେପି ୧୩ ଟି ଆସନ ପାଇଥିଲା ବେଳେ ୫ଟି ଯାକ ଏମପି ସିଟ୍ ରେ ବିଜୟୀ ହୋଇଥିଲା । ତେବେ ଗତ ପଞ୍ଚାୟ ଓ ପୌର ନିର୍ବାଚନରେ ବିଜେପିର ପ୍ରଦର୍ଶନ ଭଲ ହୋଇ ନ ଥିଲେ ମଧ୍ୟ ଦଳ ପୂର୍ବ ସଫଳତା ଆଶା ରଖିଛି ।